Falam Sianginn Pahnih (အထက 2& အမက 5) Ah Bomb A Puak

Chin ramkulh Falam khuapi Cinmual vengah a ummi အထက ၂ sianginn kulh chungah May 26, tuzing zinglei 3 ah bomb pakhat a puak tiah theih a si.

Bomb puahnak ruangah sianginn zeimawzat a rawk, minung hliamtuar an um le um lo cu theih a si rih lo.

Cun May 26, zinglei 3 hrawng thianthiam ah Falam khuapi Matubuk veng i siangniam အမက 5 zongah bomb a Puak ve tiah theih a si.

Chin ramkulh chungah Falam peng cu May 24 ah sianginn kai dingin aa apmi an tam biknak a si. Zalen.

CNDF (Headquarter) Nih Falam Mipi Sinah Ralrin Peknak Cathanh Pathum A Chuah. May 26 zinglei ah Chin National Defense Force (CNDF) Headquarter nih Falam mipi sinah ralrin peknak cathanh pathum an chuah cang. Falam mipi kan ti tikah an zatein si loin ralhrang dohnak ah aa tel duh lomi phunthum hna sinah a si.

Pakhatnak: Mipi leirawitu, ralhrang sinah mipi zuarthlaitu dalan pawl an si. CNDF nih cun ahodah mipi leirawitu le ralhrang sinah mipi zuarthlaitu nan si timi fiangtein kan in theih cang hna. Nan cawlcanghning zong kan in ngiat peng hna. Atu ah nań ngol lo ahcun nan nunnak caah tih a nungmi dantatnak nih an zulh hna lai.

Pahnihnak: Rian in chuahmi CDMer hna hmunhma ah rian a lutmi hna an si. Falam peng cozah riantuan tampi cu an rian chuahtak in CDM ah an i tel. Cu CDM ah aa telmi hna cu rian in phuah/chuahmi an um len. Cu rian in chuah/phuahmi hna an hmunhma ah ningzah hngal loin rian a lutmi an um.

Hihi zoh a chia taktakmi a si. Hi bantuk a tuahmi hna cu Chin miphun si awk zong nan i lo. Hi bantuk hi nan ngol lo ahcun CNDF nih fak piin dantatnak kan tuah lai.

Pathumnak: Sianginn ah fale a apmi nu le pa hna an si. Ralhrang hna sualnak ruangah a tlizammi ngakchia tampi an um lioah ralhrang nih an onmi sianginn ah fale a apmi nan tampi tiah kan theih.

Hihi a rannak in nan ngol dingah kan in theihter hna. Hi ralrin peknak hi nan zulh lo ahcun a herh ningin dantatnak kan tuah lai.

Kachin, Karen, Rakhine le Kawlrawn lei ah an tuah bantukin leirawitu, ralhrang lei tanh in bia a chimmi, ca a tialmi, a cawlcangmi poah cu fak piin dantatnak tuah lengmang cang ding a si. Zoh sawhsawh ding an si ti lo.Fighting CNDF Zalen The Chin Post

Be the first to comment

Leave a Reply

Your email address will not be published.


*