Falam gate check ah COVID-19 zawtnak hrik minung pakhat sin in hmuh

Kawl lei in rak kai lei Falam gate check ah November 14 zanlei ah Tedim in Hakha i tender sok ah a ra mi pa kum 31 sin in COVID-19 zawtnak hrik an hmuh tiah tuanvo ngeitu sin in thawng kan theih.

Hi kong he pehtlai in Falam Sii-inn Sizung-uk Dr. Tluang Cung Thang nih “Tuzanlei 5:15 ah Tedim in Hakha ah tender sok i a ra mi kum 31 pa sin in zawtnak hrik hmuh a si i Falam sii-inn ah chiah a si,” tiah The Hakha Times ah a chim.

Hi zawtnak hmuh mi pa hi Tedim peng khuate um mi a si i an khua lawng si lo in Tedim khua chung zong ah thutdir le umkal balnak ngeih dawh a si.

Hi kong he pehtlai in Dr. Tluang Cung Thang nih “Motor pawl hi check i zawtnak hmuh mi cu atu bantuk in sii-inn ah chiahcolh an si. Asinabel tein zawtnak hmuh lo mi zong hi zakhat ah zakhat kan him tiah i ruah ding an si lo. Cucaah an khua le an chungkhar sin ah i foncolh lo le ralring tein um ah a tha,” tiah a chim.

“Laitlang ah kan hngalh lo in kan khuachung ah zawtnak hi a rak lut in rak um cang sehlaw chim khawh kan si ti lo. Zeicatiah Kawl lei in Laitlang lei tlungkal mi lakah a bik in motorcycle hi gate ah check khawh lo a thlithup in a lutchuak mi an um len cang ca ah chim khawh kan si ti lo,” tiah a cunglei upa sin in kan theih.

Falam gate check ah hin zinglei 10:00 in 12:00 kar le zanlei 2:00 in 5:00 kar ah an check hna. Zanlei 5:00 hnu i a phan mi cu zan riahter in a thaizing ah check an si.Atu lio ah Falam sii-inn ah mizaw pahnih an um tiah theih a si.Credit-The Hakha Time

Be the first to comment

Leave a Reply

Your email address will not be published.


*