Fa ngeih Hi A Har Maw?Chun 12 hlan ah inn ka phan. Rawl ka ei dihin ka it. Kai hngilh kho lo.

Fa ngeih Hi A Har Maw?Ahnu bik Utl  date kha 16.12.2020 si. 12.12.2020 zaan ah tlawmpal te ka paw fak. Ka lungah ummi cu “Nu te “si lai caah a ka hnawh pah ko hih ka hei ti. Thaizing rian herh ka ngei le Sule ah kal hau. Zibg ka tho le sule kal ding in kai tim. Tlawmpal tete in fah pah caah ka nu phone ka hei chawnh. “Fahfam” siko la ti ve.

Chun 12 hlan ah inn ka phan. Rawl ka ei dihin ka it. Kai hngilh kho lo. Minute 5 dan in ka paw fak. Nau pawi bal lo, neih bal lo, paw fah bal lo cu a ruahawk ngaingai ka thei lo. 6PM hrawngah zaan riah tel ei tuah ning ka ti le ka fapa Cung Cung he kan ei. Minute 5 dan cun fak than. CungCung khuaruah har tuk,”Ka nu, naute chuah ai tim le si la ti” a van fah ahkhan ka hmaisen dih le a ka zangfak tuk.

7:00PM ah kan pa inn rak phan le sizung ah kan tli colh. Sizungah zohkhentu minung pakhat lawng a ngah caah ka U Iang nih a ka um pi.Tuanvo ngeitu nurse le siibawi an ra i nau inn ai kam le kam lo an zoh. Zunghnih hmanh ai kam rih lo ti si.

Tlawmpal ah room kan lakmi ah kan ithial. 9PM tiang khi cu minute 5 dan in fak. Afah lo paoh cun capo hna ka sai, ka holh. “Ka nu hi mah tin maw rak fah ve ko mu” ka hei ti. Kai chok pah. Afah caan paoh ah ihkhin tlang le innka kai tlaih. 10PM  cun minute 3 dan in a fak cang. Ka U Iang nih,”a fah dan hi an hnawh pah ko hih tuanah na nei ko la”a ka ti.

11PM cun minute 1 dan in a fak cang. Tung le pang muai i itlaih manh awk zong tha lo. Ka orhlei kut ah sii ronhnak in ttim an bunhcia caah orhlei kut hi thil van i tlaihnak dingah a rem lo/ tthim an sawh cang tikah tlaih a rem lo. Ka mitthlam ah fa pa (9) a ngeimi ka nu rumro a cuang. Minute 1 dan in a fah tikah tha van ihrimnak caan zong um ti lo.

Cheukhat ca ahcun normal in nau neih hi ‘arti tit’ bantuk in ai fawihmi zong an um ko. Har taktak in ngeimi zong an umthiam. Normal in har taktak in nau ngeih khawh le a ngeimi vialte kan upat tuk hna.

OG kut tangnu a ra. Atu ah kut zunghnih lawng ai kam rih. A rau rih la. Thaizing 4AM hrawngah na neih khawh te la a van ti cun lung in kak ko cheh bak ka duh. Mah ticun ihkhun cungah ka um. Nau inn kamnak sii zong chunh um lo. Tuar khawh tiang tuar hau. A chinchap ah “au tuk hlah,na neihnak ding ai hlat tuk rih. Sen an pek tikah tha na nei la loh”ti hoi ko. Bengh bak ka duh.

Normal in ngeih kai tim/ a duh zong ka duh. Ka kum zong no rih. Ka tung zong sang pah ko le ka nei kho ko la ka ti. Cun, normal neih cu nehhnu thil a tlawm tikah zangdam/rian zong ka tlai kho colh la. Nau zong ka zoh kho colh la ka hei ti. Nau inn cu a kut in a zoh than. Zunghnih lawng ai kam rih.

Mah tining in a fah bu i thaizing lawng neih te ding a si ahcun ka tha le zang nih a zawh lai lo caah nau ca zongah keimah ca zongah tha lai lo ka ti. Duh thimnak pahnih um. Operation in a tu neih maw? normal in thaizing tiang hngah?

“Nau ngan fah hi cu Lai pa tthawng Sui Cung hmanh nih celh la loh” ka ti phah. K kut khatlei lawng in ka U Iang cu kai tlaih. Ka keng le tai a ka muai piak ahkhin a nuam deuh. Nain, a fah hi cu celh celh si loh. Nau inn kam le kam lo a kan zoh piak hrim hi cu a fak lawlaw khi si.

Mah ti ning in tuhnu 5hrs hrawng hngah (mah zong ahcun nau inn ai kam le kam lo kha theih si rih lo cu mu) cu caah operation in ka nei ko la tiah bia ka khiah.

Operation tuahnak room leiah kan kal. Thil an van ka thlen. Ka kut tinsensi pawl kha an phiat pah.ka paw cu fak pah.ka au pah, ka tap pah. OG nu phan bal lo maw tiah ka zai pah. “Din deuh in tap. Mi fah cio mi ko” an ka ti. “keimah lawng fah khe loh. Nan holh tam” ka ti pah. Kai sii pah hei ti ko usih hahahaha

Ka tih cemmi hmun ah Operation room ai tel. Mah caah normal neih kai tim pengmi zong si. ထုံဆေး an ka chunh la le i hlau ti hlah ning law teh timi hna ka ruat. Ka tih thotho. Nain, a fah deihnak ding sicun ka ti.

Paw fah lailing ahcun Lu le khup ai tong deng tiang in a kan kuai ter le ထုံဆေး cu a kan chunh. Cikhat lo ah ka pum cu a hit dih, ka lung cu fim. OG nu nih ka paw a hlai lio zong khi ka mit nih hmu lo nain ka lung nig theih.

Operation ka tih tuk caah ka mit ka hup uh ka ti. Nurse nu nih “Na biakmi Pathian sinah thlacam” a ka ti. ‘Bawipa thlacamnak kha a tu le tu ka nolh.

“Nute si. A mom ning le ai dawh ning. A taksa zong khat tuk” an van ti le nau tah aw nih a van zulh. “Ka mitthli tla thluahmah. Lunglawmhnak mitthli he ka khat. “Ka nu, kai lawm tuk. Kan dawttuk” ka hei ti. Nurse hnu nih a ka hnawh piak.

Maah thisen chungchuak fate van hmuh a nuamh ning. Lunglawmhnak nih van a lonh.
Sizung zaanhnih kan riah hnu ah ka fa he dam tein sizung in kan lawi. Inn kan phan. Hnangam khawh ning.

Fa neih duh lomi kan um lai lo. Asinain, fa pakhat neih dingah harnak tampi pah a hau. Tha le zang, chawva, caan le nunnak a tam lengluang ko.”Fanu fapa cu Pathian sinin kan hmuhmi a lianngan bik thluachuah rosung an si”

Note: Hnulei in hringtu nu a si te ding caah siaherhnak in tialmi si. Keimah ka tuar bik, ka fak bik tinak a si hrim lo.Fanu rosung Van Nun Par .Nancy Dawt Chin Sung

Be the first to comment

Leave a Reply

Your email address will not be published.


*