Dr.Sasa nih Nikhat ah suimilam pali hrawng lawng ka it tawn.

Dr.Sasa nih Nikhat ah suimilam pali hrawng lawng ka it tawn. Zeitluk ka bat le kaa manh lo lak zongah ka khuk kaa bil i, nikhat ah voihnih lengmang Bible ka rel i, thla ka cam zungzal. Dr. Sa Sa .Pathian minung nih ramkhel rian an ttuan ahcun tha a tlung bak. Thazaang tampi kan ngah. Bawipa nih Kawlram le Chin mi caah hmang chin ko seh!

Adang relthan:BU I ṬHENNAK Zeiruangah Dah Bu Kan I Ṭhen Tawn?Lai (Chin) mi cu kan phaknak ram le kan umnak hmun kip ah zumtu kan si bantukin kan i suahlam hna, a bu tein kan um hna i hmun khatte ah aa puum i Pathian a thangṭhatmi kan si hna. Hmun khat um le khuasak a duh bikmi kan si bantukin bu i ṭhencheu a hmang bikmi le a duh bikmi miphun zong kan si fawn hoi ko rua. Cucaah cun bu ṭhen hi a ṭhatnak a um bantukin a chiatnak tampi a um ve.

Zeiruangah Dah Bu Kan I Ṭhen Tawn? Khrihfabu kan i hruainak hi democaracy, mipi duhnak mipi kut ah nawl ngeihnak kha pek in i hruainak phung a si caah hruaitu upa hna nih an rianṭuannak tete le kum khat chung kommiṭi kip an rianṭuannak le tangka hmuhnak le hmannak tete hna kha mipi sin theihternak tuah lengmang ding a si. Asinain hruaitu kan si ti ruangah pumpak nawl ngeihnak phun in i hruai te hna hman riangmang i Pastor rule, chairman rule le secretary rule ti te hna in i hruai te hna hi bu i ṭhen nakah siivai țha lo an si tawn. Hruaitu nih a tuah awk a simi tuah loin um te hna. Cun mipi sinah lungtlinnak lak duh lo te hna hi an si rih fawn.

Khrihfabu hruaitu upa nih fian kan herhmi cu pumpak nawl ngeihnak phun in kan i hruai awk a si lo tihi a si. Pastor rule, Chairman rule le Secretary rule ti a um lo caah hman lo ding a si. Baibal bia le mipi duhnak chirhchan in hruaitu dihlak ṭanrual in i hruai ding kha a si i pakhat le pakhat nawl ngeihnak i phawt (Power sharing) si loin ṭuanvo tu i cheuh (Duty sharing) ding tu hi a si deuh. Cucaah hruaitu a simi nih kan hngalh awk cu Khrihfabu rianṭuannak cu cungin tangah (Top-down reletionship) si loin tangin cungah (Bottom-up reletionship) i hruai phun a si ti kha kan philh lo ding a si.

Khrihfabu ṭhanchonak a dawn biktu le mipi lung nuamh lonak le i ṭhencheunak a chuahnak a hrampi cu hruaitu upa hna zumhnak feh lo le thlarau in khah lo ruangah le keimah timi lungput ngei in upa si i cuh te hna hi an si. Cun pakhat le pakhat i hmu thiam loin i entainak le biaral i dohnak te hna hi bu i ṭhencheu nakding ah a zual khun. Cu lawng si loin kan zumhning le pomning aa khah lo tikah pakhat le khat ruahpiak zia thiam loin mah zumhnak le duhnak lawng kha hmai suanternak nih bu chung lung i hmuh lonak le bu ṭhennak tiang a chuahpi rih fawn.

Hruaitu upa nih kan ṭuan awk rian kha fel tein ṭuan loin kan tlolh sual, kan daithlan sual tikah a hnuah cun bu chungah chambaunak tete kha a hung langmi ruangah le kan ṭuan lo ding rianpi hna vaa sawhkalh len i vai i thelh len, mi rian hna va ṭuankanh te hna ruangah hin lung i fahternak le lung i hmuhthiam lonak a chuak tawn i hi a cunglei i kan ṭialmi hna hi Khrihfabu ṭhanchonak a dawn biktu a si pinah bu i ṭhennak a hrampi bik cu a si. Cucaah cun hi hna hi Khrihfabu hruaitu a simi paoh nih i ralrin dingah kan herh ngaingaimi hna cu an si.

Bu ṭhen hi Khrihfabu a ngan tuk ahcun inndang chuah i, i ṭhen ah a ṭha ko. Cun Khrihfabu pakhat chungah zumhnak i khah lo le zumhnak aa dan a si ahcun i ṭhen a ṭha ko, i ṭhen ding a si fawn ko. Asinain upa si i cuh ruang te hna le i rem lo ruang te hna i bu i ṭhen cu a ṭha lo, zoh hrim a chia kho tuk. Lai mi cu bu kan i cheu kan i ṭhen tikah i huat , i rem lo le i chawnh duh ti lo hei ti bantuk te hna nang maw kei timi lungput kan ngeihmi te hna hi a poi bikmi a si.

A reltu Bawipa nih thluachuahnak in pe ko hna seh.Dinnak kha a cat lomi tiva bantukin luanter camcin ko u (Amos 5:24).by-Salai K. Biak Lian Thawng

Be the first to comment

Leave a Reply

Your email address will not be published.


*