Dr. Andrew Ngun Cung Lian kong ruah setmat

1999 kum ah US um Laimi nih chuahmi Robawm Magazine ah NC Lian timi cafung min in ṭialmi “Lai Samurai” timi capar ka rak relnak in Dr. Ngun Cung Lian hi a min ka rak theih. Pastor le bible siangngakchia vialte kha zei kong poh ah aa thlakmi le rianṭuan thathut ruang ah bible sianginn a kaimi tiphun in a rak ṭial i, Japan ram Meiji siangpahrang chan lio i rianṭuan lo in um har caan poh ah taw dawr ah a kalmi siangpahrang vengtu Samurai pawl he a rak tahchun hna. Bible sianginn ka kai lio a si caah kaa fahsak khun. Mandalay LBC zarhpi zing pumh ah Lai bible siangngakchia pawl caan an kan pek ve lio ah NC Lian bia hi ruah awk tete cu a um nain a khuaruahning aa palh deuh ruah tiah ka rak chim bal.

2012 kum hrawnghrang lio i Dr. Ngun Cung Lian nih Sahrang pawl kum 15 chung an rak i tuah sekmi 2008 uknak phunghrampi a rak soiselnak biafang hna Mualkai khua in Taluk ser Chibo radio te in ka rak ngaih lio tu ah khan cun Lai Saimurai kong kha philh deng tiang in ka rak uar tuk, ka rak i chuang tuk.

CNF in lungtlinlonak a ngeih ruang ah a chuak i U Thein Sein sawmnak a rak cohlan tiang zong ah khan “um, mi fanau a mawh ve lo” ka rak ti.

2014 maw a si 2015 deuh ah dik Dr. Ngun Cung Lian hi MIT bible sianginn ah biachim an rak sawm i a biachim le bia an halmi a lehnak hna tu ahcun a rak soisel lengmangmi 2008 Phunghrampi kha a kilven daih. Kan ar cio ko. Miphun dang kan hawile le sayamah te cheukhat nih bia eng thlaihnak ah an hman caan zong a um. I chuan awk a ṭha ti lo. Hna i cheh i zei thei lo bang i um ter dah lo cu mi hmai khah a rak si lo.

2019 kum March thla 2 ni DVB debate le a dang interview ah ralkap le 2008 Phunghrampi a ṭanh hna a langh hnu cun, “a paam tuk” ti dah lo cu chim awk biafang a har ko.

Min Aung Hlaing nih rampumpi uknak nawlngeihnak hram hram in a laak hnu i Sahrang Uknak ruahnak petu min an vun bunh chinchap ahcun bia a di bak. Zei ko dah a ruah hnga kan ti cio ko lai dah.

Min Aung Hlaing le a kuttang sahrang rual zong hi ni khat ahcun a dongh caan a phan ko lai va si kaw, Dr. Andrew Ngun Cung Lian hi zei tin dah khua a sak te hnga?

Dr. Andrew Ngun Cung Lian kong he pehtlai in kan tefa hna nih lungfimnak an i char ding pakhat tu cu a fiang ko. “Minung timi hi catang sang kai khawh le thluak ṭhat lawng a zaa lo hi ta, lungput ṭha ngeih chih le mizapi zawn ruah zong pei a rak herh tuk hi” tiah an phai len te lai.

Dr. Andrew Ngun Cung Lian hi ruahnak a peekmi Min Aung Hlain kut in a ram mi 700 lengkai nunnak liam i a thong tel in tlaihkhih an ton leng ah mi kip te thinphan dai lo in an um ti hi theih lo in a um bal lai lo. Hibantuk caan ah hin a rawl ei chung pil in a me rem kho ko nnga maw?

Zei a va si zong ah dinnak nih a tei hna ni cu sol lo in a phan te ko lai.By-Ruang Lian,
14/04/2021

Be the first to comment

Leave a Reply

Your email address will not be published.


*