Donald Trump tha petu pawl nih buaibainak an tuah i US Capitol chung tiang an luh hnawh, minung Pakhat a nunnak a liam.

Donald Trump tha petu pawl cu US Capitol chung tiang an luh hnawh hna i ṭuanvo ngeitu Palek pawl he zong buaibainak a chuak. Democratic palai Joe Biden nih US ram thimnak ah teinak a hmuhmi kong he pehtlai in fehternak tuah dingin Capitol chung ah biapi mi ton biaruahnak an tuah lio ah thimnak a phichuak a cohlan lo tu pawl mi buai bu nih cun Capitol chung ah cun an luh hnawh hna hna. Cu ruang ah a biapi mi ton biaruahnak cu an ngol tiah theih asi.

Cu lawng si lo in ṭuanvo ngeitu palek pawl le mi buai pawl karlak ah buainak a chuak i kah nak zong aum caah ah Nu pakhat zong a nunnak a liam tiah theih asi. Capitol chung ah atu bantuk luh hnawh an ton mi hi US ram sining ah cun 1812 kum hnu ah a voikhatnak bik tonmi thil ah aa cang. Hihi US Congress caah cun khuaci a mui ni asi tiah US Vice President Mike Pence nih cun a ti. Mi buaibu nih Capitol chung an luh hnawh hlan nazi pakhat hrawng aa duh ah Donald Trump nih National Mall i a mah tha petu thong leng sin ah biachimnak a tuah i “Thimnak ah sunghnak a hmuh mi cu zeitik hmanh ah ka cohlan lai lo” tiah biakamnak a tuah. Cu dih cun thil sining cu phun dangah aa mer ti asi. Duhlonak langhtertu pawl cu Capitol luhnak hmunhnih ning tein an kham i mi buai bu cu hmailei luhnak lei in Capitol chung ah cun an lut. An nih nih “Donald Trump lawng kan duh” timi au thawng he cun Capitol chung lam cu an zawh cuahmah.

Donald Trump nih hruhru hranghrang in thil tuah lo ding tiah voihnih kheng te a nawl ko nain avoi 2nak nawlnak a tuah caan ah “thiamnak chung ah ningcang lo in thimfung lenthal nak aum” tiah a telh chih ruang ah Facebook, Twitter le YouTube nih cu he pehtlai mi video le caṭial mi pawl cu hnawh piak asi. Twitter nih Trump account cu nazi 12 chung an phih piak. Mi buai bu pawl an rak luh lio caan ah Congress palai pawl le thawngla tu pawl cu siivai khu pawl khamhnak hmaihuh he a himnak hmun ah an kal pi hna. Capitol leng lei thawng la tu pawl an umnak hmunhma i camera pawl zong mi buai pawl nih an hrawh piak hna leng ah thawngla tu pawl zong volpamh le ral an tong.

National Guard thazaang 2,700, Virginia State in thazaang 650 cu Capitol ah thlah an si dih hnu ceo ah duhlonak a langhter tu mibu pawl cu ṭhen cheu kho hna. A buai mi lak ah minung 13 cu tlaih an si, hriamnam meithal 5 zong lak chih asi tiah Washington DC Palek lei ṭuanvo ngeitu pawl nih an chim. Washington DC ah cacawn nithum ni (Jan. 06)zaan nazi 6 thok in cacawn nili ni (Jan. 07) zingka tiang zaan chuah lo ding nawl an chuah tiah theih asi. Ref: BBC Live Reporting
Credit-CCN

Be the first to comment

Leave a Reply

Your email address will not be published.


*