Dirh cangmi sahrang uknak kha caan sau dodalnak in hmaichon tikah hin i hmaitlak ding thil pahnih a um.

Caan Sau Dodalnak:Sahrang uknak dodalnak hi thla khat thla hnih chung men ah tlam a tlin khawh lo sual ahcun dodal ningcang thar pakhat ser a herh lai. Uknak chuttu hna nih hin dotla sinak, cohlannak, telpinak le tlaihkhipnak hna hi tlawmpal cu an hmuh men lai. Cu tikah, dodalning hi caan tawi dodalnak in caan sau dodalnak lei ah mer a herh lai. Dodalnak hlawh a tlin cikcek khawhnak ding ah lohma kau piin laak khawh hlan le hmunhma kip ah telpilonak tuah khawh hlan cu biapi deuh ah ruahmi hmunhma tlawm deuh in thim in i hmaithlak a herh lai. Phun dang in chim ahcun, a huap a bideuhmi dodalnak tuah a herh lai.

Dirh cangmi sahrang uknak kha caan sau dodalnak in hmaichon tikah hin i hmaitlak ding thil pahnih a um.

Pakhatnak ah, uknak chuttu sahrang hna nih anmah tein an dirhmi ruru hrang hrang ukning dah ti lo cu an i tinhmi thil dang hna kha an tlamtlinh khawh lonak hnga khenkham a herh. Sahrang hna nih hin chawlehnak, khua tuaktanning le ramkhellei kong ah an duhning kha mizapi sin ah ba khaih in khaih an timh sual hna ahcun cu hna cu khenkham a herh. Cu cu “a huap a bi deuhmi dodalnak” tiah an ti i zeimaw caan ahcun “thimkhunmi hna i hmaithlakmi dodalnak” ti zong in an ti.

A huap a bi deuhmi dodalnak ah hin fimthiamnak le rian dang cio a tlaimi hna nih khan a biapi deuh tiah thimmi zawn tete lawng kha i hmaithlak in dodalnak an tuah lai. Tahchunnak ah, palek pawl hi an rian ṭuan lo awk ṭha lo dirhmun ah an um hnga. Cu tikah, an rian langhngan in kaltaak lo in an rian kha ṭuan ko bu in tlaihkhih an fialmi dodaltu hna kha a hlankan in thawngthanh chung i ralrinnak peek khawh a si. Siangcachim hna zong nih sahrang pawl lih in ṭawnmi ca le tuanbia hna kha sianginn ah chimh lo in um khawh a si. Hlawhfa hna le rian uktu hna zong nih duhlonak langhternak, rian hmun ah khua hnut i phaak tibantuk in rian hma kal lo ding in tuah khawh a si. Biaknaklei phungchimtu hna zong nih sahrang pawl doh a herhnak ṭuanvo kong kha an chim ve lai.

Pahnihnak ah, caan sau dodalnak ah hin, khuatlang ah a ummi phu hna i mah tein tawlrelnak nawl kha kilven a herh. Sahrang uknak kha tuan te ah tei khawh lo sual tikah sahrang pawl nih hin khuatlang phu hna kha an duhning in rian an ṭuanter hna lai i an cawlcanghnak zong an khenkham men hna lai. Abik in, biaceihnak zung, sianginn, lothlo bu le sianghleirun siangngakchia bu tbk, nunphung bu, fimthiamnak he aa pehtlaimi phu, biaknak bu tibantuk hna kha anmah duhning in an chak merh an timh men lai. Cu an i timhnak hna hlawh a tlin sual ahcun hmailei dodalnak ca ah a herhmi khuatlang thazaang hi a zor chin chin lai.

Cucaah, caan sau democracy dothlennak ah hin sahrang pawl nih khuatlang phu hna chaak an tlaihkhawhlonak hnga biatak tein kilven a herh. Hi khuatlang phu hna hi dodalnak ca lawng ah hngatchanmi an si lo, khuatlang kha sahrang hna kut in kilvennak le dotla ramkhel ningcang dirhṭhannak ah a tak in a ṭuan khomi dodaltu phu hna an si.

A hramthok i tuahmi dodalnak nih hin sahrang uknak hi caan tawite chungah a tei khawh lo sual zongah kan khuatlang hi sahrang uknak khuamui chung ah a um lan lai tinak a si lo. Cu kong cu langhternak ah a huap a bimi dodalnak hi kan hun langhtermi a si. Zei a si hmanh ah, sahrang uknak dodalnak ah hin a biapibik in tinh a herhmi cu sahrang hna nih kan khuatlang hi an duhning in chaak an tlaih khawh hlan ah sahrang uknak hi a rianrannak in le tlamtling tein khenkham awk a si. Gene Sharp, The Anti-Coup By-A Ruang 29/03/2021

Be the first to comment

Leave a Reply

Your email address will not be published.


*