December 20,2020 Rev. Dr. Thomas Cung Bik A fapa ngeihchun pek tiangin a kan dawtu Khuazing Pathian min ka thangthat.

December 20,2020 Rev. Dr. Thomas Cung Bik A fapa ngeihchun pek tiangin a kan dawtu Khuazing Pathian min ka thangthat.

Kan caah a chuakmi Khrih Bawipa min in nan kut kan tlaih hna. Christmas lawmhnak, daihnak le damnak cu nan zapi cungah tlung ko seh!

Remdaihnak Um Ko Seh“A sang bik van ah khin Pathian cu sunparnak hmu ko seh. Cun a dawtmi hna umnak vawlei ah hin remnak um ko seh,” tiah an ti. Luka 2:15

Jesuh Khrih a rak chuah lio ah ramlak i a riakmi tuukhal hna sinah Pathian vancungmi a rak i langh i, an thin a phang tuk hringhrang. Nain, “nan thinphang hlah u,” tiah a ti hna. “David khua chungah nan khamhtu kha a chuak cang—Khrih Bawipa cu!” tiah a ti hna. An rak hngah hlang tukmi Messiah cu vancungmi nih “a chuak cang” tiah a thanh hna. Zei tluk thawngtha dah a si! Cu thawngtha cu kanmah ca zong ah a si ve.

Cu dih cun khuaruahhar a simi thil pakhat a hung cang. Vancungmi ralkapbu nganpi an hung lang i, Pathian cu hla in an thangthat. An hla cu a biafang a tawi nain, a sullam a tha tuk. “A sang bik van ah khin Pathian cu sunparnak hmu ko seh. Cun a dawtmi hna umnak vawlei ah hin remnak um ko seh,” tiah an ti.

Pakhatnak, “a sang bik van ah khin Pathian cu sunparnak hmu ko seh.” Vancungmi nih an sak i, an thangthat bantuk in Pathian cu thangthat si ko seh tiah kan hmurka in siseh, kan nunnak in siseh phuang ve hna usih. Pathian cu thangthat awk tlak hrimhrim a si. Christmas caan hi Pathian nih a fapa pek tiang a kan dawtnak a thar in ruah than i, Pathian sinah lunglawmhnak kan chim caan le Pathian cu sunglawi taktak in kan thangthat caan a si. Cucu kan tuahmi Christmas nih a tlolh lo ding a biapi tuk.

Christmas kan ti tikah pumh khi a si lem lo. Rawl i hrawm zong khi a si lem lo. Zanvah zong khi a si lem lo. Christmas cu, a ngaingai ti ahcun, Pathian dawtnak kong a si. Vawlei a dawt tuk caah a fapa a kan peknak kong a si. Nangmah kong a si lo.

Keimah kong a si lo. Aho te chung nih an kan donpiak timi kong zong a si lo. Thilpuan thar kan i zalh le zalh lo kong zong a si lo. Inn kan tamh le tamh lo kong zong a si lo. Christmas cu Pathian dawtnak kong a si. Jesuh Khrih kan caah a chuahnak kong a si. Dawtnak le zawnruahnak kong a si. Pathian dawtnak a theimi nih cun Pathian sunparnak pek caan a si. Pathian thangthat caan a si. Pathian vel thawng lawngin ka nun hi a si ti kan hngalh than i, lunglawmhnak in Pathian thangthatnak he kan hman caan a si.

Pahnihnak, “Cun a dawtmi hna umnak vawlei ah hin remnak um ko seh.” Pathian nih a dawtmi hna umnak vawlei ah remdaihnak um seh ti a duh. Zei ruangah dah kan vawlei ah, kan khua le ram ah remdaihnak a um khawh hnga lo, Pathian nih a duhmi a si ko tung? Remdaihnak a um khawh lo cu “keimah ka hman, anih a palh” ti lungput kan ngeihmi a ngan tuk caah a si. Theihthiamnak a tlawm caah, a thazaang a der caah a si. Keimah ka ti ning in bia tlu seh. Keimah duhnak hi ka zul hna seh.

“Keimah” timi hi Christmas lungput he aa ralkahmi a si. Jesuh nih Pathian fa ka si, keimah nawl si, a ti lo. Amah le amah tu kha aa zorter. Paul nih cun, “Pathian sinak kha a ngeih zungzalmi a si ko nain hramhram in Pathian tluk si awk kha cuh awk ah a rel lo. Amah lungtho te tu in sal sinak tu kha aa lak; minung mui in a lang. Mi toiah aa dor i nawlngaihnak lam kha thih tiangin a zulh—vailam cung thihnak kha” tiah a ti Filipi 2:6-8.

Jesuh nih toidornak nun aa thim cu, minung (misualmi nang le kei) nih kan damnak/khamhnak caah a si. si. Pathian he kan i remnak caah a si. Midang zawnruahnak nih a zulh lomi “keimah ti lungput” cu pumpak nunnak caah, chungkhar nunnak caah, Khrihfabu nunnak caah, khua le ram nunnak caah virus bantuk a si.

Jesuh nih cun keimah timi lungput a kal tak i, midang zawnruahnak lungput kha a nunpi. Amah caah a har ko. A fawi hrimhrim lo. Nain, Pathian duhmi lamthluan a si caah a zulh lo. Bethlehem cawinn ah a chuak duh ko. Vailamcung zong ah a thi duh ko.

Keimah ka temhtuar zong ah midang caah damnak a si ahcun, hlawknak a si ko ahcun, ka tuah ko lai ti hi Jesuh nih a chuah hnawhmi, a nunpi mi nun cu a si. Cu bantuk lungput cu nihin ah kan herh tuk hringhran. Kan minung sinak cun a har ko lai. Nain, kan nunnak a mawngtu ah Jesuh siter hmanh hna usih, kan lungput duhsah tein aa remh ko lai. Kan rem lomi hna kan rem than khawh hna lai i, remnak kan ser than khawh ko lai. Thla zong cam hna usih.

Nangmah kha Mipi caah remdaihnak thlaici a tuhtu na si kho. Remnak lam a sialtu na si kho. Remnak caah zaanghleicawi mi na si kho. Asilole, nangmah kha remnak lamthluan a hrawktu na si kho thiam. Christmas thawngtha cu remdaihnak a si. Vawleicung ah remnak um ko seh tiah vancungmi nih hla an sak. “A dawtmi hna umnak” tiah an ti. Kan um nak cio hi Pathian dawtmi hna umnak cio a si ve ko. Remnak um seh tiah Pathian nih a duhmi khua a si. Nangmah hmangin remdaihnak um seh ti a duh.

Keimah cu misual ka si. Palhnak atu le atu a tuahmi ka si. Pathian ngaihthiamnak ka herh. Midang zong nih ngaihthiam a hau ka si, ti hi kan philh lo ding a biapi tuk. Ka sual lo, palhnak ka tuah bal lo, ka tling bak a timi kan um lai lo. Pathian nih cun misual kan si ko lio ah a Fapa kha kanmah khamh awk ah a run thlah cang.

Cucu amah he remnak ding caah a si. A kan rem kan ti lai cu. Amah a palh caah a si lo, a kan dawt caah a si. Remnak tuahtu kan herh. Kan palh lo tiah kan i ruah men ko lai, nain remnak tuahtu si i zuam cio usih. Kan biakmi Pathian nih cun aho paoh kha a kan rem dih ko. Amah he khuasak ti a kan duh dih ko. Kannih tah remnak hi kan duh ve lai lo maw? Vancungmi hna hla hi kan hnathlam ah cuang peng ko seh!

“A sang bik van ah khin Pathian cu sunparnak hmu ko seh” tiah vancungmi nih hla in Pathian cu an thangthat bantuk in kannih vialte zong nih Pathian cu a zungzal in thangthat hna usih. Pathian dawtnak a ngan tukmi hi tha tein na ruah i a sullam na tuak ahcun na lawmhnak a ngan chinchin ko lai. Pathian sinah lunglawmhnak chim lo in na um kho lai lo.

“Cun a dawtmi hna umnak vawlei ah hin remnak um ko seh” tiah vancungmi nih hla in an sak. Cucu hi vawlei ah daihnak le remnak um seh tiah Pathian nih a duh caah a si. Fapa ngeihchun Jesuh pek tiang a kan dawtu Pathian sunparnak pek le vawlei ah remdaihnak tuah hi Christmas i aa muitinh cu an si.Kan zapi caah Pathian nih thlua kan chuahpiak ko seh!Thomas Cung Bik Amos pa MIT, Yangon

Be the first to comment

Leave a Reply

Your email address will not be published.


*