David Pennak le NUG Lungput

Hawikomhnak in keimah bawmh awkah khan nan rat a si ahcun, ka lung cu nannih sinah tthit chih a si lai; sihmanhsehlaw rawi awk i nan rat a si ahcun, kan pupa hna Pathian nih in hmu hna seh law in mawhchiat ko hna seh.”

Samuel sinin BAWIPA bia a rami ning khan David cu Israel mi siangpahrang ah chitin thuh a si ko nain Saul nih hramhram in uknak a tleih rih caah David cu Ziklag khua ah a bawmtu mitthawng hna he an um. Cu a mitthawng hna cu Benjamin hrin, Saul rualchan, li le thal le lungherh cheh cu an orhlei kut he an kehlei kut he khan a thiammi an si. Zeiruang ah dah Saul rualchan hna nih David cu Saul ral in an ven? Ningcanglo uknak cu Pathian ttihzah lonak in a sem timi le dinnak cu miphun rualremnak lam a si timi an i fian caah a si. Cu bantuk lungput nih miphun vialte hna cu hmunkhat ah khuasak tti ding in a pumh hna i David cu, “Zohhmanh, kannih cu na ruh le na sa kan si, kan tuukhal na si lai i na mi Israel mi kan cungah bawi na si lai,” tiah an ti. Cun David cu annih ton awkah khan a va chuak i, “Hawikomhnak in keimah bawmh awkah khan nan rat a si ahcun, ka lung cu nannih sinah tthit chih a si laiā€¦

sihmanhsehlaw rawi awk i nan rat a si ahcun, kan pupa hna Pathian nih in hmu hna seh law in mawhchiat ko hna seh,” tiah a ti hna. Cu ticun ni fate ti awkin mi kha David sinah an ra i, “Na Pathian nih an bawmh!” tiin amah he an i fonh in ralkapbu nganpi, Pathian ralkalbu bantuk ah a ralkapbu cu an cang. Cu ralkapbu nganpi ahcun Israel miphun vialte an tling i bochan ngaimi Gad ralkapbu, Jordan tiva a kuang vialte a khah dih lio i a tantu, cun cu nelrawn chung i a ummi vialte nichuahlei le nitlaklei i a dawi dihtu hna zong kha an i tel. Cu raldohnak hriamnam in tling tein aa thuammi ralkap vialte hna nih David cu BAWIPA bia ningin Israel siangpahrang ah kan ser hrimhrim lai tiah i tim in Hebron ah an ra; cu bantuk thiamthiam in Israel mi vialte hna zong cu David kha siangpahrang i ser awkah lungkhat tein an um ve.

February 01, 2021 ni thawk in Min Aung Hlaing le a ralbawi hna nih ningcanglo in mizapi thimmi cozah tleihpiaknak le zapi cung ah hrem, khih le thahnak tiang hmangin uknak cu hramhram in an lak. Sihmanhsehlaw Kawlram mizapi nih thimmi cozah aiawh in April 16, 2021 ah National Unity Government (NUG) cu a hung dir. Cu NUG nih cun nihin kan dohtlennak cu a tuanchuah lai i mizapi kan himnak, miphun vialte lungkhat tein ttanrual tinak le ram pakhat chung ah ruh le sa bangin a tlaimi nunnak sining lam ah a kan hruai lai. Cucu kan pupa hna sin ah rak kamhmi biakamnak kan nunter a si.

Nihin Kawlram pi Dohthlennak ah miphun kan tling, sifah kan ingti hna, nunnak pek cio a si, zeicahtiah Kawlram chungah lungrualnak a um. Hriam bochan riang mang in uknak latu (Dictators) a hram in bongh kan duh cio. Dinnak le daihnak zalen ter kan duh. Cu bantuk lungkhat tein ningcanglo uknak dohnak cu Ram pi thanchonak le lawmhnak a si ti kha miphun vialte nih duhmi a si.

Cucaah thimmi David he hawikomhnak in mithalo pa Saul dohnak cu Pathian nih thluachuak a pek i Israel miphun vialte cu siangpahrang David pennak tangah rualrem tein khuasak ttinak an ngei. Cu ve bantukin NUG cu mizapi nih kan thimmi cozah aiawh in a dir cang i mizapi himnak le luatnak lam a kawlnak ah kan mah pumpak pakhat cio nih dirpi in mithalo pa MAL le a riantuanhawi hna dohttinak ah kan sining chuah ve hna u si! Cucu Pathian pennak hi vawlei ah a tlunnak ding caah rian kan tuan a si. Cu pennak cu Kawlram mizapi kan luatnak, kan damnak le kan himnak a si lai. (1 Chanrelnak 11-12) @siapiraldo WeSupportNUG Whatishappeningin Hakha RejectMilitaryCoup JusticeFor Myanmar By-hakha campaign for justice

Be the first to comment

Leave a Reply

Your email address will not be published.


*