DALAN pawl tih an nun rualrual in

Politics le Business lei ah DALAN pawl hi tih an nin bantuk in BiAKNAK lei zong ah i ti ter nun hi tih a nung bak ve.

Lai miphun cu 90 percet Khrihfa kan si cang. Cu a si ah Khrihfabu chung ah member kan luh ruangah a hrinthanmi, zungzal nunnak a ngeimi cu kan si dih hnga maw? Si naisai hlah! A tu chan ahcun Piangthar aw kan cawi dih cang, Hallelujiah le Amen zong buu kip nih kan chim khawh dih cang. Asinain zumhnak kan ngeih taktak tung lo i khawmhnak a co cangmi bantuk in kan i um ter ahcun He’ll ah kan kal te lai.

Ananias te nupa hi Jesuh chan lio Khrihfa hmasa an rak si. Pumhkhawmh ah an fel, thawhlawm pek an fel asinain zawt lo pi in Peter hmaikaah an thi tiah Cathiang ah kan hmuh. (Lam.5:1-5). Mah hna nu va hi zeiruang set ah an thih hnga?

Hi hna nupa an thih nak a ruang bik cu tangka an thuh mi kha Lamkatu hna hmaiah a rak pu dihmi bantuk in an i ter i lih bia an chim caah asi tiah kan hmuh (Acts 5). Biadang in chim ahcun, “AN I TITER” caah an thihnak a si”

Nang le kei zong Jesuh Khrih kan ngeih lo mi kha a ngeimi phun, khamhnak kan co rih lomi hna kha a co ve cangmi bantuk in kan i um ter ve sual maw? Thiang Thlarau riantuannak na pawm lomi hna kha a pawm tuk cangmi phun in naa um ter ve sual maw? Thih hnu pin lei kalnak lam na theih lomi kha a thei tuk cangmi phun in naa um ter ve sual maw?

Zei maw caan ahcun i titer a thiammi hna hi minung hawi sin ahcun mifim an si tiah thiam co ter an si zungzal nain thihnak lam lei ah a kan hruai tu a si ti kha kan theih a hau. DALAN pawl hi tih an nun rualrual in i ti ter a thiammi hawi kawm hi tih an nung ve. Cun a zawmi nih a dammi phun in i umter zong thih zaunak a si. Zumhnak a ngei rih lomi nih a ngeimi phun in i umter cu zungzal in na thihnak lam “HELL” chung ah kalnak a si.

Zisuh nih, “keimah lawnglawng hi lam le biatak le nunnak ka si; keimah sindah ti lo cu ahohmah Pa sin nan phan kho lai lo” tiah a ti caah Jesuh sin ah na rak ra ve lai lo maw (Johan 14:6). Na sining tein Pathian nih an dawt! (Efesa.5:1-3). Na fel hmaisa zong a hau hrimhrim loh, i ti ter lo tein Bawipa Jesuh sin tu ah a tu na nunnak pe law zungzal in Na nung ve cang lai.
Blessings!By-Joseph T.L Thang

Be the first to comment

Leave a Reply

Your email address will not be published.


*