Conlo & Cawngnak Puan Thawhkehnak Tuanbia

Kum zabu 14 (A.D 1400) hrawng ah Zotung peng ah khuaruahhar tuanbia pakhat a cang1. Sepi an timi khuate ah Tho Khe an timi, tlangval a chuakthiam le ai dawh takmi a um. Nikhat ah Tho Khe cu, Letsa (Myittha) tiva ah surcheh ah a kal.

Tiva chung in lasi nungak Tui Thang Nung timi a hung lang.  Tui Thang Nung nih Tho Khe a hmuh lecangka, a ngaihzawn (uar) colh. Ai thawh i, “Tho Khe, zaangfahte in na sathih ka pe tuah” tiah aw-aan thlumte in a run chawnh. Tho Khe a vun i mer i, ngaknu dawhte cu a hun hmuh i, a samthih cu a pek.

A samthih a pek lecangka, Tho Khe nih a ngaihzawn colh ve. An i ngaizawng i, nu le va ah an cang i, runkhatte ah an umti. Kum 3 a rauh hnu ah, Tho Khe nih Tui Thang Nung sinah a thawh i, “Nangmah he kum 3 chung ka um cang i, ka chungkhar le ka khua ka ngai tuk hringhran hna. Ka chungkhar le ka cingla tlawn na ka sianh hna hnga maw?” tiah a ti.

Tui Thang Nung nih, “Si e, na tlawn ko hna lai. Amahbalte, kan i umhnak kong hi ahohmanh ka chim hrimhrim hna lai lo, tiah bia ka kamhta mu. Na chim sual citcet ahcun, na hromhrawl ah tthim ka chiah cang khah, na thi hrimhrim lai” tiah a ti.

Tho Khe cu a khua ah a kir. Khuami vialte nih an hmuh tikah, an khuaruah a har tuk hringhran. Zeicatiah, a thi cang tiah an ruah caah, phung le lam bang, lungdonh an rak phunpiak cang. Khuazei ah dah, cu cancan cu na um tiah khuatepi ning nawn in, nitin an hal lengmang.

“Ka umnak kan chim hna lai lo. Kan chimh hna ahcun, ka thi lai” tiah Tho Khe nih a ti hna2. Hlan hruh chan kan ti fam cu, mah kong cu hngalh an duh tuk caah, an ngiar lengmang i, tuarh lo le ngelfe ah, Tho Khe nih, “Keimah ka mipum nakin hi kong theih nan duh deuh caah, kan chimh hna lai. Ka chim cun, ka thih cang lai caah ruakhngah, puanzual vialte i ring u law” a ti hna i, khuatepi nih an i ring ve.

Cun, Tho Khe cu, khuami nih an kulh rilrel i, lasi hngaknu he an i umhnak kong cu a chimh hna. A chimh dih hna lecangka, a hrum, a ttap, a thaw a cham i, a thi colh3.

Khuami vialte nih Tho Khe ruak cu an humh i, ni 3 le zan 2 chung an ttah. A zakhatnak zantim a phak tikah, lasi hngaknu dawh Tui Thang Nung cu a rak ra i, kut tahmi thuamthil zun 5 – Cawngnak le Conlo – tel in a vun i ken hna; Tho Khe ruak kam ah a zar hna i, hitihin ttah hla a lawh:

“Tho Khe, Tho Khe, aho sin hmanh ah chim hna hlah kan ti mu kha, siseh, atu na biakam na leet cang, thihnak nih a kan then ruangmang cang. Ka pasal Tho Khe samthlairem, aho nih an in iang lo ee… ti-um ngaleng suinga hmanh nih an in iang kho lo;  bungdi vaasen dawh nih an iang kho lo dah ngai. Tho Khe, Tho Khe, vun i hlau law, ka  tta, pangpar dawhte ka  ttawhpiak law, ka sam ah ka tonhthan law” tiah zan khuadei tiang a ttah.

“Tho Khe, kaltak na hau hrim ai, khua fingrei nih cat cang lai hi, vaate aw le innzuat arkhuang thawng ka theih hna” tiah a ti i, a thuamthil zar ialte cu a laak dih hna i, inncarlei innkaa in a chuak.

Tui Thang Nung nih a ttahchung vialte, khuami dihlak, pitar Nung Me Si  timi dah lo, thuhhlut in an i hngilh dih. Nung Me Si nih Tui Thang Nung cu a hmuh i, a ttah hlalawh vialte a theih.

A thaizing ah, Nung Me Si nih khuami cu a chimh hna. Khuami nih pakhat le pakhat an i ceih, “Tuzan cu hngilh lote in, kan um lai i, muidawh nu cu kan hngah lai” tiah an ti. Nung Me Si sin zong ah, “Tuzan ah mah nu a rak ratthan ahcun, rak kan hlau te hrimhrim mu” tiah an ti.

A zanhnihnak zantim a phak tikah, Tui Tang Nung cu, a thuamthil dawh put in a rak rathan i, a pasal Tho Khe cu a zankhatnak i a ttahning bantukte in a hung ttahthan. Zan khuadei in a ttap. Pitar Nung Me Si lawng nih a hmuhthan. Midang vialte an i hngilh dih. Nung Me Si nih a thlite in a tthangh hna; a sih, a hmerh len hna zong ah, ahohmanh an i hlau kho lo.

Tui Tang Nung cu a ngaihchiat a celh lo i, a ttahning a runh tuk. Khuadei ar a hung khuang ciammam i, a thuamthil zarmi pawl cu khulrang in a laak hna. Vanchiat maw, vanthat dek,  a kuttah zal “Pynccia nung”* (Zotung holh in) a nganhtak sual.

Khuami dang an hun i hlauh tikah, Tui Thang Nung nih a philhtakmi a zal cu an uar tuk hringhran. Pitar Nung Me Si nih zal cu ai ngeih. Pitar Nung Me Si i a ttale nih Sepi khua  an tlak;  uktu chung an si. Ta pa 3 – Bawi He, Le Ccung* le Le Lung – a ngeih hna.

Bawi He le Nung Me Si nih Sepi khua an hngah, an uk. Le Ccung le Lelung nih Luikuh ram ah khuadang veve  an va tlak i, an uk.

Letsa tiva cu Sepi khua cun khaan 1 hrawng a hlaat; Sepe khua pawng ah Cahvaw* (Cahva) tiva a um i, Letsa tiva ah ai va fonh. Lasi Tui Thang Nung cu Cahva ah a rak i langh i, pitar Nung Me Si he an i hmu. Hawikom tha ah an cang i, ni 7 chung runkhat ah khua an sati.

Nung Me Si nih Tui Thang Nung sinah a zal a philhtakmi cu a pek i,  zaangfahnakte in tiah thuamthil a tahning a hal. Tui Thang Nung nih laikeng (kilang/ lizard), a muici – a nak, a hring le vutcam rongdeng – kha a hmuhsak. Cu kilang muici cu ‘Conlo – Ceuelia*’ ti a si.

Tui Thang Nung nih Nung Me Si cu, kilang a dang, muici – a lu a senmi le a hngawng aihre rong –  a hmuhsak i, “Cawngnak – Ccungnah  ti a si.

Pitar Nung Me Si nih Conlo le Cawngnak puan tah cu a thiam hna.

Cawngnak puan le Conlo puan cu Zotung peng ah an rak lar ngaingai i,  a hnu ah, Lautu, Miram (Mara), Hakha, Thantlang, Falam ti bantuk tiang an va phaan. Nihin ah cun, vawleicung hmun tampi ah an phaan cang.

Tui Thang Nung nih Tho Khe ttahhla a lawhnak hla cu, nihin tiang in Zotung peng ah an  ummi nih an thiam ko rih; mithi tahhla lawhnak ah a hmangmi an rak um rih.

Calettu Hmurkaa: Conlo & Cawngnak Puan Thawhkehnak Tuanbia hi Chin Diasapora Mekazin (2010) i Mirang holh i tialmi capar kha vun lehmi a si. Global Chin News Media Group le calettu nih dothlatnak tuahmi a si lo.

Cawngnak puan thawhkehnak kong he pehtlai in, R. W. Head nih an tialmi cauk chung kan zoh tikah Bungtuah khua i pakhat nu nih mang a manh i, a thaizing a thawh tikah, aa thawhpi chih i cu cun, aa thawk tiah Hakha upa nih an rak chimhmi an rak tialmi kan hmuh (Pu Stephen Ni Kio, Lai Nunphung Cauk, 2006, pp- 431) Pu Stephen Ni Kio nih Zotung kan unau pa, CCC, Hakha Saya Thawng Lut tialmi, a tanglei Pa Hmun capar he ai khat ngawtmi capar (Kawlca tialmi) kha, Lai Nunphung Cauk a chuahmi ah a lehpiak i, a khumhpiak thiamthiam.

Catialtu Pa Hmun (Siatlai) nih cauk chirhchan aa laakmi pawl:
1. Khua Le, Daw Ro Bawi (Chief of Sepi) and Sae Kaw, Tin Paw Bawi, audio recording, 1980 and a story written by Aung Myiang (U Tua Thung Sepi) based on interview with Khua Le and Sae Kaw.

2. Thawng Lut, Pastor, Siatlai, March, 2002, “Khikhia tho kei naw”, Ninzy Megazine, Hakha, Burma.

3. Major Cia Bik, 2007, “Thawitenh, Canlo, Cawngnak tah hmasa bik”, Zo Maeccaw, Zotung Baptist Church, Yangon

4. David Van Bik, Lai Forum Website, 2004, Cawngnak Chuak Hmasatnak5. Nung Nwe Ki (late), personal encounter with the author (Pa Hmun)

Hi vial hi an si. A tialningte in ka run langhter, a ca lehpiak loin –  Salai Biakkharkam.Chirhchan:1 Pu Stephen Ni Kio, Lai Nunphung Cauk (2006), pp – 431

2 Pa Hmun, Chin Diaspora Mekazin (2010), pp- 135
3 Pu Stephen Ni Kio, ibid, pp – 431, 432
4 Pa Hmun, ibid, pp – 136,137
Zotung auhmin.Globalchinnews.com

Be the first to comment

Leave a Reply

Your email address will not be published.


*