CNF kan hruaitu pawl ka uar khun hna nak a ruang tam lakah pakhat cu hi hi a si.

CNF le Dinfelnak:CNF kan hruaitu pawl ka uar khun hna nak a ruang tam lakah pakhat cu hi hi a si. Tlangcung mi hruaitu cu an ralkap thilri hriamnak cawknak caah heh tiah rithaisii an zuar ti a si. Biadang in kan chim asi ahcun, cu rithaisii in cun an paw an i cawm kan ti ko lai.

Cu Rithaisi (bing) nihcun zeidah a phi a chuahpi ti cu keimah chim hau lo in nan theih cia dih mi lawngte asi ko. Cu Ritnak sii nihcun hngakchia zong a hrawh hna i, a donghnak ahcun miphun ningpi tiang in a hrawh dih khawh hna.

An chim theu tawn “Karen, Ka Chin, Moon, Shan” tibantuk hngakchia hi an ram ah rithaisii a tamtuk tikah minung 100 ah 90 nak tam deuh hi cu, cu rithaisii an zuu or an tong dih ti a si. Minung pakhat nih a chim ka theih, “Ka hawi le Karen le KaChin pawl cu rithaisii an tong dih a ti, rithaisi (bing) an tongh tuk caah a caan ah cun ngong nawn pi in an um, mi tlamtling lo hna an lawh caan a um” a ti.

Vun ruat cio tuah hmanh uh? Zeitluk indah tih a nun? Tuchan ahcun, nihin Mino thaizing hruaitu ti si ti loin, nihin mino nihin hruaitu ti a si cang. Cucaah an mino hna hiti ningin rithaisii an tongh ko ahcun hmailei ah an miphun caah ruahchannak a um lo ti khawh a si. Cucu zeiruang ahdah a si? A ruang cu, an hruaitu pawl biatak ah an dir lo, dinfelnak an tanh lo, thilttha lo in tangka an kawl etc., caah a si.

Cu lakah kannih Chin miphun kan hruaitu pawl cu Pathian an i bochan, Pathian an tih, dinfelnak an tanh, mipi caah khua an ruat. Hihi tha tein ruat ahcun CNF pawl hi dawt lo awk le upat lo awk an tha hrimhrim lo. Rithaisii te hna hi CNF nih an hriamnak cawknak ah an tuah khawh tuk ve mi a si ko. Nain a ttha lo ti kha fiang tein an theih caah an tuah duh lonak a si.

Biadonghnak ah kan Bible nih a kan cawnpiakmi cu, “Miphun a lianngan tartu cu dinnak a si” a kan ti. Cucu a dik tuk ka ti. CNF pawl zong dinnak an i tlaih caah hi thil hi an tuah lo nak a si. Cucaah nang le kei Chin miphun zong Dinfelnak hi phaw bantuk in i hruk ko hna usih ti buin ka bia ka dongh tar. Ka lawm. By-Bawi Kam

Be the first to comment

Leave a Reply

Your email address will not be published.


*