CNA nih Kawl ralkap an kah cang awk a si.

Tulio Facebook ah tam bik ka hmuhmi caa le comment cu CNA nih Kawl ralkap hi an kah cang hna awk a si. An ralchia tuk. An kap ngam hna lo. Bawmh an phu lo, etc. ti pawl hi an si. Kan mawh lo, Kawlram a alh liopi a si tikah hlam an phu ko. Nain thukpi hun ruah awk cu um rih seh, a pavuan te ruah awk a ummi cu:

Ralkap thong 10 leng a ngeimi KIA tibantuk nih kum saupi an doh cang hna. An tei hna maw? Tei hlah. Tthathnemnak an hmu maw? Hmu hlah. An ram aa thleng maw? Thleng hlah. Sicun zeidah an hmuh kun? Mipi har an tong. Mithi an karh. Inn le lo a rawk. Rawl ttam tihal in an um. Ram tang ah an zaam. Tukum 2021 tiang ah zaam lawngte an rian ko rih.

CNA ralkap minung 500 te, hmanrua zeihuaha a ngei lomi, raltuk cinhnak hriamnam hmanh a ngei lo i thing meithal tein a cinhmi nih Kawl ralkap 500 000 leng a simi, bomb ttha ttha, raltuknak tank, vanlawng le helicopter he hriamnam tling a ngeimi hei doh khi cu arti in lung nganpi cheh bantuk a si. Mipi kan duhning in hei doh hna hmanh sehlaw, doh cu an doh ve lai nain tthathnemnak zeihmanh a chuak lai lo. Cucu kan innpa KIA le KNLA hna nih an doh i a phichuak an hmuhmi in hngalh khawh a si.

CNA nih an doh hna ahcun sakhan zei mawzat an lak ve ko lai, ralkap zei maw zat an thah ve ko hna lai. Nain Kawl ralkap ning pi in zeitik hmanh ah an tei hna lai lo. Thlennak zong a chuak fawn lai lo. Khua chung mipi tu ralkap nih an kan thah lai. Kan inn le lo an hrawh dih lai. Ram tang ah zaam ve kan hau lai. Theipar ttha le a chuak fawn lai lo. Kan miakmi cu tem-innak lawnglawng a si lai.

Cucaah CNA ralkap 500 te nih Kawl ralkap 500 000 leng a simi cu zeiti hmanh in an tei khawh lai lo caah tlangcung mi ralkap vialte hi an zapi in i fonh dih hna sehlaw, ralkap 100 000 leng an si lai. Ralkap 100 000 nih 500 000 tei cu, ralkap 500 te nih 500 000 tei nakin a let 100 in a fawi deuh tukmi a si. Atu lio i CNA pawl an daituk kan timi hna zong hi an tthu sawh lai i nuam ngai in lakphakti hna an ding salam lai ka zum lo. Tlangcungmi hriamtlai phu hna he meeting an ngeih lengmangmi zong hi biasawng an tlorh sawhsawh lai cu ka zum fawn lo. Raltuk ahcun mipi harnak kan tong lai a fiang ko. Cucaah mipi harnak ton i a phichuak fawn ttung lomi nakin mipi harnak ton i a phichuak bak vemi hi an i tinhmi si lai ka zumh. CNA thazaang hi lawlawse cu mipi kut ah tampi aa hngat. Cucaah bawmhnak lei ah thachia lo tein ttang ko rih hna usih.
Credit-Roro Fambawl

Be the first to comment

Leave a Reply

Your email address will not be published.


*