Chuahsemnak Ruun inn le Chumtual ah Nunu, le Hrinhniang an Tlei kho ti lo mu By Chavy (14 April 2021)

Chuahsemnak Ruun inn le Chumtual ah Nunu, le Hrinhniang an Tlei kho ti lo mu .By Chavy (14 April 2021)

Tleicia ka pu nih Sahngarpa tih in arpi farual an rak i biknak tuanbia a rak ka chimh bal mi ka hnatlam ah a vun cuang. A tawinak te’in ka vun tial hmanh lai.

Arpi farual an um. Sahngarpa nih seh awk ah a kawl lengmang hna. Sahngarpa nih seh lai an tih tuk. An pi bik nih a fa le cu ”ralca” cungah a riah pi tawn hna i bia a riah tawn hna. A riah mi hna a bia cu nan cawl tikah thiamthih te’in cawlh u. Cu lo ahcun kan ral sahngarpa nih kan riahnak a theih lai i kan zapi te’in a kan hlawm dih sual lai. Cun nan voih a chuah zawngah ”pit” ti’in voih lo’in ”siii. ..” ti’in, aw chuak lo ding te’in nan voih nan voih lai. Tangpi in nan voih nan i voih ahcun kan i thuhnak ”ralca” bel pi hi a kuai sual lai. Sahngarpa nih kan voih thawng hna a theih lai i a kan luh hnawh lai i a kan seh dih sual lai a ti hna. A fa le zong nih an nu chim mi bia cu an ngaih. Dai zirziar te’in ”ralca” chungah cun an um. Fimkhur te’in khua an sa. An voih hmanh an voih ngam lo. An taw sip thipthep te’in an um, tiah ka pu nih a rak ka chimh bal a peh ka tial than te lai.

Mah arpi farual tuanbia hi tuanbia sawhsawh hngakchia lung a lawmhtertu tuanbia, hngakchia thlimnak tuanbia sawhsawh asi rua ti’ah ka rak ruah. Nain duk ti’ah ka lungah a vun chuak. A tu kan sining he ka tachunh tikah ”arpi” farual bantuk in sahrang tih in tawsip in inn chungah kan i erh mi ka hmuh tikah arpi hna tuanbia kha a tak in pei kan ton hi ka ti. Arfi farual ca’ah zeitluk in dah a har lai timi ka rak ruat bal lo. Na’in a tuah sahrang rual tih in thawngpang hmanh ngei ngam lo’in inn chungah kan i erh tikah arpi hna ”tihphannak” kha – theih, fian le a tak in hmuh” khawh asi. Kaleymyo le Tamu ahcun leng a chuak ngam mi a ho hmanh mah lio ah kan um lo.

Vawlei cungah a har cemmi thil hi zeidah asi tiah ka hal hna sehlaw. “Tihnak” tiah fawite in, ruat cumcam lo’in ka leh hna hnga. Ruang lian, Germany, nih Elie Wisel, Jewish catial thiam pa nih Hitler chan lio ah hremnak a rak tuar mi kong ”night-zan” timi cauk a rak tial mi, laica te’in a rak leh mi kha ka mit thlam ah a cuang. Ka nungchungah a saubik mi ”zan” tiah catial cu nih a rak timi kha a si tak lai hi teh ka ti. A rak mawh hrimhrim lo. A rak ti awk te asi ka ti. A tu hnu ah hin ka lung a fiang. A sining, a temtuarnak taktak kaa hrawm khawh. A ruang cu a mah bantuk in kawl sahrang tih in lengah chuak ngam lo’in inn ah ka erh lio asi ve. A har ning ka ton. Ka theih taktak ve ca’ah asi.

Phungthluk ah ”nikhat harnak hi thlakhat chung nawmhnak nak in a caan a sau deuh” tiah a timi hi a dik hrinhran. Al awkte a um lo. Sahraang rual tih ruang i nikhat chung inn i, i erh hi a har hrinhran. A caan a sau hrinhran. Kumkhat tluk hlah maw asi tiah ka ruah.

Dide kan ngai. Inn pa innka khar thawng a than deuh zongah kan lau. Motor cycle thawng theih hmanh ah kan tih. Phone a rat ah kan mit au a phawk. Zeithawng chia dah kan theih lai kan ti. Kan thin kan i dawmh.

Tihnak nih mithin lung a khuai. Mitthli rialti bang a luanter. Sahngar, sahrang tih in ruun inn chumtual ah nu nau, hrinhniang, an tlei kho ti lo. A him deuhnak hmun kawl in an vak, an zam. India ram, mizo ram an bel. Sempuak cawi buin thingkua, lungkua bih in kan zaam mi hmuh tikah lung a fak hrinhran. Ngaih a chia hrinhran ko.

Freedom from Fear tihnak in luatnak timi hi luatnak taktak asi .Tamu, an i kah thaizing in ni 3 chung a ho hmanh leng ah kan chuah ngam lo lio i kaa thuhnak hmun ceprep lak in ka thinlung ah a chuak mi ka tial mi asi. Mah hihi hmailei ah tuanbia pakhat bantuk asi te lai.

Be the first to comment

Leave a Reply

Your email address will not be published.


*