Chinram lei ah Kai a Timmi SAC Ralkap pawl Kalay lei ah an Kir Than

Kalaymyo in Chinram lei ah kai a rak timmi SAC ralkap pawl cu Saetaw (Angteng) khuapawng ah Kalay mipi runvengtu ralkap (KRDF) nih an kah hna i Kalay lei tu ah an kir tthan, tiah kan theih.

Zaanlei sml. 5:30 hrawng in kahdohnak a chuak i sml. 7:30 hrawng ah SAC ralkap pawl cu Kalay lei ah an kir tthan hna.

KRDA lei in aa hliammi le a thimi an um lo. SAC lei a hliammi le a thimi an um le um lo theih a si rih lo. The Chin Journal May 3, Hakha (Zalen)

Bawipa Cu A Ṭha :Bawipa cu a ṭha, a fekmi a dawtnak cu zungzal in a hmun. (Salm 100:5)

Dawtnak hi a phun a tampi, Pathian nih minung a kan dawtnak minung le minung i dawtnak chim luaimai dingah cun a tampi. Chim cawk ding hmanh a si lo. Dawtnak ruangah thih ngamh in nunnak a pemi zong an tampi ve. Mi cheu nih cun ram le miphun an dawt caah an nunnak an pek. An hawikom caah an pek, an chungkhar caah an pek i a cheu nih cun an dawtmi hna nungak tlangval caah an nunnak an pek ve. Hi vialte hi dawtnak ruangah a rami an si dih.

A poi ngaingaimi pakhat cu minung cu a kan dawmi lawng va dawt kan hmang tawn, kan duhning in a ummi kha dawt i a um lomi dawt lo. Miding paoh dawt i misual paoh dawt khawh lo, a kan daw lomi paoh dawt lo i a kan dawmi paoh dawt ve kan hmang. Velhle dawt ko hi kan thiam kho tuk, chunglei in a rami dawtnak si loin lenglei in a rami hngawng cung dawtnak velhle kan thiam tuk hna.

Minung nih cun a kan daw lomi hna cu kan daw kho ve hna lo. Sihmanhsehlaw Pathian nih cun amah a dawmi hna lawng si loin amah a dawmi he daw lomi he ahopaoh a kan dawt, misual he sual lo he mi vialte a kan dawt. Cucaah mi vialte nih khamhnak kan hmuh khawh nakhnga Khrih cu kan caah a thi, a nunnak a pek. Zeicahtiah Pathian cu dawtnak a si (1Johan 4:8).

Pathian nih hin amah a dawmi hna lawng kha daw hna seh law Khrih kha vailam cungah a nunnak pek in a thih hau hnga lo. Bawipa Pathian cu a ṭha, Pathian cu dawtnak hrampi a si caah amah a daw he daw lo he mi vialte caah a nunnak a pek. Cucu dawtnak lakah a sunglawi bikmi dawtnak timi cu a si.

Pathian nih a kan dawtnak a langhterning cu hitihin a si: a Fapa ngeihchun kha vawlei ah hin a run thlah i amah thawngin nunnak kan ngei lai. Dawtnak cu, Pathian kan rak dawt hi a si lo, amah nih a kan dawt i kan sual ngaihthiamnak caah a Fapa kan sinah a run thlah hi a si (1Johan 4:9-10). Pathian cu dawtnak a si i dawtnak chungah a ummi paoh cu Pathian chungah a um i a chungah Pathian a ummi a si. Kannih nih Pathian kan dawt cu Pathian nih a kan dawt hmasa caah a si.

Mi zeimaw nih, “Pathian ka dawt,” a ti i a unau a huat ṭung ahcun, amah cu mi lihchim a si. Zeicahtiah a hmuhmi a unau hmanh a dawt khawh lo ahcun a hmuh lomi Pathian cu a daw kho lai lo. Cucaah Khrih nih a kan fialmi cu hihi a si: Pathian a dawmi nih cun nan unau kha nan dawt hrimhrim hna lai.(1Johan 4:20-21)

Bawipa cu a ṭha; a fekmi a dawtnak cu zungzal in a hmun, zumhawktlak a sinak cu chan vialte tiangin a hmun.Bawipa nih thluachuahnak in pe ko hna seh.
By-Salai K. Biak Lian Thawng Hamar, Norway

Be the first to comment

Leave a Reply

Your email address will not be published.


*