Chinmi nih Hi bantuk lungput hi ngei cio kan hau.Lunglawmh nak taktak

Canada ram Winnipeg ah khua a sami Pu Hmun Thang le Pi Mang Thai i an fanu Lg Van Cer Iang lungput hi uar um kho taktak. High School Grade 12 akai lio mi mino te asi. A mui aa dawh, aziaza ṭha, Pathian a ṭihzah i nu le pa bia lawng si loin Khrihfabu chimh a ngai tukmi asi.

A hohmanh nih fial lo tein Amah lungtho tein Mask a ṭhit le an sianginn ah ENSF (CNF) ca fund kawlnak caah a zuar le a hmuhmi $300 cu tuni ah ka sinah aka pek. Ka ruah lo tukin asi le lawmhnak chim zia hmanh ka thiam lo. Thlacam piak ta zong ka philh.

Hi bantuk in Miphun le ram dirhkamh ding rian aa fiannak hi Pathian asi. Lawmh um kho tuk. Bawipa nih a hmai lei nun lam ah mit hmuh khawhmi thluachuah siseh mit hmuh khawh lomi thluachuah siseh pe chin lengmang ko seh.Credit-Van Dawt Lian

Chanthar Mizo le Chinmi .Chin tuanbia thiamsang hna (historians) nih Chin le Mizo cu “miphun pakhat” kan si i, Kachin le Chin cu “unau” kan si tihi an kan chimh lengmang. Chin, Mizo le Kachin cu “chungkhar khat le phunkhat kan si” kan van ti ko lai. Mizoram cu dornak, zamnak, himnak le chawlehnak ah Laimi nih kan hmanmi zong si. Chinmi le CNF/A zeimawzet zong Mizoram ah kan um rih.

Tlawmpal theihtlei in van kir duak usihlaw – Mizo le Chinmi cu ramri in kan i-dan bang, kan holh zong ai dang. Mizo nih Chinmi hi an rak kan tthawl caan zong a rak um tawn. Cun, Mizo nih “khuachakmi, pawi, burma ho” tiah an rak auh. Vai nih “nepali” tiah India um lio cun an rak kan auh ve. Miphun dang deuh nih “burmese or myanmarese” tiah an kan auh. Vai le Mizo nih an kan auhning cu “nehsawhnak deuh” khi a rak si. Chin (Lai) in a kan theimi le aumi an tam lo ti ko usih. Nain, tuni bal ah “Chin” in an van kan theih ngai cang.

Chanthar Mizo le Chin pehtlaihnak hi a thawknak langhter har ngai kho men, nain kum 2006 in ka van thawk lai. A Voi 4nk Chin Evangelical Conference, Oct. 3-9, 2006, Hakha rak tuahnak ah Liandingpuii hi hlasa in an rak sawm ve (sermontu an rak sawmmi cu ka van philh). Liandingpuii hi gospel hlasa a rak lar saling bak si. Hakha ahcun a hla kha Lai holh in a rak sak (ka theih tawk ah a hmasa bik Mizo Lai holh in hlasa si). Cun, Liandingpuii le Daduhi hi kum 2012 USA an rak kal i, Chinmi tampi an rak hmuh hna. CBC-USA nih “Mizo chior” zong an rak sawm hna. Mizo hlasak thiam Spi nih “lungman sung” Lai hla in a rak sak i, gospel hlasa Bethsy nih Lai hla zong a sak. Cu hnuah, Vanlalsailova nih Lai hla zong a van sak ve. Mizo hlasak thiam le minthang a mak bikbik pathum thawngin Mizo nih Chinmi an kan hmuhning le ruahning cu an kan thlenpiak. A phichuak cu, kum 2021 ahcun Mizo hi Chinmi dirkamhtu le ttanhtu Federal India ah an van cang. Van chap khawhmi cu “India ralkap nih Mizoram a rak kah lioah, Chinram ah Mizo a rak kaimi le eidin hal in an rak um len ve i, kan rak bawmh in dirpi ve hna” tihi tar nih an ka chim tawn.

Chinmi nih Mizo hla kan leh i, Mizo zong nih Lai hla an leh ve cang. Tawinak cun kum zabu 21 hlan cu Mizo nih Chinmi hi – zei huaha ah an rak kan chia in ruat lem lo. Cu vialte tuanbia cu ai thleng cang. Mizo le Chin dawt le bawmhchanh hram ai thawk cuahmah. Kan hmailei kong cu tuanbia nih chim tthan te ko seh. Tuanbia le thilsining cu si thleng lengmangmi si tihi cinken ah a ttha. Note: mah vialte pumpak dairy van si rih seh. Ka lung chuak ka van thai duak..
Credit-Van Nun Lian

Be the first to comment

Leave a Reply

Your email address will not be published.


*