Chinmi nih cankarlak Cozah ser tikah legitimacy aneihmi NLD lawng kha hruaitu ah kan chiah hna ding asi loh.

Tlukruannak A Ummi Ramkhel Cozah Ser A herh.Nizan ah CRPH nih politics an hmuitinh statement an hun chuah. Lawmh aum ngai. Amah belte an biafang hmanmi sia arem lomi tete an um. Federal ramkomh kan ser lai an ti nain zeibantuk federal timi muisam an langhter loh. federal cu a phunphun aum i, nihin tlangcungmi nih kan duhmi federal cu 1947 panglong hnatlaknak kha asi, Abikin panglong hnathlaknak no,5 le 7 kha kan duh mi cu asi. Chimh duhmi cu CRPH an statement ahkhan 1947 panglong hnathlaknak no,5 le 7 bantuk in federal ramkomh kan ser lai ti hna sehlaw federal muisam kha alang lai i, tlangcungmi nih kan zumhnak hna hmual afak deuh ngai lai. Cun CRPH hruainak tangah interim government [can karlak cozah] ser ding an timi zong hi tlangcungmi hna an hun kan iap deuh ngaiin alang caah ramkhel tlukruannak /.political balance aum lo ngai in alang fawn.

Atulio kan herh bik mi cu ; a fiangmi politics hmuitinh kha asi i, cu tangah cun politics balance /ramkhel tlukruannak hmunkhat te ah kalpi khawh hi asi. Cucaah atulio caan ahhin CRPH nih afiangmi federal kha an langhter khawh aherh pinah intrime goverment zong hi politice balance aum mi in an kalpi khawh hi abiapi tuk. Hi hi CRPH nih atakin an kalpi lo asi ahcun thazaang tthawn aherh ningin atthawng khawh lailo i, ahnu ahcun Kawl rawn um le tlangcungmi hna kar ah imawtchiatnak le sual iphotnak hna aum khawh i, ‘ cutikah kan ral pawl ailawmhnak tu ah acang sual lai ti hi phang aum ngai.

CRPH nihhin legitimacy aneihmi kan si caah kanmah khuakhannak hi nan ngai dih ding asi tiphun in an kal sual asi ahcun ;an nawl neihnak hi Kawl rawn ahcun anung khawh men ko, sihmansehlaw tlangcungmi umnak ahcun anung dih lailoh. Ti hnar pakhat hmun 2 ah aluang mi bantuk khi alo lai. Cucaah tlangcungmi hna sin ahcun CRPH nihhin anmah iap mi intrime goverment hi ser loin, tlangcungmi hna nih kanmah duhmi intrime goverment kan ser lai i, cucu akan cohlanpiak khawh aherh. Tlangcungmi nih intrime govt kan ser tikah kanmah duhnak lawngin kal lo in legitimacy aneihmi CRPH kha kan upat ve hna lai. Afawinak in chim ahcun tlangcungmi nih kan ser mi intrime govt nihhin CRPH hmalaknak kha biatak tein adirpi ve lai i,hmunkhat te ah thazaang chuahttinak lam kha akalpi peng ve lai i, hmunkhat te ah kan khuakhanttinak Innpi cu unity goverment ah asi lai.

Politice balance kan timi hi Kawl le Chin karlak lawngah aum ding asi loh, Kan mah Chin chung hrimhrim zongah aum ve aherh

Cucaah Chinmi nih cankarlak Cozah ser tikah legitimacy aneihmi NLD lawng kha hruaitu ah kan chiah hna ding asi loh. Miphun Parties CNLD le adang dang hna political parties hna zong kha kan telh chih hna ahau. Cu lawng hmanh cu aza rih fawn loh. Biaknak lei pastor hna, zatlangbu hruaitu hna, bochanmi upa hna, atulio CDM hruaitu hna, Sianghngakchia bu hna titiang khin kan telh dih hna ahau. Mah hi hi political balance kan timi cu asi. Polical balance aum lo ahcun phu khat le phu khat ihmuhthiamlonak le iremlonak achuak ton i, cu nih cun miphunpi asi lo ah rampi thazaang kha ader ter ton. Kawl miphun karlak ah ram ka daw ai ti veve mi NLD le 88 sianghngakchia hna an iremlonak khi politice balance aum lo tiah 88 siang hngakchia pawl an lungfah caah asi. chimh duhmi cu ramkhel tlukruannak hi miphun dang le miphun dang karlak lawng ah aum mi asi loh, Miphun khat chung lila zongah aum vemi asi caah ralring ngaiin kalpi hi abiapi ngai mi asi.

Zei ava si zongah atulio kan miphun dirhmun ahhin zei parties hman nih khuhchilh /influen lomi political balance aum mi intrime govt kan dirh aherh. Hi kan dirhmi cankarlak Cozah nihhin ralkap uknak hrawh /2008 constitution hrawh le 1947 panglong hnatlaknak nun ter kha aahmaithlak lai, Akan uknakding phunghram hi aduh ahcun Chin acts asiloah, Chinhillregulation acts, asiloah Chinland constitution draft CNC tangah rak ttial mi hna kha aduhmi athim lai i, ahman lai. Chim duhmi cu uknak phunghram hi ttial chom ahau lem loh. Kan neih ciami aum i, cucu hman rihding asi ko. Abiapi mi tu cu CRPH nih kan ei khawhlo dingmi phunghram kha akan parh sual nak hnga lo iralring tu hi kan herh.

Saram cu  kan kah hlanah hna chol phah hmasa attha lo tiah kan pupa hna nih phung anrak thluk. Hihi adiknak zawnte aum khawh men ko. Asinain politics tu ahcun kan kah hlan ah hnachol phah hmasa aherh. Politics ahcun ankah hlan in hnachol aphah hmasa lo mi hna cu tupi chungah atlaumi bantuk an si.By– Van Neih Thang.

Be the first to comment

Leave a Reply

Your email address will not be published.


*