Chinmi kan lungput i remh deuh hna si.

Ramle miphun ca’h akan tuan piakmi hna cungah lawmh bia chimh thiam hi cawn pah kan hau. Lawmh bia chimh hi thluachuah hmuhnak zong asi. Cun zumtu asimi nih kan tuah awk zong asi.

Kum 2010 hlan ah kan ram zeitluk in dah achiat ticu nan theih ciomi asi.  USDP chan in kan ram duhsah in thlen hram an rak thawk. Tampi an tuah khawh lo zongah kan ram caah an tuahmi cungah lawmhpi ding an si.NLD chan in alet in an vun tuan chinchin tik ah i lawmh chinchin ding kan si. Kan chinram ah aum ballomi Airport hna an vun kan tuah piak. Electric mei kan herh tukmi zong chunzan hman khawh dingin an kan tuah piak. An rian tuannak kong tampi ka chim lai lo.

Dr. Sasa amah pumpak zuamnak thawngin kan Chinram ah zeitluk indah thil thatha a kan tuah piak cu nan mit hmuh asi. Afimthiamnak in international level in thiamnak le ruahnak angeimi pa sal tha asi.

Dr. Henry Van Thio cu Chinmi nih kan chunmang hmanh ah kan manh ballomi Vice President a kan tuan piak khawh. Hiti atuan khawh ruangah Chinram ah budget khuaruahhar tak in a kan tuah piak hi kan lungfim kho rua lo hi mu.

Pung Hung Ngai, Salai Lian Luai anmah le tikhawh tawk in kan Chinram caah an kan tuah piakmi hi ziah lawmh bia chimh tal cu kan thiam lo. Minung hi atlingmi kan um lo. hibantuk ca hi na thial hlan ah nangmah kha tha tein i check ta law atha lai. Miphun le ram cah zeidah na tuah khawhmi a um bal cang.

Nangle kei hi Mi ca cu chimlo nangle innchungkhar hmanh a hruai kholomi kan si lio ah, mi thangchiatnak lawnghi cu ruat ti hlah si. Chinmi thanchonak a phittu hna kan si sual lai.Hi bantuk lungput hicu zum lotu le zei  ruaram lomi hna nih an ruahmi le antuahmi rian asi.

MP achuh ding pawl zong nih, zeihmanh na tuah khawh rih hlan hi cu mi kongchia ceih cu kan ngol piak rih uh. Nang kha teinak hmanh na hmu te lai maw? Na policy kongtu kha tam deuh in chimh khawhtu rak kan zuam piak deuh  te uh. Mi kong na chim deuh nangmah kha minih na lungput an in theih deuh, na tla deuhdeuh ti kha rak i philh hlah uh law. Bawipa nih Chinmi kan caah thluachuahnak innkaa a kan on piak kaa lawng asi rih. Kan thluachuahnak lam apit sual lai zong hi khua tuaktan pah cang hna si.

Bawipa nih thimnak tluang tein kan hruai ko seh. Bawipa sin thlacamnak in kan miphun caah taang la cio hna si.Kan Miphun cah siaherhnak he.Credit– Moses T.Lian

Be the first to comment

Leave a Reply

Your email address will not be published.


*