Chin NLD nih 2008 kan remh kholai anti maw?

Nai ah Dr. TZT nih CNLD sinah biahalnak a tuahmi cu CNLD secretary Salai Ceu Bik Thawng nih tawifiang ngaiin a hun leh. Cu a ca lehmi cungah Canada ummi Asang(Zasang Cinzah) nih NLD dirkamh in a hun leh i a sawhter mi cu 2008 Phunghram remh longah ti le cucu NLD long nih a remh khawhlai ti phun in a kalter caah ka hmuhning ka tial ve.

Tulio Chin NLD nih an aupi bikmi cu 2008 Phunghram hi NLD longnih a remh khawh lai caah NLD hi vote uh law cu in cun Tlangcungmi kan duhmi Federal le Self-determination hi an kan “pek” lai ti asi. Hi zawn ahhin ruahding a ummi cu 2008 Phunghram remh hi asi. Hi Phunghram hi Kawl thingan+ralkap fonh in kum 10 leng an suaisam hnuah an chuahtermi asi. Phundang in chim ahcun Tlangcung mi pawl Kawl kuttang ah zungzal umding le an sualnak maimilhnak caah tuahmi Phunghram asi. .

Ahleiin ASSK ramhun si khawhnak khamtu Article 58/f zawn te kha an duhlo caah le ASSK an khammi asi kha NLD nih a hngalhtuk caah 2008 Phunghram nih a hrinmi 2010 thimnak kha luh/tello in nuarhnawh mi asi bik. Asinain NLD nih an bochan takmi Sihni U Ko Ni nih lam ahun hmuh tikah 2012 in NLD nih can karlak thimnak ah an lut. U Ko Ni tuaktan ning bang in 2015 ah ASSK cu Ramhun lucungah a hun thu kho taktak caah 2008 Phunghram kongah NLD nih cuhlan an aukhuan bang in an au lo i an remh taktak lo.

Aruang cu hi 2008 hi remh har taktak dingin sermi asi caah asi. Hiruang ahhin ASSK hmanh ramhun lucungah a chia khotu U Ko Ni nih “2008 Phunghram cu remh loin a hlonh in hlonh le a thar serthan a thadeuh” a rakti. ASSK hmanh cungcuang sinak lam a vit khotu U Ko Ni hmanh nih remh a hartuk ti a hngalh caah a thar tu serding a ti mi 2008 cu NLD nih thimnak a naih fatin kan remh lai ticu capo saih phunkhat he aa lo. Cu sinak ah 2008 Phunghram tangin Tlangcungmi kan duhmi Federal le Sefl-determination chuahter ding cu a har chinchin mi a lawh tikah tulio CNLD nih an kalpi mi policy khi a si kholo tiah an ti khi an mawhlo. Aruang cu ASSK cungcuang sinak dingah U Ko Ni nih a nunnak thapin a vihkhawh ko ahcun U ko Ni bantuk in hngalhnak le fimnak a ngeimi Tlangcungmi kan pa le nih Federal le Self-determination cu an vit kho ve hnga lomaw?

Kei cu an vihkhawh tiah ka ruah i kazumh, cucu CNLD President asimi U Ngai Sak nih a chim cang i Salai Ceu Bik Thawng zongnih a hun leh cang kha asi. Cu an chimmi cu Myanmar Parliamentary chung le Cozah sernak ah Check and balance tuah khawhnak lam a um i cucu kan tuahkhawh ahcun 2008 Phunghram khi remhdih le thlendih rihlo in kanmah Tlangcung mi nih kan duhmi lamthluan pi ah kalnak lam a awng kho ti asi. Curuang ahcun CNF/A telhin hriamtlai hna nih NCA lamthluan in an nor i tlangmi party nih Parliament chungin tiah an chimmi cu asi.

Taktak tiahcun Parliament chungah MP hmunhma tambik a ngeimi Kawl hnuzul ah Shan le Arakan ansi i hihna hmanh nih an mah tein parliament chungah an tikho lailo. Asinain Tlangcungmi vialte nih kanmah le miphun party kha kan state cioah teinak kan hmuhter hna ahcun a tlawmbik ah MP 207 chungah 170 cu kan co khawh lai. Kawl party a thawng bik minih 291 chungah 170 a teive ahcun “fonhbu Cozah/ Coalition government” dirhkhawh asi. Cucu Tlangmi hriamtlai bu hruaitu hna le ramkhel thiamsang hna nih Parliament chungin dohding an ti hnawhchan cu asi. Cucu CNLD zongnih aa hmaithlak mi cu asi.

Kachim cang bang NLD ansi ah USDP ansiah Tlangmi kan duhmi tuah an i tim taktak ballo, Cozah ser khawhnak ca longah kan MP thazang an i laknak ah Federal ee Self-determination ee Democracy ee tiah an au khi asi. Anduh taktak ahcun ziah 2008 Phunghram remh khawhnak lam a hmutu le ASSK cungcuang sinak a tuahpiak tu U Ko Ni an thah? An thahnak case tutiang an thianh lo? Ziah 2010 ah party register a tuah i thimnak ah a lut cangmi UDP hruaitu U Kyaw Myint an tlaih? Ziah 2015 -2019 tiang Phunghram remhnak kong le an ceih lo?

Cucahcun NLD nih 2008 kan remh lai ti cu hngakchia thlem in an kan thlem khi asi. Kanmah nih kan tuah i kan mah nih kan i zuam longah a phi a chuak khomi asi caah Kawl party ah i peih silo in Kawl party lakah tambik teitu asi mi le Federal kong le self-determination a duhmi he i kawm in Center Parliament ah chak merh khawhnak lam kha tulio CNLD telhin Tlangmi party pawl nih an kawl mi le an chimmi cu asi.
Credit-Peng Hlawnceu

Be the first to comment

Leave a Reply

Your email address will not be published.


*