Chin-NLD Cu Chin National Party Nan Ti Maw?

Nizaan nai October 19 ahkhan Chair NLD Daw Suu nih Online biaruahnak avoi 11nk a tuah mi ah NLD party cu miphun party a si lonak kong a chim. Cu pin ah NLD hi Union (pyidaungsu) party a sinak kong le Kawl party a si lonak kong a chim. Ai biatak ngai mi a lo. Ramchung ah Kawl kan tam bik ca ah kawl nih rampi huap in hmunhma kan ngeih ding a si awk hrim a si ti cu a chim ve.

Suimilam pakhat le cheu chung lecture a pek mi chungin ka hnak a ka do bik mi cu US ram le kan ram political parties cuai a thlai mi a si. “US ram khi zoh u, khoika ramkulh le khoi peng hmanh ah miphun hrambunh in thimnak ah mipi leemnak a um lo” a ti tlar ko. Hna a ngei ikpak nih cun a chim duh mi cu fian khawh dih a si ko. Kan ram hi Multiparty system nakin pyidaungsu party pahnih um i, miphun party pawl hlohthlau chunmang a man taktak ko rua. Ka lau ngai te. Hi lungput hi ram mi 68% Kawl miphun pi lungput a si taktak ko rua.

Cu karlak ah Ramthumnak lei in Salai pawl nih Chin-NLD cu Chin National Party a si tiah an hun chim ve. Lau awk ah ka rel ti lo. Khuaruah lei a tam. 2015 thimnak ah Chin mipi thinlung teitu kha Chin-NLD minung an si lo. Suu Kyi biathlum nih a tei hna a rak si deuh. 2008 Phunghram kan remh lai ti cu a thlum tuk fam cu teh. Zeiruang ah dah #miphun party status a phan mi nih ram an hruai chung ah kan miphun thisen thlornak vawlei Magwe ramtthen beuh an zoh sawh ne? Ziah eihmuar nak ah pakhatnak an tlaih ne? Ziah miphun party status a phan mi nih miphun hriamtlai le mipi kar ah hausang a chon kun? Biahalnak cauk chuah a phu hih!

Ram sersiam nak le ramrian ah mipi lungthin tei a hau bik lo. Thinlung tei ti mi cu Hlen khawh/zum lak in chimh le thildik taktak hmuhter lo a si. Mipi thinlung thlen a hau lo, thlaici tuh tu a herh deuh. Nihin kan mipi thinlung tei nan i timhnak tlangtar hi US ram he nan tahchunh ruang ah ttih a nung tak mi miphun, vawlei, holh/ca thlau nak lam a si. Sining ai khat lo.

US ram ah vunrang 76.3% an um khah. US Ramngeitu miphun tiah cazin telh khawh ding mi miphun pazeizat an um le ram an dirh ning cu kanmah nakin nan theih deuh. Kan mipi thinlung tei nan i timhnak lam hi miphun pi pakhat nih huap hrimhrim mi Political party pakhat or pahnih zulh in cu party tak cu miphun party tiah status nan hun pek huar ko cu khuaruah hi a tam kho taktak.

Ram dirhtu miphun kan si. Ai uah ngai kho ve mi miphun kan si. Cucu miphun dang kan huat nak lungput a si lo. Kan Identity kan humhak nak ca ah bianeem a um lo caan a um kho. Bianeem lo paoh zong an luar extreme hlei lo. Chin-NLD hi miphun party a si ahcun, nan miphun min cazin ah kan i tel ve lo.

Myanmar ramkomh ah Myanmar ti mi miphun thar a chuak cuahmah. Cu miphun chung ah cun majority phungthlur zawng vakok sen/hring pawl nih kan Chin mipi thinlung tei an i tim. Democracy le Development changreu ban in kan Chin pasal tthattha hna an rong aa thleng cuahmah. Cu tak cu, kan Identity ca ah zuamcawhnak nganbik a si nak a si.Hello, Chin miphun NLD cu Chin National Party nan ti maw? Credit-Salai Tial Hram Ling Yangon

Be the first to comment

Leave a Reply

Your email address will not be published.


*