Zeiruangah dah nu pawl hi zai an huam tuk? timi kan zoh hna lai.

 

Zeiruangah Nu Hi An Zai Peng?
Na duh na dawtmi na nupi asiloah na nungak nu kha zai a cak tukmi a si sual maw? A ruang um lo a ruang kawl in an zaihnawh tuk tawn maw? Kha hlan ah zai (Hran) a cak tukmi a rak si ah siseh, atu lioah zai a cak tukmi a si ah siseh, zai a cak tukmi pawng um cu zeitluk in dah a nuamh lo ti a theitu cu nangmah kha na si ko.

Zai a cak cangmi cu thil pakhatkhat an duhmi an ngah hlan lo an zai huam. Theih an duhmi an theih hlan lo zong an zai huam fawn. Cun a caan caan ah cun a ruang um lo a ruang kawl in umhar celh lo tukah a zaimi zong an um țhiamțhiam fawn hoi rih.

Zeiruangah dah nu pawl hi zai an huam tuk? timi kan zoh hna lai.

(1 ) A ka duh tuk ti an hngalh ruangah an zai.Nu a cheu khat zai an cah, an huam tukmi khi ka pa asiloah ka tlangval nih a ka duh tuk ti an hngalh ruangah an zai hramhram. Kan duhnak hna kha an hngalh i an duhnak kan zulhpiak pengmi hna kha an hngalh tuk i an zai peng. Bang loin ka zaihnawh peng zongah a donghnak ah cun a dai te ko lai, dai tein a ka umpiak te ko lai ti an hngalh ruangah an i zaiter peng. Zai a cak tuk tiah ka hro lai i a dai lai tiah va hro len lai ci luau. Na zai tam tuk tiah na hro ahcun daih cu chim hlah, a zual in a zual chin lai i nangmah tu lungrawk in na um lai.

(2 ) An duhning in thil a si lo tikah an zai.Nu a cheu khat cu thil an tuahmi kha an duhning in a si khawh lo tikah hehchat an zai. Bawmhchanh le tuahpi ko hmanh ah an duhning a si lo le an lungtlin lo ahcun an zai chinchin i a bawmtu cung lila ah khan zaihnawh an hmang. Zai a cak tukmi nu he um ți cu tlangval, mino caah cun lungdongh a fawi te i khuaruat huaha loin um le bang ahcun za seh ti i, hnulei chit a fawi temi a si.

(3 ) Zai an duh tuk ruangah an zai.Nu a cheu khat cu zai hrimhrim a duh i a huammi an um ve. Cucaah zai an huam tuk ruangah bang loin an zai tawn. Zeiruangah ka zai tiah an zainak a ruang chim ding a hngal bak lomi zong an um. Fiang tein chim ko ahcun an thathut celh lo tuk ruang zongah an zai. Cun umhar celh lo ruang zongah an zai fawn. A cheu khat nu cu umhar celh lo umharphen ah an zai rih fawn.

Nu cu lam an kal lio i an kepi an i chuih sual zongah an zai i an rawlțam zongah an zai huam fawn. Nu cu thinghnah a țilh an hmuh hmanh ah a zai huammi an um rih. Cun nu a cheu khat cu zai awk an hngalh lo zongah an zai.

(4 ) A leem hna ruangah an zai
Nu a cheu khat cu ngakchia an rak si lio tein zai a hmangmi an um. Cucu an i țhanpi i an hlonh khawh ti lo ruangah an tlangvalle he an um lio zongah an zai i an pasalle he an um zongah an zai țhiamțhiam. An duhnak zulh tuk tikah an lungthin kha ngakchia bantuk in an um țhan i ka zai lai, kai hnoh lai, ka hnohhnawh lai timi ruahnak an ngei i an zia pakhat bantuk ah a cang. Cun an duhmi an tlangvalle le an pasalle kha tei an duh hna i an cungah tei duhnak lungput an ngeih ruangah i zaiter hramhram a hmangmi an si fawn.

Zai a cak tukmi nu cu an upat pi tiang le an tarpi tiangin an zai peng ko lai. Cucaah cun zei bantuk kong i an zai hmanh ah atu bantuk in a zai ah hin pei duh a nun chinchin leh cu. A ka duh, a ka dawt tuk ruangah pei a ka hnohhnawh i a zainak a si ko cu ti i kan ruah khawh a si ahcun a țha tuk hnga i zeizong te a tlamtling dih ko lai.

Dinnak kha a cat lomi tiva bantukin luanter camcin ko u (Amos 5:24).Salai K. Biak Lian Thawng