Tuzing Captain Mama (CNA) a biachim cu tuksum asi, Global Chinland Club tlangaunak ah an hal i, a chimmi asi.

Tuzing Captain Mama (CNA) a biachim cu tuksum asi, Global Chinland Club tlangaunak ah an hal i, a chimmi asi. “Kalay lei in ralhrang mawtaw tamlak an rak kai lio i, mawtaw chungah a luh hnawhnak hna i a kah hnanak kong. Hakha khuachung i Timit hlei donh dingin an rak thlahmi riantuantu hna ဆောက်လုပ်ရေးရုံး (palik sakhan kamte) i an luh hnawh in, minung 11 an zapite in an tlaihdih hnanak kong, zunginn zong an va khanghnak kong”, a chimmi ka ngaih cu, ka khuasik sem a chuak. Movie hlah maw tiah a taktak in an tuahmi lanwgte asi. Cu tluk ralthat le pumpek ngam cu ka ti.

Hi kong hi ka theih bal cang nain, a mah hmurkate in ka theih hrimhrim cu lungdi a riam, amak hringhrang ko.

Naite i a kan liamtakmi Lt Lalrotlung (CNA bo 2) zong “Timit Operation le Hakha Khuachung cawlcanghnak” i a ralthat zia theih cio asi. A cawlcanghnak a hmurka tampi kan thei manhlo. A paamtuk ka ti. A hawikom le riantuanti hawi nih ni khatkhat ah an chim te lai.

Sala Paul (CDF-Thantlang) zong Thantlang khuachung i, innchung ah ralhrang pa thilri a fir cuahmahmi a luh hnawh in, hmaitonh in a fimtawl, a meithal a lak khawhmi te hna khuaruah har asi. Hakha CDF i paraltha Travis (sniper a thiam taktakmi) a kong te hna… an konglam chim awk tampi a um. Chimphuan awk a tha rihlomi zong tampi rih.

Sagaing/Magwe region lei ah PDF pawl a va bawm tawntu kan Chin ralkap hna an cawlcangnak te hna hi, Kawl pawl hrimhrim nih mikhamhtu heroes ah an hmuh hna i lamkip in pangpar he an donmi te hna zong theih ah, mit thli a ha.

Kan hnuzarh i Thantlang CB Bank chung i ralhrang pawl hriamtling he a ummi hna an hriamnam he an minung he an tlaih dih hna lio i, operation ah aa telmi kan ralkap hna zong an chim ahhin ngaih ngam hmanh asilo.

Hibantuk hin kan Chinland huap in mipi nih theihtuk lomi pasaltha nusaltha (unsung heroes) tam taktak an um. A nung liomi he nunnak a pe ciami he, nikhatkhat ah zapi theih in an tuanbia hi kan kherhhlai in kan chuahpi te lai. Kan miphun ningin Upatnak sang kan pek hna lai.

Hmailei ah kan dohthlennak tuanbia cauk ah khumh i, kan tefa nih sianginn tiangah cawn phu asi te lai. Holh phunphun in kan kan leh lai i, miphun dang zong nih thei ve te hna seh. Video (based on true events) zongin thlak phu an si.

Teinak an kan phakpi hrimhrim lai. Ka zumh hna, ka dirpi peng hna, upatnak ka pek hna. Tanpi chin ko hna usih.Crd.Ram Tinthei