Thla hnih chung kahdohnak ah Chin ramkulh hmunhma dang cio in CNF chungtel 10 le CDF 9 an nunnak a liam, CNDF ralkap pakhat cu Kalaymyo a phanh lioah SAC ralkap nih

Chin Ramkulh Thla Hnih Chung Kahdohnak Ah Chin Ralkap 20 Le Tualchung Mi 6 Nunnak Liam

2023 kum thawk lei ah fak ngaiin kahdoh a chuahnak Chin ramkulh ah January le February thla hnih chung ah Chin hriamtlai phu chungtel 20 an nunnak a liam pin ah SAC ralkap hriamngan kahnak ruang ah tualchung mi 6 an nunnak a liam tiah kan theih.

Thla hnih chung kahdohnak ah Chin ramkulh hmunhma dang cio in CNF chungtel 10 le CDF 9 an nunnak a liam, CNDF ralkap pakhat cu Kalaymyo a phanh lioah SAC ralkap nih tlaih in an thah tiah theih a si.

A luancia January thla chung ah SAC ralkap nih CNA/F headquarters cu vanlawng in bomb a thlakhnawh caah ralkap 5 an nunnak a liam. Thlahnih chung hmunkip ah Chin hriamtlai phu nunnak liammi chung in a tam bik nunnak a liam tan zong a si.

Thla hnih chung ah SAC ralkap hriamngan kahnak ruang ah Mindat peng ah tualchung mi 3 nunnak a liam pin ah kum 17 nu pakhat cu SAC ralkap nih tlaih in an thah tiah theih a si.

Vanlawng in bomb thlaknak an tuah ruang ah Mindat peng um tualchung mi 5 nih hliamhma an tuar. Matupi peng zong ah tualchung mi 2 cu SAC ralkap nih tlaih in an thah hna tiah tualchung media hna nih an langhter.

Thla hnih chung in February thla chung kahdohnak ah Thantlang palik sakhan laakpiak an tong. Cu sakhan laaknak ah hriamthil an laak khawhmi telh chih in hriamthil 50 leng le kuanfang tamlak kan laak khawh tiah tualchung hriamtlai phu nih an rak thanh.

SAC ralkap nih thla hnih chung ah van lei kahdohnak voi 90 leng an tuah. Kahdoh a fah thla hnih chung ah cun Chin ramkulh chung hrambunh SAC kuttang a ummi ralkap le palik minung 5 nih Chin hriamtlai phu sin ah an i ap tiah theih a si.The Chin Post