Thantlang kangh le hartong hmanthlak: cheukhat caah dollar million hmuhnak suikhor

NGO cu hartongmi an tam caan ah project tam deuh a um i phaisa petu donors tam deuh an kawl khawh. Sipuazi mit in ngaktah a zohtu caah ngaktah an karh a that bang in NGO tampi caah cun hartongmi ‘victims’ an karh kha customer tam deuh ngah bantuk a si ve i a rak tha ngai ve theu.

Salai Lian Bawi Thang (CHRO riantuantu hlun) nih a tial bang, CNF upa vialte cu NGO a ngeimi or NGO riantuantu an si dih hna. Cun, tulio CDF a hnu lei in a controltu 80% khi sipuazi NGO tam biknak Thailand hrawng sianginn dih in NGO ah riantuan cuahmah mi lawngte an si fawn. Annih hi Victoria Camp le Aizawl deuh ah an um, online in ‘kan tei dengmang cang, zubui mei can lawng ai duh cang, tih hlah u’ tiah a forh biktu an si. Ramdang um Laimi vialte nih nan thawhmi CDF phaisa vialte zong anmah pawl sin ah a lut hmasa tawn. A fawinak in cun tulio dohthlennak ah min langmi 90% cu rian pipa a tuan balmi an si lo, donation (bawmhnak phaisa) in paw cawmnak rian a tuanmi lawngte an si hna.

Thantlang a kanghmi hmanthlak le zaangfak ngai a simi hartongmi ralzam hmanthlak vialte khi anmah NGO caah cun mansung suikhor bantuk an si, ramdangmi donors sin bawmhnak phaisa an hal tikah a herh taktakmi tet-te tha bik an si hna. Atu hmanh khi Thantlang a kanghmi hmanthlak hmang in NGO tampi nih dollar million tampi an hmuh cang. CHRO hotu Salai Bawi Lian Mang zong nih ramdang donor sin in zahan bak kha dollar million tam ngai an hmuhnak kong a tialmi nan hmuh cio ko lai, bawmhnak phaisa an hmuhnak kong hi voidang an langhter balmi a si lo.

Chiangmai i dollar million man CNF kan pale nan inn, US California i dollar million man NGO+CNF upa inn, Hakha le Yangon i kyat billion man CNF upa nan inn tbk vialte khi zoh tikah a fimzermi caah cun dohthlennak timi kha pumpak phaisa hmuhnak sipuazi ah zoh dawh ngai in an mer khawh ko. Atu lio Victoria Camp le Aizawl in dohthlennak a tuahtu cheukhat zong nih Hakha ah innhmun tam ngai an rak cawk ve cang fawn.

Cucaah, tei awk a tha lomi kan ral kha ‘nan tei lai, tih hlah u, mizapi umnak khua chung zong ah thua chih ko u, a kanghmi inn zong kan sak than te ko lai’ tiin an kan forh tikah zumh colh awk an si lo, ‘zeidah an tinh’ timi thuk deuh in tuaktan lengmang a hau. Cheukhat caah cun kan mino nunnak a liammi le kan inn a kanghmi khi ramdang in phaisa tam deuh an hmuhnak lam tha a rak si timi philh lo a tha. Vawlei hi thuk deuh in zoh ahcun a rak fair lo tuk, ngaihchia khi asi tawn.Crd. Salai Lungthil Tum

Be the first to comment

Leave a Reply

Your email address will not be published.


*