SAC ralkap riahcaw phurtu leilawng bomb puahhnawh in kan doh i leilawng 2 a rawk,

Mindat- Kyaukhtu Lampi Ah SAC Ralkap Leilawng 2 Bomb Puahhnawh In Hrawhpiak An Tong Kyaukhtu in Mindat lei hoih in aa thawhmi SAC ralkap leilawng run cu March ni 16 ah padeta bomb lung 20 puahhnawh in kan doh hna tiah CDF-Mindat nih nihin March ni 19 ah a thanh.

March ni 16, zanlei suimilam 4:30PM ah Pakokku ṭatmah 101 in a chuakmi SAC ralkap riahcaw phur leilawng run 85 cu Kyaukhtu-Mindat lampi ah CDF-Mindat nih padeta bomb lung 20 puahhnawh in an doh hna caah leilawng 2 a rawk tiah CDF-Mindat in ṭuanvo ngeitu pakhat nih a chim.

SAC ralkap leilawng bomb puahhnawh an ton caah leilawng 2 a rawk ralkap a thimi an um le um lo fehter a si rihlo. Leilawng rawkmi pahnih cu March ni 18 zinglei ah suimilam 8:30PM ah Kyaukhtu lei ah an kirpi tiah theih a si.

“SAC ralkap riahcaw phurtu leilawng bomb puahhnawh in kan doh i leilawng 2 a rawk, ralkap a thimi an um le um lo fehter a si rih lo” tiah CDF-Mindat in ṭuanvo ngeitu pakhat nih a chim.

SAC ralkap leilawng run cu kahdoh a ton caah March ni 18 ah Kyaukhtu lei an kir cang, cucaah Mindat-Kyaukhtu lampi cu hman khawh a si cang tiah CDF-Mindat nih phungning tein cathanh a chuah.The Chin Post