Rev. Dr. Hkalam Samson cu thawngtha a chimmi le KIA upa a tonmi hna ruang ah taza an cuai

Kachin Baptist Covention (KBC) ah Chairman a rak tuanmi Rev. Dr. Hkalam Samson cu thawngtha a chimmi ruang ah le KIA upate a rak tonmi hna ruang ah SAC ralhrang nih sualphawtnak pohma pahnih in taza an cuai, tiah Myitkyina News Journal nih a tial.

Rev. Dr. Hkalam nih January 2022 ah khan KIO/KIA Chairman ‌a simi  General N’Ban La le General Gun Maw a ton hna, tiah SAC ralhrang Northern Command Center ah rian a tuanmi Major Thu Aung Zaw nih taza a cuai.

KIO/KIA ralbawi pahnih ton ruang ah Rev. Dr. Hkalam cu phungninglo bu he pehtlaihnak pohma No. 17 (a) in tazacuai a si.

Cun, Asia vawleithen chung Khrihfa mino tonnak hmun ah Rev. Dr. Hkalam nih “Khrih ah Vancung Pennak Dirh hna Usih!” timi thawngthabia a rak chim i, cu a chimmi thawngthabia chung ah cun Myanmar rampi limhaang chiatchuahtertu bia pawl an i tel, tiah Major Thu Aung Zaw nih taza a cuai chap.

Thawngtha a chimmi ruang ah cun Rev. Dr. Hkalam cu rampi limhaang chiatchuahnak pohmah No. 505 (a) in tazacuai chap a si.

January 13 ah khan Rev. Dr. Hkalam cu biaceih zung ah an chuahpi i, tazacuaitu (SAC) lei tehte pathum biahalnak an ngeih hna. SAC lei ah tehte a dirmi pathum lak ah pahnih hi khua uktu (GAD zung) lutlai an si hna i, a dang pakhat hi ralbawi a si.

Rev. Dr. Hkalam cu aralaimi January 23 ah biaceih zung ah chuahpi than ding in nicaan khiahpiak a si.

Kan hnu December 5, 2022 ah khan Rev. Dr. Hkalam cu Thailand ram ah sikhaan piah ding in kal a timh lio ah Mandalay Airport ah SAC ralhrang nih an rak tlaih.

chinjoirnal Source – Myitkyina News JournalTwitter မှာ ချင်းပြည်နယ်အတွင်း လူ့အခွင့်အရေးချိုးဖောက်မှုနှင့်သက်ဆိုင်သည့် သတင်းတိုများကို ချင်းဂျာနယ်က အင်္ဂလိပ်လို နေ့စဉ်တင်ပေးပါသည်။ Follow လုပ်ရန်အောက်ပါ Link ကိုနှိပ်ပေးပါ။ Twitter – https://twitter.com/thechinjournal/

Be the first to comment

Leave a Reply

Your email address will not be published.


*