Ramdang ummi, cathiam lo le a fim lem lo le carel bel lo pawl hi dai tein um hna seh law dothlennak lam zong a tluang deuh lai i biaknak lei le politics lei zongah kan lam a tluang deuh fawn lai.

Keicu mah ti hin ka ruah. Dothlennak kong i tlamtling lonak (thih lohnak) ah siseh, Laitlang i thiltthalo a chuak/a tlung zongah siseh, thlarau lei/biaknak lei i kan ttumchuk zong ah siseh, rawhralnak kan tonmi dang kong zongah siseh, mah vialte hi ramdang i a ummi,

a fim lem lomi le cathiam lo le carel bel lomi pawl le a ninghngal tukmi pawl le zeizong te a thei dih bantuk i comment pek a hmangmi le biachia hru chim a hmangmi, phaisa lawng a tho ttung i nawlneih a duh tukmi le a puarthau ngaimi pawl le mizei ah a rel lomi pawl le mi upatnak lungthin a nei lomi pawl le phaisa lawng a bochan tukmi pawl ruang ah a si ko tiah ka ruah. An biachim le an holhrel le an lungput ah Pathian thluachuah a um lo. Biachim zong an i sum lai lo. Bible nih a kan cawnpiakmi cu a chawva/a rumnak a bochanmi cu a tlu lai a ti. An phaisa thawhmi lawng an i bochan i theihmi le thiammi le relmi an nei fawn ttung lo. Mi uk le mi cung nawlneih le an duh tuk fawn lai. Laimi tamdeuh cu phaisa (dollar) muihmu bel lo kan si ruangah mu.

Mah hna pawl facebook i an au lengmang chung poah le Laimi cungah nawlneih an duh tuk i an nawl kan zulh hna chung poah cu lungpang cungah kan tla lengmang ko lai. Zeihmanh a tlamtling lai lo. Ral zong an do bel lai lo nan raldoh a thiam tuk bantuk in mi an chimh lai/an forh hna lai/ruahnak an pek hna lai/an mawhchiat hna lai. Politics kong le biaknak kong zongah capar pakhat le cauk pakhat zong an rel lai lo nan a thei dih bantuk in hehtiah an chim an tial lai i comment an pek len lai. Biachiakha chim lawng kha an thiam ko lai.

An phaisa thawhmi lawng kha biapi bik ah an ruah lai i mah lungput cun hehtiah an awn au lai. Sunghzatlak nak lawngte an chuahpi ko lai. Aruang cu an theih taktakmi le an thiam taktak mi a um lo. An thinlung put an biachim ah Pathian thluachuah a um ti lo. Ramchung um, cathiam le mifim deuh zong nih an phaisa thawhmi ruangah an nawl an ngaih hna lai i a hnu ahcun tluknak le rawhralnak le sunghnak lawngte a chuak ko lai.

Ramdang ummi, cathiam lo le a fim lem lo le carel bel lo pawl hi dai tein um hna seh law dothlennak lam zong a tluang deuh lai i biaknak lei le politics lei zongah kan lam a tluang deuh fawn lai. Phaisa lawng kha tho ko hna seh. Mah kha a za ko ka ti. Mah kha an ti khawh tawk cu a si ko.

A dang cu i thlak ti hna hlah seh. Ca a cawngmi le a theimi le a fimmi le a thiammi le hmuhtonnak a neimi le hruaitu nih chim hna seh law khuakhang hna seh law rianttuan ko hna seh. Cathiam lo le theih hngalhnak a nei lomi le a fim lem lomi biachim le nawl hi ngaih ding a si ti lo. Sungh zatlaknak men lawng an chuahpi peng ko lai. Phaisa lawng a bochan i a hrut ngaimi cu Abigail pasal, Nabal bantuk an si ko lai (1 Samuel 25:23-27).Crd.Van Tum