Phaisa hi a tlau lo Meithal tuahnak ah an hmang ko Meithal tu puh/ kuat a ngah lo ca tu ah a si ti kha fiang tein an kan chimh.

CBC USA CDF Supportting Committee Conference I Ka Hmuh Ton Mi

Nizan April 14, 2023 Indianapolis ah 9:00AM – 4:00PM tiang CBC USA CDF Supporting Committee Chairman Rev. Dr. Rollin Van Bik le CBC USA CDF SC Committee hruainak in tuah mi Conference ah ka kai kho ve i cu i ka hmuh ton mi le ka theih mi bia le hla le thil um tu ning hi kan Laimi hawi hna sinah theih awk a tha ve tiah ka ruah caah ka theih tawk le keimah ka fian tawk a toi fiannak tein rak langhter ka duh.

Nizan Conference hi sawmnak an ka tuah ve lio ah an ka chimh mi cu innka khar khumh in tuah mi a si lai caah aa tel ding mi hna cu CBC USA, CBC USA CDF SC, Vauruang, Chinland Club le Pengtlang CDF vialte an si lai tiah ka theih i cu hna pawl cu a ra kho mi an si tak ko tiah ka hmuh ning a si, minung ka rel hna i a lut chuak teet an um pah caah upa lawng tein 51 tiang cu ka rel khawh mi an si. Cucaah mah i ka hmuh ton mi hi zahan ah mipi hmuh in tial awk a tha hnga ma? tiah ka ruah ngai nain Innka khar khumh in an kan auh mi a si ko nain a zei khawm a si ah kan Laimi hawi nih an theih ve lo cun mah tluk thil a biapi mi hi nizan Conference aa tel kho mi lawng nih kan theih cu a pam tukah ka ruah i ka rak langhternak a si. Tu lio ah online le Media ah a thawng a thang ngai mi CBC USA CDF SC nih $ 12 Million an hmuh khawh mi le EU i $5 Million kong a si.

US in Meithal kuat ding kong Meithal tuahnak Company he 3.5 Million man Meithal le Kuan tuah piak ding a cheu Deposit ah pek in a tang mi cu duhsah pek cun Camp Victoria Camp ah thlak a si tik ah a dihlak pek ding in Contract an tuah. A tu hi Meithal cu an siam dih cang nain phorh in thlak ding a si cang caah US Cazoh singah phorhnak ding delivery tuahnak ding ca an la kho lo. Cucaah US law rian ah a si. US in Kawlram ah Meithal kuat khawh a si lo tiah Mirang sihni pa nih a kan fiang.

Phaisa hi a tlau lo Meithal tuahnak ah an hmang ko Meithal tu puh/ kuat a ngah lo ca tu ah a si ti kha fiang tein an kan chimh. Meithal kuat khawh a si lo ah cun Phiasa cu kan sung dih lai maw ti biahalnak zong a um i Meithal hi Ukaraine ah zuar khawh a si lai kan mah nih kan cah zat in an herh tiah an kan chim caah Phaisa hi hmuhthan nak lam a um ko tiah ruah khawh a si. Cucaah hi thil kongah hin keimah ka hmuh ning le kaa fian ningah cun CDF SC an palhnak le an daithlan ah ka ruat lo Company he tha tein contract an thut mi a si caah Company palh deuh ah ka hei ruat ko. CDF SC nih mipi sinah an kan chimh mi hi an kan hlen bia si lo in thil a cang mi le thil si ning chim awk a tha mi chung in an kan chimh mi a si ti ruat ah a tha bik lai.

Vanlawng in Meithal Camp ah kan thlak lai an ti i an thla kho lo ti bia hna a um caah an mah si lo in Company nih an chimh mi hna tu an kan chimh chin mi ah ruat thiam hna u si law a tha tuk hnga.

Mirang pahnih sawm mi hna. Hi Conference ah an sawm mi hna mirang expert tak mi minung pahnih le an hawi le pahnih zong an i tel ve. An min tu cu ka rak langhter lai lo pakhat cu US Navy SEALs ah kum sau pi a tuan mi le mirum thil ti kho ngai mi pa a si. Pakhat pa zong cu US Cozah Sihni kum 20 leng a tuan mi pa a si i thil ti kho ngai mi le mi mak tak a si fawn. Cu hna zong nih an chimh mi cu US in Kawlram Meithal kuat ding hi a si khawh lo nak an kan chimh i aa fiang chin chin.

Pakhat pa lebang hi cu hi bantuk dothlennak ah hin a mah lo ngai ngai in cun a tlamtling ton lo in a donghnak ah a mah pa hi an fuh panh dih tiah pakhat nih nih cun a chim. Hi hna pahnih hi CBC USA CDF SC hruainak in Laitlang tiang an tlung i CNA Camp tiang zong a phanh cang mi an si nak kong zong an mah nih an kan chimh.

Cu lawng si lo in dothlennak caah hriam zalhnak le ralhrang kan thei khawhnak dingah lamtampi in a phun phun in a kan tuak tan piak mi le an planning pawl an kan chimh mi tampi a um. Cucaah nizan Conference ah aa tel mi kan thinlung ah a cam dih rua lai tiah ka ruah mi cu tu lio Laimi nih kan herh bak mi โ€œthe right personโ€ pei CDF SC nih in an kan pehtlaih piak hna hi ti hi a si. An cawlcanghnak an tuak tannak tampi an kan chimh i lawmh a um ngai ngai.

$5 Million kong EU i $5 Million kong hi a tlau cang a rak kir ti lai lo tiah bia le hla tete a um ngai. Hi kong hi an kan fianhter mi chung in kaa fiang ningah cun EU $5 Million hi Bank ah a um ko ti a si. Kan hnu zarh kha Thailand ah $ Thawng 20 leng kan thial chun in a lut ko aa thial khawh ko ti a si. Hriamnak cawknak caah kuat mi a si i Meithal zong Zun 250 le Drone hna zong cawk ding kan hmuh bak ah CBC TB nih CDF SC cu Reform tuah a si lai tiah biachah a si caah Phaisa kan hmang ngam ti lo i cawk lo in kan um ti a si.

Cun $5 Million in hriamnak cawk khawhnak dingah timhtuahnak an ngeih mi cu Montenegro ram West Peninsula Holding min bunh in small business on i cu ka in cun foi zang deuh in hriamnak kan cawk kan zalh khawh lai i Camp Victoria ah kuat khawhnak lam an kan timhtuah piak mi zong an a cung lei i ka langhter mirang pa pakhat nih a kan chimh fian mi ruah tikah EU $5 Million zong hi a tlau lo hriam cawk khawhnak dingah a phun2 in an kan tawlrel piak ko ti hi kaa fiang mi a si. Mirang pa nih a chim mi cu Meithal cawknak hi Online hi Amazon/Ebay hna i thil kan cah kan order mi bantukin foi zang tuk in ruat hlah u law ti a chim.

Cucaah CDF SC pawl riantuantu hna hi an cawlcang kho bak an ti tha bak ko ti hi ruah hmuh piak kho hna u si law ti hi ka sia a herh ngai ngai. Meithal cawk le hi bantukin cu zapi lakah chim le meeting chungah chim awk a tha lo mi thill tampi a um mi a si caah nan kan chim lo nan kan theih ter lo ti zong hi a caan a si rih lo caah a si ti ruat kho hna u si law cu a va tha tuk hnga.
CBC USA CDF SC kong Nizan biaruahnak chungah ka hmuh mi le ka theih mi zeidah a si hnga ti ruah lo awk a tha lo mi cu Rev. Ngun Awi nih a chim mi chung in ka fiang tawk ah CBC USA nih CDF SC dirh a si i hruaitu nan kan thim kan hruai u nan kan ti i heh tiah khual kan tlawng manh lo ngai in $12 Million project kan au pi i a hmuh zong kan hmu tak tak.

A si nain nai CBC BT Meetingah CDF SC hna cu zei sualnak zong hmuh lo in a zi zut phun in zumh lo nan kan ngeih i reform kan tuah lai nan timi hi cu thil mak ngai a si ko kum 80 chungah ka hmuh tonnak voi khatnak a si caah tuanbia ah a cang ko lai tiah a chim mi le CDF SC hruaitu Charman Rev.Dr. Rollin Van Bik kan rian a dih cang CBC BT nih $ cazin check lai a tha nan ti ning in rian cu a thar in kal pi a si te lai tiah a chim mi nih a lauter tuk.

Hi tluk in kan thei lo kar ah khua za a ruat i ken kip ah kan ral tei khawhnak lam tampi in re a kan thei piaktu hna hi mah ti rumro zumh lo le thangchiat thlanglamh kan hman mi hi a poi hringhran ah ka ruah. A luan cia kum 8 hrawngah Rev. Zam Mang he Chicago ah bia kan i ruah lo ah a ka timi ka philh kho lo. Rev. Dr. Rollin Van Bik te pawl hi cu zei lei paoh in tluk awk an tha lo, zeiruangah kan tiah cun hringtu nu le a pa Rev.Dr. Van Bik nih an tap pi an lungthu le an coka ah Pathian bia le nun tha in an cawk piak mi hna an si caah tluk awk an tha lo tiah a ka chimh mi ka thin lungah a cam peng.

Cucaah SDF SC hruaitu Rev. Dr. Rollin Van Bik nih a hruai mi hi cu a ding fel ko lai ti hi bia le hla ka thei bak ah ka thinlungah hmunhma a lak cawlh, nizan ah biafiang tampi ka thei chih tikah cun minung hi kan mah kan fel ti lo ah cun midang hi mifel ah hmuh a har ngai ton ti zong thinlung ah a chuak.

CDF SC Reform kong CBC USA BT nih CDF SC Reform kan tuah lai i minung 9 kan thim hna lai i a min zong Chinland dirkamh tu tiah kan sak lai timi bia le hla a leng pah. Cucu a biapi ngai mi thil ah ka ruah. Min le biafang hi a biapi tuk sulawm thawng tuk in a ngei mi a si. Tu lio Laimi thinlung a la i a hip mi (influence) a tuah mi cu CDF hi a si tiah kei nih cu ka hmu. CBC USA nih hin CDF Supporting ti hna hlah sehlaw $12 Million hmuh khawh dingah mipi thinlung a la kho men lai loh tiah ka hmuh ning a si. Cucaah CBC USA nih reform tuah an timh i a pakhatnak ah hruaitu an thlen hna ah cun thil pi pa kan nganh ning a fak tuk men lai tiah ka ruah. hi tlung in timhlamhnak le mirang mi mak tak te hriamnak Camp Victoria tiang thla kho ding planning vialte le US cozah Innka king ding an kal pi mi vialte hi kan sung sual lai ti hi ruah awk a um.

A pahnihnak ah CDF SC min hi an thlen ah cun mipi thinlung influence a tuah kho lo mi min hna si cun phaisa khawlh kan i harh tuk sual lai tiah mah pahnih hi ruah awk aum ngai caah CBC USA BT hna nih an duh mi si lo in a herh mi le a hlawt deuh ding a tlamtling deuh in kan ruah piakte kho hna sehlaw ti zong ruah lo awk a tha lo.

CNA/F le CDF kong Nizan Conference chung bia le hla ka fian ningah cun CNA hi tha kan pek dih a si nain a tu dothlennak hi CNA lawng in a si kho lo CDF vialte he kan do ti a hau. CNA ah i fonh dih hna sehlaw a tha tiah a chim mi pakhat cu a um nain a ho hmanh nih an i hrawm khawh lo in ka hmuh cucaah CNA/CDF le ramleng mipi vialte he hmunkhat ah ralhrang hi kan doh ti hna lawngah kan thawng lai ti hi kaa fian ning a si. Cucaah uknak tha lo dohnak caah kan dihlak kan i bawm kan tuanti a hau hi uknak tha lo hi tu tan ah kan tei lo ah cun hi zat minung a kan thah i thilri Inn le lo a kan hrawh piaktu hi a tu tan do thlennak ah kan tei lo cun zeitik hmanh ah kan tei ti lai lo timi lungput kan dihlak in ralhrang kan doh ti hna lai.

$12 Million zong a za rih lai lo tampi a herh rih lai hi nak fak deuh dirhmun zong an kan doh kho phaisa nak in a thawng deuh mi thinlung le lungput thawng he kan doh ah cun $ zong chuah chin a hau i dothlennak a tuah mi hriamtlai vialte zong a ho ho an si hmanhah SAC ralkap a do tu cu bawmtu hawi kawm ah i ruah hna u sih. AA tiang hmanhah kan rak aa khat caah hawi kawm ah i ser kho hna u si law cu lo cun khat lei ah SAC ralhrang khat lei ah AA an si cun kan himnak a tlawm cucaah SAC a do mi vialte hi i daw in hawi kawm ah kan i ruah dih awk a si tibia le hla ka hmuh thei mi chung in chingchiah awk a tha ngai ngai.

A donghnak bikah hi kong hi a phun a zai mi tampi um khawh a si ko cu hna zong cu mawtchiat dih awk a si lem lo. A si awk zong a si ko mah belte Hriamnam kong a si caah a thli tein tawlrel a hau mi a si ti kha van ruah khawh i a tu thil a cang mi le nizan minung 50 hrawng sinah mirang hna nih an kan fianh mi le CDF SC hna nih an kan fianh hnu ah hin cu lung dam deuh in vun um kho hna sehlaw mawtchiah le thangchiat zong um ti hla sehlaw fiang deuh theih duh ah cun an mah riantuan tu hna sinah hal cun a tha hnga ma tiin khan ka bia ka donghter.

A cung i ka tial mi hi keimah ka hmuh ning le theih ning in tial mi a si. A hman bak a si bak ka ti nak a si lo. Nizan hi meeting si lo in thil fianternak le Conference a si caah keimah kaa fiang ning le ka feeling in tial mi a si. Kan theih ning bia aa khat ko zongah kan feeling aa khat cio lo kho men ko caah a mah aa fiang ning a si ti rak ka ruah piak te u law.
Van B. Lian

Be the first to comment

Leave a Reply

Your email address will not be published.


*