Kalay in Chin ramkulh, Falam peng lei ah a kaimi SAC ralkap leilawng run cu atu le atu kah an ton caah ralkap 21 an thih pin ah an leilawng pakhat a rawk,

Kalay Le Falam Kar Ah SAC Ralkap Kahdoh An Ton Caah 21 An Thi.Kalay in Chin ramkulh, Falam peng lei ah a kaimi SAC ralkap leilawng run cu atu le atu kah an ton caah ralkap 21 an thih pin ah an leilawng pakhat a rawk, tiah Chin National Organization (CNO) sin in theih a si.

March ni 12 lioah Falam peng Valung khua lonh ah a ummi SAC ralkap hna cu CNDF nih an hmanhmi bomb in an rak puahhnawh hna caah ralkap 1 a thi i, hliamhma pumi an rak tam, tiah theih a si.

March ni 14 ah SAC ralkap pawl cu Zawnglei khua lonh ah bomb in puahhnawh an ton ṭhan caah ralkap 4 an thih leng ah leilawng pakhat a rawk dih. Cu ni zanlei suimilam 5:00PM hrawng ah Zawnglei khua le Htinsu(Farkung) sakhan kar ah kahdohnak minutes 45 chung a chuak ṭhan i SAC ralkap 8 an thi ṭhan, tiah theih a si.

March ni 17 zanlei suimilam 4:45PM le zan suimilam 7:00Pm hrawng ah Parte khua pawng ah kahdohnak a chuak ṭhan i SAC ralkap 3 an thi, hliamhma pumi zong an um, tiah theih a si.

March ni 18 zanlei ah SAC ralkap pawl cu Parte khua lonh ah atu le atu kah an ton caah ralkap 5 an thi. March 19 ah Conghe le Zamual khua kar ah bomb lung 7 in kahdoh an ton ṭhan caah a thimi le aa hliammi zat kan thei lo, tiah CNO nih an langhter.

Cu kahdohnak ah CNA, CNDF le CDF-Hualngoram hna i bawm in kan kah hna i, meithal kuan 170, kutcheh bomb, lamh bomb, Enaga bomb le zen-kuan kan chuh hna. Kanmah lei in a thimi le aa hliammi kan um lo, tiah CNO nih an langhter.