Ka kawi, ruah lo piin na ruak hmanthlak ka hmuh ee

Ka kawi, ruah lo piin na ruak hmanthlak ka hmuh ee. Na Fb profile ah ‘Salai Lungthlitum vote pe u’ timi na tar rih ko si. Na dam lo kong zong naka chim tung lo ka dua. Agra i phaisa loin kan riah kha, ticket loin Delhi metro naka citpi tawn kha ka mitthlam an cuang than.

Nangmah lei in pek awk chawva na ngei lo nain keimah ca ah sian lomi na ngei lo. Kalay tiang naka don i naka thlah than, Yangon tiang voikhat naka thlah rih. Mithawng na si lo nain keimah ca ah cun tihnak lungthin a ngei bal lomi ka hawikom tha bik na si. Na nun chung ah kei ka nun man a ngeihter deuhtu na si caah kai lawm mu, ka kawi.

Atu na liam hnu cun kan hlam tuk caan a tampi te lai. Thlahnih thum dan ah ‘Kawi, Hakha ka phan hih, pocket money raka kua ta’ timi cakuat zong ka dong ti lai lo. Hiti pocket money naka hal caan ah kan zai hnawh pah tawn ko nain ka lungchung tein cun naka bochan caah kai lawm tuk tawn si, kawi.

Naka bochan tluk in zeihmanh kan tuah piak manh lo ee, na ruak humnak ah a dihmi tu hi kei nih tuanvo ka rak lak mu. Na tantakmi na fale zong ka si khawh tawk zohkhenh khawh ka rak i zuam lai. Mangtha kun law, kawi aw.

Na thlarau hi vawlei ah a um rih ko ahcun Yangon ka umnak ah khan raka leng ta ko mu. Paceu zong kha tuzaan rak hnemh ta te law, zahan Fanthen nan kalti a si i a tuar tuk lai kha.Crd.Salai Lungthli Tum

Be the first to comment

Leave a Reply

Your email address will not be published.


*