Feb 24.2023 ZINGKA PATHIAN BIA KA SIN A RA MI.Lian Ngan Bik BAWIPA nih, thil pakhatkhat kongah bia a kan pek a kan kamh ahcun, zeitluk indah kan i lawmh awk a si mu!
Gen 15:1 ah, BAWIPA nih Abraham sinah, “Abraham, na thinphang hlah, keimah BAWIPA hi na Phaw le na Laksawng Ngan taktak pi cu ka si,” tiah, a ti! (I AM thy Shield, and thy Exceeding Great Reward).
Vanchiat taktakah, Abraham nih, BAWIPA Bia cu a hngal thiam lo! Phundang cun, BAWIPA nak in thildang kha biapi deuhah a rak ruah sual! BAWIPA nih, “Tefa tampi kan pek lai,” a rak timi lawng kha ruat kaw; Abraham nih, “Fa ka ngei lo, fa na ka pe lo,” tiah, a rak leh diam!
Hika hin, BAWIPA nih, tefa tampi na ngeih dingmi cu na Laksawng/ Thluachuah Ngan taktak pi a si a ti lo i, AMAH, BAWIPA PATHIAN tu kha, na Laksawng Ngan taktak pi cu ka si a rak ti mi kha a si. BAWIPA Bia cu Abram nih a rak tlolh caah, Abraham fa ngeih caan kha a tlaiter phahnak kha a si!
Bible kan zoh tikah, BAWIPA PATHIAN nih a kawh i Thluachuah Bia a kamhmi hna hi, Thluachuah a pe hmasat colh tawn hna lo. BAWIPA hi a Ngan Bik Cem le a Pakhatnak a si zia kha a hngalhter, a cawnpiak hmasat tawn hna! Cun, a kamhmi Thuachuah hna kha a pek tawn hna!
Chin Miphun kan Thluachuah Ngan Bik hi Ral tei a si hmasa lai lo i Thluachuah a phunphun hmuh zong a si hmasat lo hih! Chin Miphun i kan Laksawng Ngan Bik Cem, kan Thluachuah Ngan Bik Cem cu, AMAH, BAWIPA hi a si! Hi hi kan hngalhthiam paohah cun, chikhatte ah, an kamhmi na hmuh lai i an kan kamhmi vialte kha kan hmuh colh ko hna lai.
Tuzing thla ka cam cu, PATHIAN nih a rak ka phuanter cangmi kha, ‘duk’ tiah, a hun ka hngalhter țhan i kaa lawm ngaingai!Cucu, “BAWIPA cu kan Phaw Himnak le kan Ral Teinak a si cang,” tiah, a rak ka phuanter mi kha a hun ka hngalhter țhan!
Gen 15:1 nak i Abraham sin i a chim bantuk kha a si zong a ka hngalhter fawn! Ka lau pah! Nain, Abraham bantukin ka tlolh lo! Cucaah, BAWIPA nih kan ral a kan Tei piak caan a nai cang ti kha ka hngalh! Biatak nan hngalh lai i Biatak nih an luatter hna lai (Johan 8:32). BAWIPA Bia cu Biatak a si (Salm 33:4).
Rak ngai u, rak thei u, zeidang zeidang hna hi kan Ral Teinak ding a rak si lo! Chin mi a rak kan kawl i a kan thimtu; BAWIPA kan PATHIAN tu hi, kan Phaw Himnak le Ral a kan Tei piaktu taktak cu a si lai hih!
Tefa (Vei) ngeih lo kong ka chim lo hih! Isak le tefa tampi si loin, BAWIPA tu hi kan Phaw le kan Laksawng Ngan Bik Cem, kan Ral Teinak cu a si! Tefa ngeih ding cu kamh bakmi a si caah, Abraham nih tefa a ngeih hrimhrim te ko lai. Asinain, Isak le tefa tampi si loin, BAWIPA tu kha a Ngan Bik le a Pakhatnak a si hmasat awk a si.
BAWIPA PATHIAN nih, “KEIMAH BAWIPA hi, Chin miphun nan Phaw Himnak le nan Thluachuah Ngan Bik Cem cu ka si,” tiah a kan ti hih!
BAWIPA PATHIAN nih, “KEIMAH BAWIPA hi, nan Phaw Himnak le nan Ral Teinak ka si cang,” tiah, a kan ti nolh hih!!!
Feb 23 zan deilei ah, mang pahnih le Feb 24 zingkate ah Bia phun hnih pek ka si i kaa lawm ngaingai ko!
BAWIPA kan PATHIAN hi kan Phaw Himnak le kan Thluachuah Ngan Bik Cem, kan Laksawng Ngan Bik Cem a si zia le kan Ral Teinak; Ral a kan Teipiaktu a si zia cu kan hmuh hna lai!
BAWIPA bak nih, “Abraham PATHIAN, Isak PATHIAN le Jakob PATHIAN ka si,” tiah, AMIN aa chaalnak, “AMIN” in a kan Huhphenh le Ral a kan Teipiak le Miphun Thluachuah a kan pek kha kan hmuh lai.
Cun, Biakam thar i AMIN, “PA le FAPA le THIANG THLARAU in,” zeitindah, thlarau lei Thluachuah a kan pek le a Pennak rian caah a rak kan thim ti zong kha kan hmuh hna lai!
FAPA KHRIH thawngin, PATHIAN kan PA nih THIANG THLARAU tampi in a kan toih tikah cun, kum 20 renglo, a rak kan phurhtermi ka/kan phurrit vialte an lo dih cang lai! Kan Ngaihchiatnak mitthli hna cu lunglawmnak mitthli ah an cang lai i, BAWIPA cu kan dawt bik le a loin kan um khawh lomi kan PATHIAN, kan i duh bikmi le kan i uan bikmi a si cang lai!
Cucaah, Maw Lai mi, maw Chin miphun, BAWIPA na PATHIAN hi na Phaw Himnak le na Laksawng Ngan Bik le na Thluachuah Ngan Bik le Ral an Tei piaktu a si kha hngal tuah!KHRIH sal-lamkaltu
Tluang Lian (Martar)
Leave a Reply