CBCUSA CDF Supporting Committee Kong

Hi kong cu a herh ahcun a dang tein ka rak tial chap te lai. Kan lungtling lomi a um ve len ko. Sihmanhsehlaw thil timi cu kap khat lei lawng zoh i zalong duhpoah tuk in chimrel ding a si lo. Lungtlinlonak lei kap in a chimmi le a tialmi an tam tuk cang caah kap khat lei deuh in ka rak tial ve lai.

A.Tinhmi le duhmi cu tlamtling seh tiah committee nih an izuam tuk ve ko bu ah lungduh in tlam a tlin khawh lo ruang i lungfim upa pipi nih a hleihluat tukin pakhat le pakhat mawhchiat le soisel cu a si awk a si lo. Thil timi cu Pathian dah ti locun kan tuahmi thil ah tlam a tling hrimhrim lai timi hi aamahkhan awk a tha lo. Kanmah cio zong si u si law zei hleipi kan si lai lo. An i zuam ko bu in tlam a tling lo hnu zongah hleng lo tein tlam a tling lo nak kong a kan chimhmi lungput tu hi upat awk a tlak.

Atu ah CDF Supporting Committee nih tawlrelmi thil hi tlamtling sehlaw rethei taktak in a tuanmi nak in thazaang kan chuah ve i kanmah thawngin tlam a tling ti phun in credit lak ai timmi kan tam deuh rih lai. Cucu a pical lo tukmi cheukhat hruaitu lungput a si.

B.Chin miphun tuanbia ah a um bal lomi 12 million renglo a kan hmuhpiak hi mangbangza khuaruahhar a si. Lungduh cun thil a kal kho lo nain hi committee an retheihnak hi kan dohthlennak caah hmual ngei in san a tlai tuk. A chung thil sining a fiangmi nih cun theih cio a si ko.

C.Khualtlawnnak ah sing 2 hlei an dih tiah vantawng in thil a hngal setlomi nih soisel phun in kan aukhuang. 12 Million renglo phaisa hi a tom in van in a tlami a si lo. Kan bochan hna i retheih kan khinhmi hna committee chungtel kan nu le kan pa hna nih chungkhar le khrihfabu, mah pumpak rian tampi kaltak in kum pi kum 1 renglo rethei taktak in khua kip le state kip ah an ra i toidor le zangfah nawl bu in a kan hmuhpiakmi chaw an si. Khuaruat huaha lo le thil fiang hngal loin chimrel in kan i ralrin deuh a hau.

D. Hi kong hi kanmah Hakha-Thantlang vial lawngin a dihmi thil a si lo caah social midea tbk ah bia chim holhrel le ca tar hi kan i ralrin hrimhrim a herh. Chin miphun lakah CBCUSA cu bochan bik le upatmi a si caah a danglei kan unau hna nih nehsawh ding phun in kan i phorzar lo dinh cu a biapi tuk. Kanmah ruahning in a ruat lomi pawl an lung diriam sual lai. Lungfim upa deuh nih cun โ€œKan izuam tuk ko bu ah kan lungduh bantuk in tlam a tling kho dih loโ€ timi tiang kan chim a za ko.

E. Phaisa vialte a vaivuan dih ti phun in kan chimmi zong a hman dih lo. Tuanvo pekmi nih an tawlrel cuahmah lio a si ko caah chimrel nak in tam deuh in thla kan cam deuh awk a si.

F. Kan saduhthah a tlin lo ko bu ah CDF Supporting Committee nan cungah kan i lawm. Chin miphun nih kan herhbik lio caan ah lungthin dihlak le sining dihlak in re na kan theihpiakmi cungah upatnak nganpi kan pek hna.Crd.
Danny Bawibikthawng

Be the first to comment

Leave a Reply

Your email address will not be published.


*