2010 ah Paletwa peng Watma khua ah missionary in ka rak um.

BAWIPA NIH SUNPARNAK CO KO SEH .2010 ah Paletwa peng Watma khua ah missionary in ka rak um. Zumtu tlawn te lawng an rak si. Ka umnak inn pawngte ah Khrihfa si lo mi chungkhar an um i an fanu te Nge Nge Tan cu Church School a rak kai lengmang.

Ka inn ah hin a rak lut chuak lengmang. Cu ka fanu te cu 2018 kum ah Khrihfa a lut i Baibal sianginn kai a duh caah Thantlang a rak phan. Bawipa sinah zumh ngamnak bak in kanmah chungkhar nih kan in zoh lai kan ti. Harnak le tlamtlin lonak tampi lakah Bawipa vel thawng in atu cu lunglawmhnak ni kan phan. Nge Nge kan i lawm tuk.

2011 in Kanpalet peng Macoah khua Missionary ka ttuan tthan. Cu ka ttuannak khua in ka fapa kai bochan bakmi Kee Hung nih tuchun ah B.Th degree a kan lakpiak hoi. Kan rian ttuannak chung in fanu fapa ttha ttha an hun chuahmi hmuh tikah lunglawmhnak mitthli a luang. Zeizong vialte cungah Bawipa nih sunparnak co ko seh.Crd.Sui Lian Kam