Chief Minister thimnak kongah

President nih CM hi amah party chungin thim hi aduh bikmi asi ko lai nain amah party lei in Pyine Hluttaw seat hmumi pakhat hmanh an um lo sual ahcun hodah apek lai? Mah zawnhi abiapi ngai i interesting ngai zong asi fawn. Pakhatnak ah, Pyine Hluttaw seat vialte tlangcung party nih ahmuh dih cun President nih aduh zong duh lo zongah tlangcung party chungin minung pakhat athim hau. Hi zawn ahhin, Party hnatlaknak tel loin aduhmi pakhat athim khawh bantukin party chungah unity le loyalty aum ahcun party nih an duhmi pakhat an chuahpi khawh ve.

Minung sining ah, Chief Minister si an duh cio lai caah party in ipheu in President duhning in cawlcangh khawh asi ve. 2015 thimnak ah Arakan National Party in teinak zong ahmu i party senior leader zong asimi U Aye Tha Aung zong kha a party asimi ANP theihter lo le hnatlaknak um loin Amyotha Hluttaw Deputy Speaker hmun an rak pek i a cohlan ko khah.

Asinain, Shan National League for Democracy (SNLD) zong seat tampi hmumi ansi caah hmunhma an rak pek hna nain party nih an cohlan lo aruang cu an duhmi hmunhma asi lo anti – negotiation an tuahmi tlamtling lo tinak. Pahnihnak ah, tlangcung party policy cohlan duh lo le pakhat khat ruangah maw President nih tlangcung party chungin CM pek aduh lo ahcun Pyine Hluttaw in teinak hmumi independent Pyine Hluttaw zong apek khawh thiam thiam. Mah hi cu politicians hna nih an an i celh ding mi asi te hnga.

Acung langhter mi hna hi asi kho dingmi kong asi (2015 ah Rakhine le Shan nih an rak ton cangmi asi caah), nain politics ahcun asi kho lo dingmi aum ve lo anti theu. Ataktak ah asi awk asi dingmi cu seat tambik ahmumi party (Pyine, Amyotha, Pyithu dih lak fonh in) kha Pyine cozah sernak nawl pek ding khi asi aruang cu mipi thimfung in arak kai mi ansi. Cu caah, democracy le federalism dirpi duh tak ahcun President le a party nih mipi thimfung a upat awk asi tiah ka ruah. ‘2008 Phunghram remh hmasa hnu lawngah’ timi bia le ruahnak hi adik lo taktak mi asi tiah ka ruah fawn. Ralkap hnatlaknak um loin Phunghram remh khawh asi lo zia ka von langhter cang ko khah.

Tlangcung milu cu tlawmte kan si caah Pyidaungsu level ah cawlcangh ahar rih, Pyine level tu ahhin thawn khawh izuam hau mah cu 2008 Phunghram nih apekmi chungin aupi mi federalism khel khawh asi ve ko. Phunghram remh lo zong in tuah khawhmi tamtuk aum nain an tuah lo (Phunghram remnak committee nih an chuahpi mi khan alang ko). Adonghnak ah, 2020 thimnak ahcun kanmah tlangcung miphun hruaimi hi thawng hram hna seh law cozah ser khawhnak dirhmun zong phan hram ko hna seh timi saduhthahnak he tutan ka tlangter ka donghter rih lai.topic dangah kan lut than te lai.Credit-Salai Tluang Lian Hnin (15 Oct 2020, Yangon)

Be the first to comment

Leave a Reply

Your email address will not be published.


*