Caankarlak Myanmar Cozah (NUG) nih Ralkap Bu Thar Dirh a Timh

Tlangcungmi hriamtlai hna he ceihmainak ngeih lio a si ko nain Myanmar mipi runvennak ca ah ralkap bu dirh ding in timhtuahnak kan ngei, tiah caankarlak Myanmar cozah “National Unity Government” (NUG) nih nihin April 16 ah an tuahmi Press Conference ah an langhter.

NUG runvennak vuanci U Yi Mon nih, “Mipi runvengtu ralkap bu ah Federal Democracy a dirpitu mino pawl an i tel lai. Tlangcungmi hriamtlai hna he ttang tti in mipi runvennak an tuah lai. Federal Army timi ralkap bu a chuah hlah ah Federal Alliance timi bu zong a chuak hmasa kho,” tiah a chim.

“Federal Army dirh kho ding in ramkhel lei hnatlak kong pawl tlangcungmi hriamtlai hna he kan i ceih lio a si. Atu kan ser dingmi mipi runvengtu ralkap bu zong hi Federal Army tang ah a um dingmi ralkap bu pakhat a si ko,” tiah a chim chap.

Nihin April 16 ah CRPH nih caan karlak Myanmar cozah (NUG) an dirhnak kong thawng an thanh hnu suimilam tlawmpal ah Press Conference an tuah colh i, mipi runvengtu ralkap bu dirhnak kong zong U Yi Mon nih a hun langhter hi a si.

Nihin ah caan karlak Myanmar cozah thar tlamtling tein an dirh khawh caah Yangon ah cun zaan sml. 7:30 hnu ah mizapi nih minute 3 chung zapei benghnak an ngei hna.
By-The Chin Journal April 16, Yangon
Hmanthlak: April 16 ah tlamtling tein an dirhmi caan karlak Myanmar cozah (NUG) Cabinet chungtel pawl.

Aibur Khuami 3 an Tlaih hna Hnu ah Ralkap nih Aibur Khuami pawl Zenthong an Apter Hna.Thantlang peng, Aibur khuami minung pathum ralkap nih an tlaih hna i, an phone chung ah zenthong hmanthlak an hmuh caah Aibur khuami pawl cu ralkap nih zenthong an apter hna, tiah thawng kan theih.

Aibur khuami Duh Hu Thang le Tin Maung cu April 9 ah Thantlang in Hakha lei an rat lio ah Hakha khualuhnak checkpoint ah an tlaih hna.

Cun, motor mong a simi Sang Maung zong April zarh khatnak ah ralkap nih an rak tlaih. Zei ruang ah an tlaih timi theih a si lo.

An tlaihmi minung pathum lak ah minung pakhat i a phone chung ah zenthong hmanthlak pawl an hmuh caah cu zenthong pawl cu ap ding in ralkap nih Aibur khua upa an fial hna.

Cucaah, nihin April 15 ah Aibur khua pastor pakhat telh in minung pathum nih Thantlang penguk zung ah cu zenthong pawl cu an vung ap.

Aibur khua upa pakhat nih, “An tlaihmi minung pakhat phone chung ah zenthong hmanthlak an hmuh caah zenthong rak ap uh tiah khua lei ah phone a rak kan chawnh. Nihin ah Pastor pakhat telh in minung pathum nih cu zenthong pawl cu Thantlang penguk zung ah an vung ap,” tiah The Chin Journal ah a chim.

Khuami nih cun zei zenthong hmanh kan i chiah lo, mah zenthong pawl hi khoika an cawk ti zong kan thei lo, tiah ralkap sin ah Aibur upate nih an chim.

Zenthong apnak ah Hakha Runtlang ralbawi Col. Zaw Min Tun zong Thantlang ah a kal ve, tiah kan theih. By-The Chin Journal April 15, HakhaHmanthlak: March 9, Hakha khauchung ah ralkap an i chawnh lio.

Be the first to comment

Leave a Reply

Your email address will not be published.


*