Caan Hnihnak Chin Ramkulh Hluttaw Meeting Voi 24 An Tuah Chung Ah CM Salai Lian Luai Voi 12 A Bau

Caan hnihnak Chin Ramkulh Hluttaw meeting voi 24 an tuah chung ah Chief Minister Salai Lian Luai cu a ruang tampi ruang ah voi 12 meeting ah a bau i, voi khat hmanh a bau lomi hi CNLD party in Matupi Peng Ramkulh Hluttaw No.1 mee hmun in Salai Aung Lian lawng a si tiah Hluttaw cazin ning ah kan hmuh.

Caan hnihnak Chin Ramkulh tuahkel meeting voi 24 tiang an tuah chung ah voi khat hmanh a bau lomi hi Salai Aung Lian le voi khat te lawng a bau mi NLD party Matupi Peng Ramkulh Hluttaw No.2 mee hmun in Minister Pu Vui kaw an si tiah theih a si.

Hi kong he pehtlai in Chin Ramkulh Hluttaw rianngei pakhat nih, “A bau mi hna hi cheukhat cu ngandam lonak ruang ah a baumi an um. Cun, a cheu cu Cozah rian a tuan liomi an si ca ah an rian a tam caan a um. An baunak kong zong meeting a kai mi Hluttaw palai dihlak sin ah lungtlinnak laak in khunh pek an si ko,” tiah The Hakha Post ah a chim.

Tuahkel meeting a voi 24nak tiang an tuah chung ah Mindat Peng, Ramkulh Hluttaw No.2 in Pu Tik Thang hi meeting voi 11 a bau ve. Meeting a bau mi hna hi Mindat Peng Ramkulh Hluttaw No.1 in Pu Aung Tan voi 9, Hakha Peng Ramkulh Hluttaw No.1 in Pu Zo Bawi voi 6, Thantlang Peng Ramkulh Hluttaw No.1 in Pu Van Thawng voi 5, Matupi Peng Ramkulh Hluttaw No.2 in Pu Vui Kaw voi 1, Paletwa Peng Ramkulh Hluttaw No.1 in Pu Kan Tin voi 4, Paletwa Peng Ramkulh Hluttaw No.2 in Pu Pyi Min voi 4, Kanpetlet Peng Ramkulh Hluttaw No. 2 le No.1 in Pu Phwe Arr voi 3, Pu Kui Thang voi 10,  Thantlang Peng Ramkulh Hluttaw No.1 in Dr. Hmuh Thang voi 4, Hakha Peng in Pu Sui Thio voi 4, Falam Peng in Pu Ral Hnin voi 3, Tedim Peng in Pu Suan Do Cin voi 5 le Pu Thang Din Khup voi 5, Tonzang Peng in Pu Pau Lun Min Thang voi 7 le Pu Thawng Khu Mang voi 5 hna an si tiah kan theih.

Caan hnihnak Chin Ramkulh Hluttaw Palai hi an dihlak ralkap telh in an dihlak minung 24 an si. Ralkap lei meeting an bau le bau lo kong he pehtlai in pehtlaihnak kan tuah hna nain kan tuah kho lo. Credit-The HaKha Post

Be the first to comment

Leave a Reply

Your email address will not be published.


*