Breaking news .Thantlang peng Aibur khua pa cu Hakha a tlawn nak ah zu a ri i mi sin ah CNA ralbawi ka si ti in tlawng a khawn len an ti

Breaking news .Thantlang peng Aibur khua pa cu Hakha a tlawn nak ah zu a ri i mi sin ah CNA ralbawi ka si ti in tlawng a khawn len an ti, cucaah palik ralkap sin ah an report i an tlaih cawlh ti a si, rungtlang ah an kalpi i an hren tuk caah an khua Aibur kong vialte ralkap a chim dih hna ti a si.

Kan khua ah meithal zun 70 le 80 hrawng a um, senthong hi india ram lei ah $6000 $7000 man hrawng kan i cawk cia, mino cheukhat ral tuk training kan kai ter hna ti bantuk a chim dih caah a tu hi Aibur khua cu ralkap nih nan meithal vialte Thantlang lei nan up dih lo cun nan khua hi mei holh le vutcam ah kan cang ter dih lai an ti hna ti a si.

Cu lawng hmanh si loin Lai Tlang khuate kip hi Kan zumh ti hna lo, mah Aibur khua bantuk hi an si dih ko lai an ti caah Laitlang ahcun palik le ralkap an hrang taktak cang lai ti a si.Credit-Liana Liana

Ralțha Tein Dir Law Teinak Na Hmuh Lai. Caan hi nunnak a si. Caan um loin minung kan nunnak aa sersiam kho lo. Na nunnak kha man ngei i na chiah ahcun caan zong kha man ngei ah na chiah ve lai.

Caan na ngeih lio ah na miphun ca ruat loin, (Ka miphun caah zeidah ka tuah khawh lai i, zeidah thil țha ka tuah khawh lai?  ti ruat loin) miphun dang tu kha zeitindah an lung ka lawmhter hna lai i an lung ka tluanh khawh hna lai, zeitindah kan karlak ah daihnak tu ka ser khawh lai ti lawng a ruatmi na si chung paoh an sal na si. Kei cu an sal ka si, an duhnak paoh ah ka chaak in an ka mer khawhmi ka si ti kha nangmah tein i hngal zungzal ko.

Kei cu minung ah hin ca aa hruhpimi hna le minung hawi, a miphun hawi cungah dawtnak le zawnruahnak aa hruhpimi hna khi ka uar bik hna. Lungthin a ngeimi an si ka ti.

Asinain hruaitu si le nawlngeihnak lawng aa hruhpimi hna le miphun dang a țih tuk hna i miphun dang aa bochan tukmi le miphun dang an duhnak le an chimmi paoh al ngam loin a zul i an duhnak paoh zulh a tim i dai tein ai umtermi hna khi ka huat bikmi hna an si. Zeicahtiah lungthin ruahnak a ngei lomi an si ka ti.

Mifim nih cun midang an palhnak ah fimnak le hngalhnak an i laak. Sihmanhsehlaw mihrut nih cun anmah nih an palh le anmah pumpak cung i a tlun tik lawngah hngalhnak le lungfimnak an ngei. Asinain cu nakin a hrut deuhmi (Hruh chinchap ah molh aa chapmi kan ti hnga maw? ) nih cun midang an palhnak kha fimnak, hngalhnak le lungfimnak ah i laak cu chim lo anmah nih an palh bak komi hmanh ah ka palh an ti duh lo. An palhnak an i hmu kho lo i ka tuahsernak hi a hmaan tiah an dirpi peng. Mah miphun nakin miphun dang kha dirkamh peng an i tim i, thiam an coter peng hna.

Minung cu kan minung hawi nih aungbali an poh ahcun kan poh khawh ve timi ruahnak kan ngei hna. Asinain kan minung hawi vanchiatnak an ton “Mawṭaw nih a pah hna” ahcun kei zong mawṭaw nih a ka pah khawh ve i vanchiatnak ka tong kho ve, ka thi kho ve timi ruahnak tu cu kan ngei kho ti lo.

Caan cu nunnak a si. Nang kum 25 na si i kei kum 42 ka si. Cucu caan chungah a ummi a si. Caan um loin minung kan nunnak zong hi a um kho lo i sersiam khawh zong a si lo. Cucaah na nunnak kha man ngei i na ruah ahcun caan zong man ngei ah na ruah ve hau. Zeicahtiah caan cu man a si. A caan um lio i kan tuah lo ahcun caan a liam hnuah cun a dih cang.

Ka nolh rih lai, ca aa hruhpimi hna le dawtnak aa hruhpimi hna hi ka uar bikmi hna le ka duh bikmi hna cu an si. Zeicahtiah lungthin a ngeimi an si ka ti. Sihmanhsehlaw hruaitu si le nawlngeihnak lawng aa hruhpi i a miphun ca le an harsatnak hmanh ruat țung loin miphun dang duhnak lawng a zoh i a zulmi hna khi ka huat bikmi an si ve hoi. Zeicahtiah cu hna cu lungthin a ngei lomi an si.

Cucaah i ralring ko, zeibantuk a si hmanh ah i ralring ko. Zeicahtiah ralrin paoh cu a ṭha. Ralrin cu a sual, a hlei ti a um lo. Caan țha na ngeih lio ah hin ralțha tein na miphun caah țuan. Miphun dang lunglawmhter le an lungtluanhter lawng i tim len ti hlah. Caan țha na ngeih lio ah na miphun caah na dir i na țuan a si ahcun teinak na hmuh ko lai. Ralțha tein dir law teinak na hmuh lai.

Dinnak kha a cat lomi tiva bantukin luanter camcin ko u (Amos 5:24).Salai K. Biak Lian Thawng

Be the first to comment

Leave a Reply

Your email address will not be published.


*