Biden policy hi a ṭhami kan ti lioah Trump policy cu a dikmi si.

Donald J. Trump hi a personality nakin a policy a biapi deuh.Laimi nih American ramkhel kan buaipimi hi santlai lo, tuah khawhmi kan ngeih bang timi ruahnak hi a pingmi ruahnak si.Ai fiangmi cu Trump hi Khrihfa a si. Khrihfa hmanh ah RC a si lo. A pumpâk nuncan le ziazia cu nanmah le kanmah cio bang a kih-lum chel, a hrulhhrâm chel a si ve ko lai.

Biden bang chungkhar dawtmile thih ruang men ah Pathian um-um-lo ah a lunghringmi a si ve lo.Vawlei Khrihfa nih Trump sinah leiba kan ngei  Israel khuapi Jerusalem caah thla a cam zungzalmi kan si. Khrihfa policy a ngeih caah Israel khuapi a ṭhial ngam, vawlei a hninh.

A Khrihfa policy nih tawkâhur  zalonnak a doh. Khrihfa a policy nih zawng-ngau ṭhitumh a doh. Zawng le ngau hmanh an i um ballo. Trump ṭanhtu nih cun a lang khomi a tuahsernak le chimrelnak in kan ṭanh.

Biden ṭanhtu Lai mifimthiam pawl nih hin khuazei biathli ṭha deuh khi dah an theih hnga ka ti, Biden nih biathli a ruah hna rua. Ramthumnak kal duh men hna i Khrihfa hruaitu ram ngan bik hrawh lung ngeih cu dah ngai!

A Khrihfa policy nih nu pum chung na um lio na nunnak a khamh. Biden policy nih a thah hngami nau lakah i rak tel law na duh hnga maw? Trump hmurkâ ah Pathian, Pathian, Pathian a thongthong; Biden hmurkâ ah pakpalawng, Mohammed ti pei si ko kha.

A hmurkâ hrimhrim ah Bible bia a tam. A chimsawh bia si, a hrokhrawl si ti hna khi cu mah tawcor hmu lo mi tawcor soi bantuk men kha si. Biden bang Muslim Quran bia vote kawlnak ah a hmang thulhmi a si ve lo.

Râlzâm khenkham a policy hna cu an ram caah a si. Thleidan a ngeihmi cu an ram caah a si. Nang zong nih na fale le mi fale cu na thleidan hna. Trump nih a Khrihfa policy in an thim hna lai i pei ramthumnak nan lanh khawhte lai cu.

Na lan khawh lo zong ah America a rawh nakcun kir ṭha deuh. Biden a kai thai a si hmanh ah lau awk a um lo Israel hmanh Pathian a lungtlin lo cun an caah a ṭha lomi hruaitu a pek ko hna khah.

Muihnak hi vawlei ah a lal chin lai a fiang ko.
Trump holhrel le umtu cu ngakchia hmanh an nihchuah cân a tampi ko nan Khrihfa policy a ngei.

Cucaah, a tawnê ka purhdah e ti a hau lo, a lang kerkurmi a tuahsernak le policy hi sahuai thing tlaih in i tlaih ding.

Biakinn hmanh nehbuar a kaitertu American ahhin ceunak nih a tei lai cu a har ko lai. An duhthimnak si  sual mui in a khatmi pei tam deuh cang cu.

Pum chung nau chim hlah, “Kum 2 a si cangmi ngakchia zong thah a ngah ko, chawnhbiak khawh a si rih lo caah man a ngei lo, thingkung bantuk men a si,” 2015 ah pro-Abortion hruaitu mino pakhat nih a rak ti khah. Cu tlukin a rawkral cangmi America ahhin Trump tei cu a har ko lai.

Chawlehthalnak le ṭhanchonak hi cu aho poh nih an tuah khawh ko. Ramdang he i pehtlaihnak zong hi aho poh nih an ṭhatter khawh ko. Asinain, Khrihfa nunphung ah a policy hram a thla lomi American hruaitu poh cu rawhralnak si.

Biden policy hi a ṭhami kan ti lioah Trump policy cu a dikmi si. Mangmanhthiam le purhdahthiam chimmi nakcun a langmi zumh hi a ṭha deuh. Trump nih a Khrihfa policy in a kalpimi hi ai titer a si hmanh ah a kalpi, a dirpi, a fehter cun ai za diam.

Biden bantukin nunnem, ralzam dawtnak ngeih le Bible leng a simi thil ah tlukruannak ti ṭukṭak hi cu muihnak bawi velhlethiam ziaza men si.

Biden nih a ṭuan cun a lung i thleng hram seh. Khrihfa nih kan dohmi hi a doh khawh ve ahcun a ṭha diam. Mah belte a a dawtmile an thih ning a fah caah Pathian a zum ti rua lo.Credit-Robertson Bawi Nun Thar

Be the first to comment

Leave a Reply

Your email address will not be published.


*