Biatak chim tuah usih – tulio Laimi nih tahfung kan hmanmi a ttha tiah ka ruat lo. Ruat ve tuah!

Ralzam dirhmun le pawcawmnak dirhmun in Laimi tampi zong tthangcho cangmi ram tampi ah kan phan hna. Ramdang kalnak muru hi zoh tuah hna usih. Ralzam le pawcawmnak dirhmun in ramdang kan kal le rianttuan tikah, a hohmanh nih khua, pengtlang le miphun caah tthanchonak le bawmhchanhnak tuah te dingmi hi rak i-ruahchihmi si lo. Nain, miphun caah tthatnak, tthanchonak le bawmhchanhnak a tuah khomi nih an tuah cun, lawmhpi ding si ko. Cu bantuk a tuah ve lomi hna kha miphun daw lomi le mikhiar an si lo timi hi hngalh ding si.

Ramdang kalnak hi a ruang pathumnak in langhter khawh si:1.Pumpak & chungkhar humhimnak caah ramdang ah ralzam dirhmun in kal cio si. Pumpak le chungkhar himnak, luatnak le daihnak duh ah a buaimi le him lomi ram (Myanmar) cu kaltak si.

  1. Pumpak & chungkhar duhdimnak caah ramdang ah kal cio si. Pawcawmnak le duhdim nunnak tinco khawh nakhnga caah, miphun dang ram ah peem le zaam si. Myanmar ahcun zaran nih duhdimnak le pawcawmnak hmuh a har – uknak chiat ruangah. Cucaah, zaamtak le kaltak a si.

3.Uknak chia langhternak caah ralzam in ramdang ah kal si. Ralzam in miphun dang sin kan um tikah, Myanmar uknak le ralkap uknak a chiatnak kha a lang. Myanmar uknak a chiatnak le zawtnak langhtertu tehte kan si ralzam hna hi.

Laimi nih tulio ah tahfung (tahnak) in hmanmi cu hodah le zeibantuk organization dah miphun caah tthatnak le bawmhnak a tuah timi hi si. Cu tikah, pumpak in siseh, chungkhar in siseh, kohhran le phu in siseh – chawva in bawmhchanhnak tampi tuah hi i-zuam cio si. A tuah khomi paoh nih minthannak (larnak) le mintthatnak an tinco.

Khua, pengtleng le miphun caah thawhbur, thawhvo le bawmhchanhvo nih chungkhar tampi zong chunglei harsatnak tampi a tonter hna. Na khua, pengtlang le miphun caah tangka fangkhat na chuah lo zong ah – miphun daw lomi le mikhiar na si hrim lo. A tuah khomi nih hei tuah hna seh – a tuahtu hna zong khi miphun a daw bikmi le mittha cem an si ve hlei lo. Tthatnak le dawtnak hi tangka in tah ding si lo. Fiim pah, theihhngalhnak le tuaktannak tam pah a hau. Minung pakhat a tthat le chiat kong hi tangka in tah ding si lo. Cun, minung pakhat khua, pengtlang le miphun a dawtnak le dawt lonak kong hi tangka in tah ding si lo.Note: tangka in minung tah hlah!Credit-Van Nun Lian

Be the first to comment

Leave a Reply

Your email address will not be published.


*