Biakinn zong a him ti lo Ralhrang SAC nih Khrihfa biakinn an kah caah mipi lei an thi

Kaya ramthlen Lwekaw khuapi khrihfa biakinn cu ralhrang pawl nih hriamnam ngan in an kah hna caah mipi lei minung 4 an nunnak a liam.

Cu ti biakinn an kah cu nihin May 24 zinglei suimilam 1:00 tluk ah a si i biakinn chung aa dawrmi lakah minung pali an nunnak a liam hi a si.
Mah ralhrang nih an kahmi biakinn chungah hin tar le ngakchia deuh an um hna tiah Zalen news nih a phuan.

Nizan ah Kayah mipi ralkap nih ralhrang sakhan pakhat an lak. Ralkap tampi an thah hna a nung zong in an tlaih ve hna. Cucu lungfah thinhun celh lo ah an leh rulhmi hna si dawh a si.Credit-Tluang Ceu Thang

Rem hrim i tuah ve ding.Joshua Le Kaleb Ngeihnak.Minung kan nunnak hi a him le a dam, a tthawn le aa lawmh a herh. Baibal bia in kan chim ah cun aho hmanh nih duh dim te in nun kan duh (cf. Johan 10:10). Daihnak le lawmhnak kha a lamkip in kawl cio a si. A paak in kan nung kho lo i mibu in a nung i pakhat le pakhat aa herhmi, aa daw mi, aa bawm mi, aa thlawpbul mi kan si. Hi bantuk mibu nunnak ahhin tthatnak a ruat i a tuahmi an um zungzal bantukin mah pumpak a rak i daw tuk i a hakkau taktak mi zong an um zungzal ve. Midang nakin nuamh deuh, hna ngam deuh, laar deuh an duh tawn caah dinnak te hna an zuar tawn, ziknawh an hmang, mibu tthatnak kha a mui an chiatter tawn.

Lih chim kha zei ah an rel lo. Mah damnak, tthatnak a si paoh ahcun midang an va thih len zong ah an zei a poi lo. Minung hawi an si fawn tik ah hlawt awk an ttha thlu lo, Baibal nih “na innpa na dawt lai,” tiah a kan cawnpiak fawn tik ah thlachiat a ruatmi tampi an um i hi bantuk mi ttha lo hna hi mibu chung ah an nun khua a sau duh ngaingai ve. Tlawmngaih le thlachiat ruat in an um lio ah cu thengte cu amiak ah i laak in mah pumpak tthatnak ah a tuahmi an um zungzal. Mibu le miphun, khrihfabu le cingla rualchan tiang in a hrawk kho tu an si caah i ralrin cia ve a herh.

Cozah nih hin rampi humhimnak caah zumhawktlak kherhlaitu, mingiatu (spy) aa chiah zungzal. Nan theih cio bang in Israel unau rual pahlei hnih nih Kanaan ram kha an rak kher hlai, an rak ngiat lio ah pahra nih an ttih i an ngamh lo, asinain Joshua le Kaleb nih Pathian an i bochan i Kanaan ram an rak lut kho (cf. Nam. 13). Chanthar Israel ram le miphun an tthawnnak a ruang bik pakhat cu Pathian aa bochanmi mingiatu an ngeih khawh le an tthawn khawh tuk caah a si. Atu lio ah kan ralpa Satan nih dalan kha phun tampi in kan lak ah a thlah i a hman hna. Dalan hi Baibal nih mingiatu a timi hna, zumh awktlak minung an si lo. Kan miphun le khrihfabu nih atu te hin Baibal nih mingiatu (spy), Joshua le Kaleb kan i ngeih zokzok a herh ko.

Joshua le Kaleb tampi kan ngeih lo ahcun, a rauh hlan ah zuar kan tong dih lai i hrih le hren kan tong dih lai; a sual lo thisen a luang lai. Cu caah khrihfabu hi dai te in a tthut lo awk a si; Joshua le Kaleb kha a sersiam a herh i Bawipa Zanriah a hmanpi hnu, Khrih vel chung ah chiatserh in bia aa kam ngam i, a hmur le a lei aa sum i Pathian a ttihzah taktak i miphun a daw mi kan cawmchuah khawh a herh. Khrihfabu le kan hmanmi mingiatu hna an himnak caah pastor te hmanh nih cu bantuk Joshua le Kaleb cu kan lak ah an um ve kha hngal hna hlah seh.

Khua kip ah Joshua le Kaleb kan ngeih khawh hna ahcun kan miphun, khrihfabu, le innchungkhar kan him dam lai. Thiang Thlarau nih a kan dirkamh mi zumtu le miphun kan si caah thla fakpi in rak cam cio u law Bawipa nih Joshua le Kaleb a kan pek ve ko lai. Hihi khrihfabu nih Exodus chungah kan um kan lung a pem taktak khawh ahcun kan tuah awk, kan sersiam awk, kan i timhlamh awk a si kha kan hngalh khawh ko lai. Bawipa kan dirpi ko!Credit-Lal Pek Lian

Be the first to comment

Leave a Reply

Your email address will not be published.


*