Biahalnak : Sipin rikulh area chung ah sipin siannak tel loin inn hei sa ning law zeibantuk sualphawtnak dah kai huah lai?

Lehnak : Sipi rikulh (area) chung ah mah nawl in inn sak khawh a si lo. Sipin sin ah hal hmasa hnu lawng ah inn sak khawh a si. Chinram sipin phung caang 64(a) ah sipin committee siannak um loin inn sak lo ding, inn remh lo ding, inn kauh chap lo ding tiah khap a si. Cu caah sipin rikulh chung ah inn sak kan duh asiloah kan inn kha remh t’han kan duh, asiloah kan inn kha kauh chap kan duh a si ahcun sipin committee sin ah hal hmasa a hau. Siannak kan ngah hnu lawng ah inn sak, remh le kauh chap khawh a si.

Sipin rikulh chung ah sipin committee siannak um loin inn a satu cu tangka a tlawm bik 50,000 in a tam bik 500,000 tiang liamter maw, thla 6 tiang thawngthlak maw, a pahnih fonh zong in maw sualphawt khawh a si. Hihi biaceih zung nih sual phawt ding a si.

Sipin committee nih nawl a buartu kha biacaih zung ah taza cuai a hau. Anmah Sipin committee nih Sipin Zulhphung a buar tiah sual an phawt a si ahcun a tlawm bik 50,000 in a tam bik 500,000 tiang  liamter khawh a si. Sipin nih voi khat sual a phawt cang mi kha voi 2-nak sual phawt khawh a sit i lo. Cun Sipin Committee nih sual an phawt cang mi kong ah biaceih zung ah taza cuai a ngah ti fawn lo.

Sipin nih nawl halnak um loin inn a sa mi kha biaceih zung ah taza a cuai i biaceih zung nih sual a phawt hnu ah inn hrawk duh loin a um peng a si ahcun Sipin nih voi 2-nak taza a cuai khawh. Cuti taza a cuai t’han a si ahcun biaceih zung nih ni 1 ah 20,000 diahmah in nawl a buar ni chung pohpoh tangka a liamter lai.

Tahchunhnak ah biaceih zung nih bia a chah ni kha 1-6-2020 si selaw inn hrawk duh loin a um peng ca ah sipin nih 1-7-2020 ah voi 2-nak taza a cuai a si ahcun baiceih zung nih 2-6-2020 in 1-7-2020 kar ni kha a tuak lai i nikhat ah 20000 ning in a liamter lai. 2-6-2020 in 1-7-2020 kar ah ni 30 a um ca ah 30×20,000 600,000 a si hnga.

Cu caah Khuapi chung inn sak kan duh ahcun Sipin sin ah nawl hal hmasa kha a t’ha bik. Hal hrimhrim ding zong kan t’uanvo a si ve.Credit-Salai Thawngpi Ramthlo

Be the first to comment

Leave a Reply

Your email address will not be published.


*