Biaceih Zung nih Lai Nunphung A Dirpi Maw?

A tanglei cabia hi Chinram biaceih zung, Falam pengkomh biaceih zung nih bia an rak chahmi kha lungtling loin biaceih zung sang bik an phanh hnu ah bia an chahmi a si. Hihi nihin tiang a nung rihmi asiloah hihi zohchih in biachahnak tuah khawhmi a si ca zapi rel awk ah a tawi fiannak in ka rak lehnak a si. Biafang a dikthliar in ka let lo i a sullam tlawttlau lo tein a fiannak in ka lehmi a si.

Thil Umtu Ning: Daw Phir Iang nih a va t’hing U That Nawn kha ruang um loin na ka t’hen a ti i Chinram biaceih zung, Falam pengkomh ah 1989 kum ah taza a cuai. Daw Phir Iang nih an nuva an kawlhawlmi tangka 90,000 chung ah tangka a thimi 50,000 zuh I a tangmi 40,000 hnarcheu a simi 20,000 le chungkhar thilri man 20,000 hnarcheu a simi 10,000 le thilri man hnarcheu 1435, fonh 31,435 kha U That Nawn nih ka pe seh tiah taza a cuainak kong a si.

Chinram ramkulh biaceih zung nih nuva an i t’hen hnu i a tangmi thilri man hnarcheu (1435) lawng kha Daw Phir Iang nih a co khawh lai tiah bia an chah ca ah taza cuaitu Daw Phir Iang kha a lungtling lo i biaceih zung sang bik ah a kai.

U That Nawn nih tangka a thih lai ah 55,270 an nei na in tangka thih ah aa tel viarnak kong, an innpi zong U That Nawn i a nu tangka 2,000 in an sakmi a si i an bet chapmi pe 16×6 ca an nuva tangka 500 lawng aa telnak kong, Lai nunphung ah innpi cu pupa ro a si i nuva i t’hen tikah nupi nih co khawh a si lo kong, hi buainak kong ah sang uktu pawl hmai ah voi 2 khengte nuva t’hennak an tuah cang i thil le ri zong an pahnih lungtling tein an i t’henphawt dih cang caah taza cuainak nawl a ngeih ti lo kong a chim.

Chinram ramkulh biaceih zung nih Daw Phir Iang cu U That Nawn nih a ruang um loin a t’hen, an innpi zong an nuva tangka in an sak, tangka a thih lio ah 50,000 a thi i 40,000 a tang timi kong ah a dik lo tiah bia an chah. Cu caah nuva an i t’hen hnu ah a tangmi tangka le thilri hnarcheu cu Daw Phir Iang nih conak nawl a ngei ve tiah bia an rak chahmi a si.

Daw Phir Iang i a Sihni nih biapi in a chimmi cu an nuva an i t’hen lio ah tangka 40,000 a tang rih, innpi zong an nuva i bawm in an sakmi a si ko timi bia a fian ko bu ah conak nawl pe ve loin bia an chahmi kha a dik lo tikha a si.

Chinram biaceih zung i bia an i hal lio ah U That Nawn i a Sihni nih Daw Phir Iang bia a hal tikah a tanglei ning in a leh.“Tangka a thih hnu ah 40,000 a tang rih ka ti na in cu 40,000 cu ka hmu bal lo i a tawngh zong ka tawng bal lo. Innpi zong cu Lai nunphung ning ah chan khat hnu chan khat faale nih an co ding mi a si. Innpi hi Lai nunphung ning ah nuva i t’hen a si ahcun nupi nih hal khawhnak nawl kan ngei lo nain fapa nih nu ka thih tikah a co khawh.” [Hi bia hi U That Nawn i a Sihni biahlannak kha Daw Phir Iang nih a lehnak a si.

Cu caah Daw Phir Iang bia a chim ning in an nuva an i t’hen hlan ah tangka 40,000 a taang rih a timi kong ah bia fiang a si lonak kong, Lai nunphung ah tuchin fapar tiang co ding mi innpi ro kha nuva i t’hen tikah nupi nih co khawh a si lo caah Chinram biaceih zung nih Daw Phir Iang halmi kong ah pe loin an ummi hi a palh ti awk a t’ha lo.

Hi kong ah Daw Phir Iang i a Sihni nih nuva an I t’hen tikah innpi hi Lai nunphung ning in nupi nih co khawh a si lo timi hi a fekmi nunphung a si lo tiah a chim. Asinain Daw Phir Iang hrimhrim nih Lai nunphung ah nupi nih innpi hal khawh a si lonak kong, nupi a thih hnu lawng ah fapa nih pa sin in hal khawh a si i tuchin fapar tiang co dingmi ro a si kong a chim cang.

Ramhrin miphun pawl i an I ngeihmi nun ning he pehtlai in kaphnih nih lungtlin lonak an ngeih lo a si ahcun biaceih zung nih thil sining zoh in i thlak a herhnak a um lo. I thlak ding zong aa remmi thil a si lo.

Cu caah Chinram biaceih zung I bia an chahmi kong ah I thlak a herhnak a um lo ruangah an biachah ning in kan fehter. Hramlaknak Daw Phir Iag le U That Nawn biachahnak, 1992Credit to Artist Than Aung Laaknak- Salai Thawngpi Ramthlo page

Be the first to comment

Leave a Reply

Your email address will not be published.


*