Atulio Kawlholh a laar ngaimi cu ‘’dalan’’timi hi a si.

Dalan.Atulio Kawlholh a laar ngaimi cu ‘’dalan’’timi hi a si. Mah hihi holh thar si dawh a si. Zei bantuk biafang in a rami dik a si hnga i, zeiti tinak khi dik a va si hnga mu. Asinain, atulio ralkap le mipi i dohnak ah ‘’dalan’’ hon ti le cangka in zeidah a chim duh timi fiang tukin a lang colh. Biafang pahnih te a si nain, thil a fianter khawh taktak.

Atulio cu ralkap le mipi i doh lio cu sikaw, meithal in mi a kaptu ralkap le palik khi ‘’dalan’’an ti hna lo. MAH te hrimhrim zong an ti fawn hna lo. Anmah lei ṭang USDP zong an ti fawn hna lo. MAH nih hmunhma a pek hna i, reng sangsang a ṭuanmi hna zong an ti fawn hna lo. Ṭih ruang le phan ruangah khoika lei hmanh ṭang ngam loin a ummi hna zong an ti fawn hna lo. CDM a tuah lomi hna zong an ti fawn hna lo.

Dalan an timi hna cu, nawl ngeitu hna sin in thil pakhat khat hmuh duh ruang le ngah duh ruangah midang va rawiphiar a a hmangmi pawl khi ‘’dalan’’an ti hna. Ralkap huat ngai phun in i umter i, a taktak le a ngaingai ah a hua hleng ṭung lomi pawl le khua le ram a daw ngai phun in i umter i, mah hlawknak le miaknak a um tikah a ral a ṭha taktakmi pawl khi an si. Tawite in chim ahcun, mizir(zer), mi depde, mi lihchim, mi ṭha lo, mi hrawkhrol, mi firkhut tinak a si ko.

Mah “dalan” hi Laimi lak zongah an um ti a si i, ka zumh ngai. Zeicatiah, Laimi kan i ziak tuk phun a si. Ralkap le mipi i dohnak lawngah a si lai lo, Khrihfabu zongah a um kho ko. A ngaingai tiah, Laimi hi Baibal ca i tlaih riangmang in a lih ngami kan si.Credit
Perhkalh Thawng

Be the first to comment

Leave a Reply

Your email address will not be published.


*