Atu Lio Ah Hriamnam A Țha Bikmi Cu Live Thlah A Si

Ralkap le palik nih mi an tukden an kah hna i an tlaihmi hna le mipi cungah thil sual an tuahmi vialte an kan theih dih sual lai ti an phan tuk ruangah live thlah hi an țih tuk i an duh bak lomi a si.

Cucu dahkaw Halkha i hruaitu pawl nih duhlonak an langhtermi kha ralkap nih an kan hmuh lai i kan umnak an theih sual lai ti an phan tuk ruangah live thlah an duh ve ti lo an ti tiah thawng kan theih. An poi tuk tawn ning hi cu aw. Ralkap zia maw an i cawn hnga ti cu hngal ve bak hlah.

Atu lio cozah lo cozah dohnak le an kut tang um ralkap le palik dohnak ah a țha bikmi hriamnam cu an tuahsermi paoh live thlah hi a si. Cucaah live thlah hi kan ngol ding hrimhrim khi a si lo. Live thlah hi mipi nih kan țih i kan phan ding hrimhrim zong a si lo. A taktak ti ahcun live thlah hi mipi caah ral si loin bawmtu tu a rak si.

Ralkap le palik nih live nan thlah lai lo, an ti hmanh ah kan thlah chinchin ding tu khi a si. An bia kha ngaih ding a si lo, an bia na ngaih ahcun nai hngalh loin an lei țang na rak si cang. Phun dang in chim ahcun duhlonak kan langhter i ralkap le palik nih an kan kham, an kan tlaih cuahmah lio kha live kan thlah duh lo ahcun ralkap le palik an tuahsernak țha lo vialte kha kan huhphenhpiak hna khi a si.

Cucaah cun mipi nih duhlonak kan langhter lio kha ralkap nih an kan hmuh sual lai tiah țih riangmang in live thlah duh loin um hngin hlah u sih. Live cu thlah ko u, ralring te tu in um u sih. Ralrin paoh a sualnak um lo. Live thlah cu atu lio cozah lo cozah caah tlaaknak a si i, mipi caah teinak kan hmuh khawh nakhnga bawmtu țha bik a si.Credit-Salai K. Biak Lian Thawng

Be the first to comment

Leave a Reply

Your email address will not be published.


*