Anmah Mizo le Lawngtlai Laimi dang cu si hna seh law fung in an tu hna lai lo. Phaisa an cawiter hna lai.

Sangau khua i YLA minung pali nih Laipa, Kyaw Kyaw cu tiva ah bom nan puah an ti ruangah fung in an tuk i a thi. Mahkong cu Pholeng nih YLA president bia an halnak video ngaih khawh a si. Amah president hi tiva ah a kal vemi a si.

Abia chim ka ngaih tikah an tuknak ah thihdawh a si ko. Aruang cu minung pa 4 nih voihnih voithum cio fung in a zawmi tuk ahcun a thi ko lai cu. Fungtuk nak lawng in a thi lai lo. Phundang in an hremdan zong a um rih ko lai. Midang ahohmanh a hmutu dang an um ve lo tikah an duhning poah in bia an chim ko lai.

Anmah Mizo le Lawngtlai Laimi dang cu si hna seh law fung in an tu hna lai lo. Phaisa an cawiter hna lai. Silole thong ah an thlak ko hna lai. Aruang cu ngatlai hlah uh tiah an khamnak tiva ah MNF party member a simi pawl nih bom an puah i nga tamngai an tlaih nan an hrem hna lo, phaisa lawng an liam ter ko hna. Kyaw Kyaw cu Kawlram mi a si caah nehsawh in fakpi in an hrem lai i mah an hremnak ahcun a thih hi a si ko lai.

Aluancia kum tampi lio zongah Kala pa pakhat cu Aizawl YMA pawl nih ritthaisii na phurh tiah an puh i fak piin an vuak i a thi beh. Mahruang ah Kala pawl an thinhar tuk i Mizoram he an i pehtlaihnak lampi cu zarhhnih hrawng an phihkanh hna. Mahruang ah Mizoram mipi an hartuk i ei awk nei huaha loin thih dih an rak i tim kha.

A tawinak chim ahcun Kyaw Kyaw hi Sangau khua YLA hremnak in a thi ko ti khawh a si. A poi bak. YLA nih cawiliamhnak an tuah awk hrimhrim a si. Cupin ah Kyaw Kyaw te chungkhar sin zongah nawlnak an tuah awk a si. A video hi rak ngai uh, tling deuh in nan theih lai nan anmah lei lawng chimmi cu zumh thlu ding a si ve lo. A chim dan ahcun a zawtnak ah thi seh law cu dawh in a chim.
Credit-Van Tum

Be the first to comment

Leave a Reply

Your email address will not be published.


*