Amah ttanhtu le senators cheukhat nih Biden teinak hi cohlang cang tiah whistle an tum hnawh zong ah a lu aa thing peng rih.

Martial law le tulio kan President Trump
Kan President cu sungh aa faksak tuk caah nihin tiang election result a cohlang duh lo i, buainak a chuak khawhnak hnga lampi a kawl peng rih ti asi. Amah official ruahnak cheuhtu cheukhat le Michael Flynn,  Virginia senator Amanda Chase hna nih cun martial law hman ding in an duh pi ngai i, a tuah ngam taktak te hnga maw ti hi cuanh cio asi.

Cu caah martial law cu zeidah asi i, zei bantuk dirhmun ah dah hman asi ti le a hman tak2 hnga maw tiah van funtom tuah hna usih.Martial law cu ralkap tlangtlak kha a chimmi asi i, a tlangpi in phunhnih in tthen asi.  Qualified le absolute ti in hmuhkhawh asi. A pakhatnak qualified martial law cu ; ralkap nih nawlngeih kha si lo in mipi bawmh in dainak le remnak ser kha asi. A pahnihnak absolute martial law tu cu aningpi in ralkap nih caan zeimawzat chung uknak tlaih kha a chimmi asi. U.S ram ah hin martial law an hman hi tam ialte asi cang i, vawlei Ralpi pahnih hnu hmanh hin voi 9 a hman cang ti asi.

Cu martial law an hman cu ramchung ral, kokek puicim le zatlak can tck; tornado, tilianh, meikangh, race riot ti bantuk lawng ah an rak hmang. Mi zei president hmanh nih election result lungtling lo ruang ah martial law an rak hmang bal lo. U.S tuanbia ah a chiakha bik le aa dawh lobik ah ruahmi Nov.7,1876 election ah martial law an rak hmang hnik na in an rak I let tthan. America a daw tak2 mi hna nih cun America buainak cha cun sungh hmanh kha an rak ithim deuh. Vawleipi hmai ah America belmam thuh cu mah til le mah zangcumh tluk ah an ruah caah America limhang kha an veng peng.

Laimi tam deuh nih cun termkhat te cu peh tuah seh tiah kan siaherh cio. Asi na in election kong ah biatak te in study an tuahmi le data an lakmi zoh tik ah fimnak a cawngmi college in postgraduate study pawl le anmah Republican party upa tampi nih hnu an chitmi hmuh tik ah khua a ruah thiammi nih cun an kaltak ko hi ta ti a fiang.

Amah ttanhtu le senators cheukhat nih Biden teinak hi cohlang cang tiah whistle an tum hnawh zong ah a lu aa thing peng rih. Termhnih hi hei peh sehlaw U.S president ah a tthabik top 10 ah aa tel lo ah cun a chiahrubik top 10 ah aa tel te lai ka rak ti bal i, tutan ah martial law a hman cikcek ah cun U.S president vialte lak ah a hrutbik asi kha amah lila nih a fehter bantuk asi hnga tiah ka ruah. January 6 tiang hnabei hei sei peng rih lebang khi cu mang ah vanram kai bantuk men ah ruah khawh asi.

Cu caah a donghnak ah cun martial law hi a hmang lai ti hi ka hnabei asei lo. A ruang cu kum 300 renglo a kal cangmi U S tuanbia ah tulio thimnak nak in a zual deuh, a buai deuhmi an rak um len ko na in mi zei hmanh nih martial law ngai ngai hi an rak hmang ngam in an rak hmang duh bal lo. Vawlei ral le kokek harsatnak an ton lawng ah an rak hmang ciomi asi I amah zong cu cu ttha a ti ve te ko lai ti hi ka hnabei asei ve ko.Credit-Lai Kung

Be the first to comment

Leave a Reply

Your email address will not be published.


*