Alak Phawt Dingmi Thantlang COVID-19 Bawmhnak Facang pawl a Man in an Zuar

COVID-19 caan chung ah Thantlang khuachung mipi sin ah alak in bawmhnak pek dingmi facang pawl cu uknak lei zung nih a man in an zuar hna, tiah thawng kan theih.

Aluancia nihnih thawk khan uknak lei zung nih Thantlang Town Hall ah cu facang pawl cu tun khat 35,000 MMK in man deng deuh ngai in an zuar hna.

Micheukhat nih, “Facang zong a ttha ngai i, a tun zong a uak ngai. Tun khat ah 35,000 MMK in man tlawm ngaiin an zuar hna. Nihin zinglei zong ah an zuar,” tiah The Chin Journal ah an chim.

Ralkap nih uknak an chuh hlan NLD chan ah COVID-19 caan chung ah alak in mipi bawmhnak pek ding in facang, chiti le cite tibantuk pawl ramchung khua kip ah an rak khon hna.

Atu Thantlang i a man in an zuarmi pawl zong hi NLD cozah nih a rak khonmi COVID-19 bawmhnak facang an si, tiah kan theih. The Chin Journal April 17, Thantlang

Harnak Nihhin Dawtnak HI Anunter Tthan Ton.Miphun chungah zawnruahnak le dawtnak thazaang ader tikah,  ‘ cu adermi thazaang avan tthawnter tthanmi cu ; miphun nih harnak an tonmi hi arak si tawn. Israel miphun nih ram andawtnak le an ilungrualnak khi, Adolf Hitler nih 6 million arak thah hna caah asi. Kan unau Mizo hna an ilungrualnak le ram andawtnak zong khi, India ralkap nih faktukin arak hremh hna caah asi. India ralkap nih Mizo hna hi zeithluk indah arak hremh hna tiah cun Biak Inn an ipumh lio ah an nungak pawl kha an banin an rawt hna i an sualpi hna. Chief Minister Pu Zoramthanga nih Zonet interview ah hi tihin achim. Ram arak buai hlan  ahcun khuate lei in Aizawl arak tlawngmi hna hi tlun inn an neih lo caah riahcaw le puan anrak iken i, bangla ah anrak riak tawn,  Asinain ram abuai hnu ahcun khuate lei in Aizawl arak ra mi hna hi riahcaw le puan an iken tilo, kachim duhmi cu Mizoram buainak nihhin idawtnak le zawnruahnak hi atthawnter i, cucu Miizo miphun nih kan i uangthlar bik mi cu asi ati.

Atutan kan tonmi ngaichiatnak le lungkuainak hi kan miphun dawtnak le lungrualnak ah thazaang atthawntertu ah asi ter khawhmi asi, Kan miphun karlak ah lungruallonak aum mi zong hi atutan kan tonmi harnak nih hin a cimhter khawhmi zong asi fawn. Cucaah atutan kan tuarnak hi ralkap tthalo uknak thlak lawng kha siloin, kan miphun chung hrimhrim zongah lungrualnak le dawtnak ahun chuahter tu zong asi ti hi kan ruah chih abia ngaingai.
Khatleiah atulio harnak kan tonlio ahhin kan miphun chung in ralkap lei ah attang i rawiphiartu an um hi cu, lung afak ngaingai. Hibantuk minung hna hi nikhat khat ahcun kan miphun nih zei kan ti hna lo zongah kan vawlei nih dan atat teh ko hna lai.

Vawleicung ramtang hriamtlai hna lakah min athang ngaimi LTTE nih phungthluk bantukin an neihmi cu; na miphun na rawiphiar ahcun na vawlei nih an tthawl /dawi lai ti hi asi. Hi bia hi asawhsawh asi hrimhrim loh, Chankhat lio ah kan rak tonbal mi cu ralkap nih phaisa anpek hna i anrak kan rawiphiartu hna hi chikkhat cu an inuam ko nain, ahnu ahcun an chuahnak khua le pengtlang hna ah an um ngam tilo i, miphundang sinah lungretheih ngaiin khua asami an tampi. Keimah pumpak hrim nih katheihmi hna an tampi. Kachim duhmi cu miphun rawiphiar ahmang mi hna hi na miphun hawi nih zei an nin tilo zongah kan vawlei nih an dawi/ tthawl teh lai. LTTE nih na miphun na rawiphiar ahcun na vawlei nih an dawi teh lai an timi hi anmah miphun ca lawngah siloin kan miphun ca zongah asi ve ti hi kan philhlo ah attha.

A ngaingai ti ahcun miphun dang nih biafang an neih lomi thlachiatruat timi ‘biafang’ aneih mi miphun kan si nak, Vakok hmelchunnak ahmang mi miphun kan si nak le, Khrifa kan sinak hna hi atulio caan ah abikin kan hman dingtu asi.By-Van Neih Thang

Be the first to comment

Leave a Reply

Your email address will not be published.


*