Aibur Khuami 3 an Tlaih hna Hnu ah Ralkap nih Aibur Khuami pawl Zenthong an Apter Hna

Thantlang peng, Aibur khuami minung pathum ralkap nih an tlaih hna i, an phone chung ah zenthong hmanthlak an hmuh caah Aibur khuami pawl cu ralkap nih zenthong an apter hna, tiah thawng kan theih.

Aibur khuami Duh Hu Thang le Tin Maung cu April 12 ah Thantlang in Hakha lei an rat lio ah Hakha khualuhnak checkpoint ah an tlaih hna.

Cun, motor mong a simi Sang Maung zong April zarh khatnak ah ralkap nih an rak tlaih. Zei ruang ah an tlaih timi theih a si lo.

An tlaihmi minung pathum lak ah minung pakhat i a phone chung ah zenthong hmanthlak pawl an hmuh caah cu zenthong pawl cu ap ding in ralkap nih Aibur khua upa an fial hna.

Cucaah, nihin April 15 ah Aibur khua pastor pakhat telh in minung pathum nih Thantlang penguk zung ah cu zenthong pawl cu an vung ap.

Aibur khua upa pakhat nih, “An tlaihmi minung pakhat phone chung ah zenthong hmanthlak an hmuh caah zenthong rak ap uh tiah khua lei ah phone a rak kan chawnh. Nihin ah Pastor pakhat telh in minung pathum nih cu zenthong pawl cu Thantlang penguk zung ah an vung ap,” tiah The Chin Journal ah a chim.

Khuami nih cun zei zenthong hmanh kan i chiah lo, mah zenthong pawl hi khoika an cawk ti zong kan thei lo, tiah ralkap sin ah Aibur upate nih an chim.

Zenthong apnak ah Hakha Runtlang ralbawi Col. Zaw Min Tun zong Thantlang ah a kal ve, tiah kan theih. By:The Chin Journal April 15, Hakha Hmanthlak: March 9, Hakha khauchung ah ralkap an i chawnh lio.

Hakha ah Ralkap nih an Rak Tlaihmi Pa a Luat Hnu ah a Nunnak a Liam.Kan hnu February 24 zaan ah Hakha, Dawrthar sang ah ralkap nih an rak tlaihmi Ko Htein Lin Naing cu nizan ah a nunnak a liam, taih thawng kan theih.

Ko Htein Lin Naing le a hawipa cu February 24 zaan ah thlalangawng in ralkap pawl a zoh hna ruang ah an rak tlaih hna.

Ralkap nih an taw ah fung in voi 3 veve an tuk hna i, February 29 ah an thlah tthan hna.

Ralkap nih an thlah hna hnu ni khat a rauh ah Ko Htein Lin Naing cu pum dam loin a um i sizung ah aa piah. Sibawite nih, “Rawl ei loin na um lengmang i na pawpi a phing” tiah an ti.

Ko Htein Lin Naing he an tlaih vemi a hawipa nih, “A luak a luak i zinglei sml. 1:00 hrawng ah sizung ah kan kalpi. Rawl na ei bal lo caah na pawpi a phing tiah sibawite nih an ti. Cu dih cun tlawmpal kan rak ttin tthan ko. Caan karlak ah zu a ding pah lengmang i pum dam loin a um than caah sizung ah kan kalpi tthan. Sibawite nih a thin phing tuk cang an ti. kan thlop manh ti lai lo an ti i, mahti cun a nunnak a liam,” tiah The Chin Journal ah a chim.

A nunnak a liammi Ko Htein Lin Naing ruak cu nihin April 14, zinglei sml. 10:00 ah an vui tiah kan theih. The Chin Journal April 14, Hakha

Be the first to comment

Leave a Reply

Your email address will not be published.


*