A Tu a ra ding mi lockdown chung ah cun zei poh si zong ah Malaysia um chin mi kan nih ralring a hau ko lai.

A Tu a ra ding mi lockdown chung ah cun zei poh si zong ah Malaysia um chin mi kan nih ralring a hau ko lai. Cozah nih phungning lo in um mi ramdang mi pawl tlaih ding in official tein thawng an thanh cang caah i ralring ko u sih. Mah lockdown chung ah tlaihkhih lei ah tuanvo lak ding in palek thazaang zong 55,000 tiang an chap. Thawnginn zong ready tein kan timtuah cang tiah an chim.

A bik in UNHCR card le catlap a ngei lo mi hna caah cun i ralrin ngaingai a hau. UNHCR nih mithar ka lak lai a ti ko na tein a tu tiang ah kan ruahchan ning in a tuah lo tik ah kan him nak caah mah tein ralring in kan um thiam a hau cang ko. A herh lo ah a leng chuak lo ding, a herh mi thil ruang ah a leng chuak tik zong ah SOP tha tein zul ding. Pathian nih rak kan kilveng hram ko seh! Credit-Credit-James Bawi Thang Bik

Kawlram Ramkhel Le Jesuh Thattu Pharisee Ramkhel.1st February 2021, ralhrang nih kan rampi uknak an lak hnu in kan rampi a mui chin lengmang. Thahrum hmangin uknak an fir caah talal-chai in zei sualnak ngei lo rammi 800 leng nunnak liam cang. Hi zat remruam thisen an chuah cang nain phuhrunnak a pelte hmanh an ngei lo, hmaikhah lonak zong an ngei lo, zei sualnak ngeilo ah an i chia chapbei rih.

An cawlcanghnak le thil tuah zoh lengmang tikah, Khamhtu Messiah thattu Pharisee ramkhel ka lawhter ngai. Jesuh hi Pa Pathian nih vawlei ser hlan in a mi hna sual man thi dingin vailam a rak timhpiak cia mi (Mat.1:20-21; Lam.2:23) a si ko bu ah, Khrih thihnak phen ah ai thup mi Pharisee ramkhel a um tihi pheh awk thalo a rak si. Zeicahtiah, Pharisee hi Jesuh chan ah biaknak lei ah siseh, vawlei lei ram uknak kong ah siseh, Judah miphun lutlai an si ti khawh a si. Baibal chung Moses nawlbia bangin Sanhedrin nih Judah cozah tlaih.

Sanhedrin timi cu, atuchan holh cun Council khi a si. Hi Sandedrin ahhin an minung 70 an si tawn i chungtel si khawh nakding ah Hebrew Baibal le an phunglam kum 32 tal a cawngmi si a herh ti si. An chan cheu cawnnak ah caan an pek i phungphai siseh, Baibal siseh, a hngal bak mi an si. Cu Sanhedrin tam-u cu Pharisee an si ti si. Thimfung thlak zongah milu tam hrat kan ti cu, thimfung tlaitu an si zungzal. Jesuh thihnak zong kha anmah ramkhel le mizapi tawsawhnak a si. Anmah Pharisees lawng an si lo, tlangbawi le zong Jesuh thihnak kongah thisen ai neh mi an si ve.

Pharisee le tlangbawi hna nih Jesuh an huatnak hi, anmah nakin zultu tampi a ngeih caah a si (minung biachim in). An nahchuah lawng si lo, phung diktak kalh in an tangka hmuhnak innka tampi a kharpiak hna caah zong ah a si fawn. Zeitintiah, Jesuh chan ah Judah mi nih Pathian biaknak le Baibal cawnnak an ngeihnak hmun hi, biakinn (temple) le synagogue a si. Hi hmun pahnih ah nawlngei hi tlangbawi le Pharisee an itel. Zeicahtiah, Moses nawlbia tang um lio (Jesuh thih hlan) ah cun raithawinak (sacrifices) hi nawlbia ning in biaktheng cungah tuah a si.

Zei bantuk raithawinak hmanh a si ah, Jerusalem biakinn (temple) ah raithawinak tuah a si tikah, lamhla lamnai in siseh, Jerusalem khuachung lila ummi hna nih siseh, raithawinak pekchanh an duh tikah, ner luahmah in pekchanh awk satil van i phorh kha an ca ah retheih i pek a si hlei ah, pechantu tlangbawi nih ziartian in a cohlang hna lo ti si. Nawlbia ning in, soisel awk um lo, dotla mi satil lawnglawng cohlan ding ti a si fawn. Tikah lamhlapi in an van kenmi satil kha anmah mit ah dothla a si ko nain tlangbawi dotla lo a ti lengmang hna ca ah, Jerusalem biakinn ah chawdawr a umnak kha a si.  Thianghlim tein hman awk a si mi Pathian umnak Inn (Biakinn) cu Rom ram-uk bawi pawl le Pharisee le tlangbawi hna nih ramkhelnak le pumpak hlawknak hmun ah hman an duh caah raithawi awk satil an rak ken fatin dotlalo tiah, tlangbawi nih a hnawl lengmang hna zong kha si. Cucaah biaknak (temple) ah chawlehthalnak le tangka thlennak (business) nganpi an rak tuahphahnak kha a si (Math.21). Jesuh zong nih fakpi in a sik hna i an dumdawi viar hna kha mu!

Biakinn chawlehthalnak ahhin tlangbawi le Pharisee lawng mawhphorh awk an tha lo, Rom cozah zong pehtlaihnak a ngei. Rom pennak tang um mi an si tikah, Rom siangpahrang Caesar muicuang tangka hman a si. Cucaah biakinn chungah tangka thlennak an tuahmi nih tampi kaphnih hlawknak a chuahpi. Rom cozah tangka fang in raithawinak satil an cawk. Hihi Rom cozah lutlai hna le Pharisee le tlangbawi hmunkhat thu in hlawknak (miak) an hmuh cio nakding biahrennak (covenant) an ceih mi si. Cutikah, ngunkhuai an lak i raithawinak he pehtlai mi satil paoh biakinn an an zuarter hna. Kha hmun ah an zuarmi lawng kha tlangbawi nih pekchanh awkah a cohlan, dotla an si, tiah tuanbia hlathlai nih an chim. John MacArthur nih a chimmi bang cu, “Rom ralbaw Pilate Pontius nih Jesuh vailam a khenhnak zong hi, tlangbawi le Pharisee mi hna he biahrennak an ngeih mi a um caah a si,” ti.

Zeitintiah, Luke 13 ah, Pilate nih Galilee mi hna Pathian sinah raithawinak an pekchanh lio ah minung tam tuk a rak thah bal hnanak kan hmuh. Baibal thiamsang (scholars) hna nih, “Luke 13 ah kan hmuhmi thahnawnnak ruangah hin Pilate Pontius hi duhthimnak tlang ah a dir. Zeicahtiah, sualnak ngeilo beibahaam loin mi a thah hna caah Rom siangpahrang Caesar an chawnhbiak. Caesar nih Pilate chak a rengh i duhthimnak tlang ah a dirter tihi Judah hruaitu hna nih fiangte in an hngalh. Hi ruangah, Judah hruaitu upa hna nih Jesuh vailam khenhchih awk ah Pilate an chimh lio ahkhan duhthimnak nawl a ngei lo. Judah mizapi duhnak a tuah lo ahcun Caesar sin in a ra dingmi thawngpang a theih cia cang caah a tih tuk. Cucaah Judah upa hna duhnak bangin bia a ceih kha si (Luke 23). Phundang in kan chim ahcun, amah pumpak ralvennak le pawkuai lo nakding ah sualnak ngei lo Jesuh a thah.

2020 November 8 thimnak phichuak ruangah kan rampi cu thisen luannak le mitthli tlaknak ah a hung cang than. Kawlram 2008 Phunghrampi ah cozah thutdan zatuak 25% (ram pumpi dihlak)
leng ralkap covo a si cia. Judah cozah ah Pharisee le tlangbawi nih an uak deuh hna ruangah anmah duhnak in thil a kal tawn bang, kan Kawlrampi zong ralkap nih kum 60 fai a chak tlaih ve.

Anmah hruai chungah kan ram rumnak vialte an zuar, kanmah kutke in tuankawl mi vialte an kan chuh i kutdot dirhmun ah an kan chiah. Anmah ralkap hlawtnak ai tel lo mi thil tuah cu dan kalh ah an chiah. Anmah he riantuanti a duh lo mi minung paoh an zuah hna lo, kan Pi Suu bel a chansau lehlam! Anmah ralkap nih tuah mi paoh a dik, midang nih tuah mi paoh a sual a ti mi an si. Thil dik tanh lo in palhnak tu kha a dirkamh mi an si. Hi bantuk minung hi Baibal nih “Midepde” a ti hna. Midepde lawng hmanh an si lo, lainawng an si chih. Hi tlukin a sualmi ralhrang a dirpitu le a bawmtu “DALAN” tampi nan um; DALAN vialte, Jesuh thattu Pharisee le Pilate he nan i dannak a um lo. Cun pumpak zawnruahnak lawng a ngei mi CDM a lut lomi vialte zong “Pilate” bantuk nan si.

Nanmah paw kuai lai phan ruangah midang nunnak liam zei nan rello, nan minphun hawi nih harnak ton lain an phanpiak lo. Pilate zong kha amah paw kuai lai phan ruangah Pharisee duhnak lungsipi in Jesuh nunnak a lak kha si. Nanmah DALAN vialte zong nanmah kut in mi nunnak va la hmanh hlah u law, nan dirpi mi ralhrang nih mithisen an chuahmi nan kut ai neh hi philh lo ding. Phundang in kan chim ahcun, lainawng nan si ve. Dinfelnak (justice) ai tel lomi thil tuah a bawmtu nan si caah dinfelnak a duhtu Pathian nih nan ca ah dantatnak a chiah hrimhrim lai, zeicahtiah Baibal nih midepde le mithalo cu dantatnak hmu loin an um lai lo a ti. Jesuh thisen ai neh mi Rom ralkap, tlangbawi le Pharisee pawl cung zongah cucu a tlung.Credit-Carson TwinTwin

Be the first to comment

Leave a Reply

Your email address will not be published.


*