2020 US Ramhun thimnak ah nang aho nih dah teinak aco lai na zumh?

Media pawl nih result an hei thanh tawn ning rih ahcun Joe Biden nih point tamdeuh a hmuh tawn. Mah cucu teh zumhawk a tlak kun hnga maw, Biden nih cun maw a tei tak ko hnga?Cu lioah President Trump nih cun US media cheukhat pawl cu fake news tiah min a sak hna Laiholh cun Adeu asiloah Lih thawngthanhnak ti khi a hei si hnga ahleice in CNN le ABC news tbt. pawl khi mu.

Anmah zong nih Trump cu an huat ngai i thil ttha a tuahmi cu thanh bal hleng loin soiselnak lawngte an kawl. Atu i Trump nih fake news tiah a auhmi pawl nih khin 2016 kum US thimnak phak lai zongah khan an tuahmi poll result kip ah Hillary Clinton cu teinak an rak coter sek len nain Thimnak nilecaan a rak phak tik ahcun Trump nih tha lo tukin a tei diam i an mual pho ko. Trump adotu minthang tampi zong nih Trump nih president a tlin ahcun ramdang ah ka peem lai an rak ti lulh cio hna nain ataktak ah a hun tlin ciammam cu an i phetsolh viar i ramdang ah ai tthial in a peem ngaingai aho hmanh an um loh. “Nan thil i tiim uhlaw US cu chuah taak ne uhca” tiah bianeek in an ti hna i ritte thi bang chim awk an rak hngal lo. Mah ruang ah cun asi men lai tukum thimnak cu kha ti bantuk biachim mi aho hmanh an um ruam ti loh.

Cu ti i media nih thanh le phuanmi pawl hi rinhchanh awk tlak ngai an si tung lo ahcun zeitin dah atutan thimnak i teitu ding hi kan hngalh khawh bik lai?Apakhatnak kan thleidan thiamnak dingah kan hmuh khawhmi cu election campaign hin asi. Kap hnih party nih mipi lunglaak khawhnak campaign an tuah cuahmah liopi asi.

President Trump le Vice President Mike Pence campaign tuahnak kip ah minung thonghra leng lengmang an chuah lioah Joe Biden Kamala Harris tuahnak tu ahcun mibu a chuakmi an um ballo ruangah zeitik hmanhah mipi leikap hoih in Video camera an laghter bal loh. Anmah zongnih cu ti i ttanpitu mibu an um lo lai cu an hngalh cia i drive in hrawnghrang tu In campaign cu an tuah tawn ve. Presidential debate tuah lio zongah Biden nih Trump cu campaign na tuah nak ah mi bubu in an chuak I zawtnak zong nan karh ter lai ati i Trump nih bianeek nawn tein nang cu campaign cu nai tuah sek len ve nain minung 3 hoi lawng hna pei an rak chuak kha tiah a vun hloh ko. Democratic pawl nih Trump campaign tuahnak i mibu thong tampi an rak chuahmi cu zawtnak nan karh ter lai ti in an soisei ngai hna nain, innduah le thilfir pah in protest a tuahmi pawl tu cu tha an peek fawn hoi hna.

Cu tikah US Mipi nih aho dah an uar i an ttanpi  deuh timi cu an campaign tuahnak cio in fiang ngaiin hmuh khawh asi. Atutan thimnak ah Trump nih fawi tuk in a tei te lai. Aruang: US thimnak tuanbia ah tei awk ah a harbik mi hna cu Acaan khatnak president a ttuan cia cangmi President Trump bantuk hna hi an si. President a ttuan lio mi asi lawng hmanh si loin ram a hruai ning zoh tikah Economic a tthancho ter i rian tampi a serchuah khawh, US i khua a sa liomi nih cun Trump president asi hnu in rian a tam deuh zia cu kan hngalh dihmi asi ko. Vawlei pi a rak lau tertu ISIS le ralhrang vialte hna zong cawl kho loin a hrawh cikcek hna. Ai rem kho bal lomi Middle East ram pawl zong daihnak a serpi khawh hna hleiah US a do i a zuamcawh pengtu North Korea le Russia bantuk ram pawl zong hawikom tu ah a ser khawh hna i vawleipi a daih ter. Amah President a kai hnu in biaknak lei zalonnak zong hmuh deuh asi. Lung loh a hmang tuk cangmi Joe Biden celngel Democratic nominee asi mi zong khi kam khat leicun Trump caah vanthat asi. Democratic party pawl zei hmanh an si lonak zong a langhter. Thli bangin bia lawng a kamh i a tak in a tuah bal lomi, Joe Biden bantuk politician minung cu US nih an duh ti hna loh. Ram a daw i a biakam zang a tuah ngammi mi ralttha Trump bantuk lawng an duh cang hna.

Joe Biden nih President Trump a tei dingmi khi cu sumkhal par lai bantuk khi asi. Ciammam tein tei khawh nak  ding lamdang aum lo ruangah Democratic nih US ram chung state kip ah buainak chuahpi in Trump thlak an i zuam. Covid-19 kong zongin sual kip an puh. Cu lawng hmanh si loin lih le hrokhrol( fraud) in mail voting in teinak kawl an i zuam rih. Atutan ah ruahlo pi in Biden nih teinak a hmuh sual si ahcun fraud in mail voting an tuahmi a tlamtling ti nak asi hnga.Credit-Salai Cbt Zaathang

Be the first to comment

Leave a Reply

Your email address will not be published.


*